كەشە اقتوبەگە قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى اسقار مامين ءبىر كۇندىك جۇمىس ساپارىمەن كەلدى. دەلەگاتسيا قۇرامىندا مينيسترلىكتەردىڭ, ۇلتتىق حولدينگتەر مەن كومپانيالاردىڭ باسشىلارى بولدى. وبلىس اكىمى بەردىبەك ساپارباەۆتىڭ جول باستاۋىمەن رەسمي دەلەگاتسيا «اقتوبە رەلس ارقالىق زاۋىتى» جشس-نە ات باسىن تىرەدى.
بۇل كاسىپورىن يندۋستريالاندىرۋ كارتاسىنا ەنگەن بىردەن-ءبىر ءىرى جوبا بولىپ تابىلادى. وندىرىستە شاپشاڭ جىلدامدىقتاعى قوزعالىس جەلىسى ءۇشىن رەلستەر شىعارۋعا مۇمكىندىك بەرەتىن يننوۆاتسيالىق تەحنولوگيا قولدانىلادى. تمد ەلدەرى اراسىندا مۇندا ءبىرىنشى رەت 120 مەترلىك رەلس شىعارۋ يگەرىلەتىن بولادى. جىل باسىنان بەرى زاۋىت 6,1 ميلليارد تەڭگەنىڭ 32,7 مىڭ توننا رەلس ونىمدەرىن ءوندىردى. ولار كاسىپورىننىڭ وندىرىستىك پروتسەسىمەن تانىستى. سەرىكتەستىك ديرەكتورى اندرەي كۋزمين زاۋىتتىڭ جارتىلاي شيكىزات – سوم تەمىردىڭ پەشتە قىزىل شوقتاي بالقىتىلىپ, دايىن رەلس شىققانعا دەيىنگى پروتسەسىن ءتۇسىندىرىپ ءوتتى. زاۋىت جۇمىسىمەن تانىسۋ كەزىندە وعان وڭىردە يندۋستريالىق-يننوۆاتسيالىق مەملەكەتتىك باعدارلامانىڭ جۇزەگە اسىرىلۋ بارىسى تۋرالى باياندالدى. 2010-2015 جىلدارى جانە بيىلعى جىلدىڭ باسىنان بەرى 523 ميلليارد تەڭگە تۇراتىن 83 جوبا جۇزەگە اسىرىلىپ, 7,8 مىڭ جۇمىس ورنى اشىلعانى ءمالىم ەتىلدى.
ا.مامين باستاعان توپ زاۋىتتىڭ زەرتحاناسىندا بولىپ, رەلستەردىڭ توزىمدىلىگى, ساپاسى جانە باسقا ولشەمدەرى بويىنشا حالىقارالىق ستاندارتتارعا تولىق جاۋاپ بەرەتىنىنە كوز جەتكىزدى. ماماندار زەرتحاناداعى بىرەگەي قوندىرعىلاردىڭ رەلستىڭ ساپالى شىعارىلۋىنا العىشارت جاسايتىنىن جەتكىزدى. ءار قوندىرعىنى جەتە ءتۇسىندىرىپ, بىرەگەي ءونىم شىعارۋدىڭ تۋرا وسى زەرتحانادا تۇيىندەلەتىنىن باياندادى.
جالپى, زاۋىت جىلىنا 430 مىڭ توننا پروكات, ونىڭ ىشىندە 200 مىڭ توننا رەلس جانە 230 مىڭ توننا ءىرى سورتتى پروكات ونىمدەرىن شىعارا الادى. جوبانىڭ قۇنى – 55 ميلليارد تەڭگە. يندۋستريالاندىرۋ كارتاسى باعدارلاماسىنا سايكەس جوبانىڭ ينفراقۇرىلىمدىق جەلىلەرىمەن جاراقتاندىرىلۋىنا وبلىستىق اكىمدىك قولداۋ كورسەتكەن. ياعني, گاز, سۋ جانە كاناليزاتسيا قۇبىرلارىن تارتۋ, زاۋىتتىڭ تەمىر جول ارقىلى وتەتىن اۆتوجولى, 22 شاقىرىم ەلەكتر جەلىسى وسى باعدارلاما اياسىندا جۇرگىزىلگەن.
سەرىكتەستىك ديرەكتورى ا.كۋزميننىڭ ايتۋىنشا, زاۋىت كۇنىنە 1 مىڭ تونناعا دەيىن رەلس شىعارا الادى. رەلس شىعارۋ بيىل عانا باستالعان. ەندى 1,5 جىلدا كاسىپورىن تولىق قۋاتىنا شىعادى. قازىر «قازاقستان تەمىر جولى» اق تاپسىرىسىن ورىنداۋدا. سونداي-اق, رەلس ونىمدەرىن ەكسپورتقا شىعارۋ دا قاراستىرىلۋدا. بيىل ءبىرىنشى رەت وزبەكستانعا ءوز ونىمدەرىن جونەلتكەن زاۋىت بولاشاقتا بەلورۋسسيا, گرۋزيا, ارمەنيا, مولدوۆا جانە تاجىكستان نارىعىنا شىعۋعا باعىت ۇستاۋدا.
– ءبىز «ر-60» رەلسىن تولىق يگەردىك, ەندى كەلەسى جىلى «ر-65» رەلسىن جانە قۇرىلىسقا قاجەتتى بىرقاتار تەمىر قۇرىلعىلارىن يگەرۋدى قولعا الدىق. ءبىزدىڭ كاسىپورىن شىعارعان رەلس جانە باسقا تەمىر ونىمدەرى ساپاسى جاعىنان الەمدىك جانە حالىقارالىق ستاندارتتارعا ساي كەلەدى, كەي ولشەمدەر بويىنشا ارتىپ تۇسەدى, – دەيدى ا.كۋزمين.
پرەمەر-ءمينيستردىڭ ءبىرىنشى ورىنباسارى ايالداعان ەكىنشى كاسىپورىن «تۇرعىن ءۇي قۇرىلىسى» كومبيناتى بولدى. ۇستىمىزدەگى جىلدىڭ قاڭتار-قازان ايلارى ارالىعىندا جالپى الاڭى 460,3 مىڭ شارشى مەتر تۇرعىن ءۇي پايدالانۋعا بەرىلدى. تۇرعىن ءۇي قۇرىلىسىن دامىتۋ ءۇشىن ۇستىمىزدەگى جىلى تامىز ايىندا «ءۇي قۇرىلىسى كومبيناتى» جشس تۇرعىن ءۇي قۇرىلىسى ىسكە قوسىلدى. مۇندا دا ا.مامين تەمىر-بەتون پانەلدەرىن جانە تۇرعىن ءۇي قۇرىلىسى ءۇشىن قۇرىلعىلار شىعاراتىن ءوندىرىستىڭ جۇمىس پروتسەسىنە نازار اۋدارىپ, ءونىم ءوندىرۋ جايىمەن جەتە تانىستى.
ول وزىق تەحنولوگيا مەن دايىن ونىمدەردى كورىپ, كاسىپورىننىڭ كەلەشەگى زور ەكەنىنە سەنىم ارتتى. بۇل كاسىپورىننىڭ تۇرعىن ءۇي قۇرىلىس ونىمدەرى تولىقتاي ىشكى نارىققا شىعارىلادى. جوبانىڭ قۇنى 2,6 ميلليارد تەڭگەنى قۇرايدى. كومبيناتتىڭ جىلىنا 50 مىڭ شارشى مەتر تۇرعىن ءۇي قۇرىلىسى ماتەريالدارىن شىعارۋعا قۋاتى جەتەدى. كاسىپورىن جۇمىس قارقىنىن بىرتە-بىرتە ارتتىرىپ كەلەدى.
ا.مامين «كاسپي پليۋس» جشس-ندە بولىپ, تاۋ-كەن جانە ءوندىرۋ ءوندىرىسى ءۇشىن ءتۇرلى بەكىتكىش شىعاراتىن كاسىپورىننىڭ تىنىس-تىرشىلىگىمەن تانىستى. جىل باسىنان بەرى سەرىكتەستىكتە 20 مىڭ دانا بەكىتكىش وندىرىلگەن. جالپى, بيىلعى ون ايدا ءوڭىردىڭ ونەركاسىپ ونىمدەرىنىڭ كولەمى 959,7 ميلليارد تەڭگە قۇرادى.
سودان كەيىن پرەمەر-مينيستردىڭ ءبىرىنىشى ورىنباسارى ا.مامين باستاعان دەلەگاتسيا جاڭا كولىك-لوگيستيكالىق ورتالىعىندا جانە «شەبەر» قۇرىلىس گيپەرماركەتىندە بولدى.
ساتىبالدى ءساۋىرباي,
«ەگەمەن قازاقستان»
اقتوبە وبلىسى