«قازمۇنايگاز» ۇك» اكتسيونەرلىك قوعامى ەلىمىزدىڭ مۇناي-گاز سالاسىنداعى جەتەكشى كومپانيا بولىپ تابىلادى. كومپانيانىڭ وزىندىك وندىرىستىك جانە ەڭبەك ءداستۇرى بار. سوڭعى جىلدارى مۇندا ءوندىرىستى جاڭاشا ۇيىمداستىرۋعا, نارىقتىق قاتىناستاردى دامىتۋعا جانە ادام رەسۋرسىن ءتيىمدى پايدالانۋعا باعىتتالعان ءساتتى قادامدار جاسالۋدا. سونىڭ ءبىرى كومپانيا كەلەشەگى جاستارعا سەنىم ارتۋ, ولاردىڭ جاستىق جىگەرى مەن عىلىمي ىزدەنىستەرىن وندىرىستە ءتيىمدى پايدالانۋعا سەرپىن بەرۋ ەكەنى ءسوزسىز.
اقتوبەدە وتكەن «قازمۇنايگاز» ۇك» اق جاستارىنىڭ III سلەتىندە وسى جانە باسقا ءماسەلەلەر تالقىلاندى. سلەتتىڭ «وزگەرىستى وزىڭنەن باستا» دەپ اتالۋىندا دا ۇلكەن ءمان بار. بۇل – كومپانيادا جۇمىس ءىستەيتىن ءار جاستى ۋاقىت تالابىنا قاراي يكەمدەلە ەڭبەك ەتۋگە ۇمتىلدىرۋدىڭ ءبىر جولى. فورۋم ءىس جۇزىندە قمگ كومپانيالار توبىنداعى 45 سەرىكتەس جانە تاۋەلدى كاسىپورىن جاستارىنىڭ اشىق اڭگىمە الاڭىنا اينالدى. جاستار سلەتىنىڭ نەگىزگى ماقساتى – جاس جۇمىسشىلار مەن كومپانيا باسشىلىعى اراسىندا ءوزارا تۇسىنىستىكتى قالىپتاستىرۋ, ءوندىرىستى دامىتۋداعى جاستاردىڭ ءرولىن كۇشەيتۋ باعىتىندا جۇمىس ىستەۋ, جاستار باستامالارىن جۇزەگە اسىرۋعا ىقپال ەتۋ جانە قولداۋ كورسەتۋ.
القالى جيىنعا اقتوبە ءوڭىرىندەگى بىرقاتار مۇناي-گاز كومپانيالارىنىڭ جاس ماماندارى شاقىرىلدى. جاستار جيىنىن جۇرگىزىپ وتىرعان «قازمۇنايگاز» ۇك» اق جاستار كەڭەسىنىڭ توراعاسى سايات قايگەلدينوۆ مۇنداي كەزدەسۋلەردى ۇيىمداستىرۋ ءداستۇرگە اينالعانىن جەتكىزدى. سلەتتە ءسوز العان «قازمۇنايگاز» ۇك» اق ۆيتسە-پرەزيدەنتى سەرىك ءابدەنوۆ ترانسفورماتسيالاۋ باعدارلاماسى, ونىڭ اياسىندا ەنگىزىلىپ جاتقان جاڭالىقتار, سونداي-اق, ادام رەسۋرستارىن باسقارۋ باعىتىنداعى جوسپارلار تۋرالى تاراتا باياندادى.
– قازىر قمگ كومپانيالار توبىندا نR ترانسفورماتسيالاۋ بويىنشا جۇمىستار جۇرگىزىلۋدە. بۇل قايتا قۇرۋدى ءاربىر قىزمەتكەرگە جەتكىزۋ وتە ماڭىزدى بولماق. سوندىقتان كومپانيا باسشىلىعى جوبانى جۇزەگە اسىرۋشى رەتىندە ونىڭ ءمان-ماڭىزىن ءتۇسىندىرۋ ءۇشىن قانداي دا ءبىر اڭگىمە الاڭىن ءتيىمدى پايدالانۋعا مۇددەلى. 2014 جىلى 6 قازاندا ەلباسى ن.نازارباەۆ قمگ-ءنىڭ نەگىزگى اكتسيونەرى «سامۇرىق-قازىنا» كومپانيالار توبىندا ترانسفورماتسيا باعدارلاماسى باستالعانى تۋرالى مالىمدەدى. ونى جۇزەگە اسىرۋدىڭ باستى ماقساتى كومپانيانىڭ قارجى جاعدايىن جاقسارتۋعا باعىتتالعان, – دەدى ول.
بايانداماشى كورپوراتيۆتىك باسقارۋدىڭ تيىمدىلىگىن ارتتىرۋعا, ءوندىرىستى باسقارۋدىڭ جاڭا جولدارىنا, كومپانيا جۇمىسىنىڭ ماڭىزدى باعىتتارىنا, اكتيۆتەر باعاسىنا توقتالدى. ول, سونداي-اق ترانسفورماتسيالاۋ باعدارلاماسىنىڭ نەگىزگى
بۋىنى ەڭ الدىمەن ادامدار ەكەنىن اتاپ ءوتتى.
سەرىك ابدەنوۆتىڭ ايتۋىنشا, قمگ كومپانيالار توبىندا 90 مىڭ ادام ەڭبەك ەتەدى. ولار جىلىنا ەلىمىز بويىنشا وندىرىلەتىن مۇنايدىڭ 22 ميلليون تونناسىن قامتاماسىز ەتەدى, مۇناي مەن گازدىڭ 60 پايىزىن ماگيسترالدى قۇبىرمەن جانە باسقا جولدارمەن تاسىمالدايدى. مۇنايدى وڭدەۋ – تولىقتاي وسى اكتسيونەرلىك قوعامنىڭ ەنشىسىندە. كومپانيانىڭ مۇناي سەرۆيستىك كاسىپورىندارى بار. ولار جاڭا كەن ورىندارىنىڭ جۇمىسىن قامتاماسىز ەتەدى, بۇرعىلاۋ ءۇشىن جاڭا ۇڭعىمالاردى قۇرادى, بارلاۋ جۇمىستارىن ءجۇرگىزەدى. وتكەن جىلى كومپانيا بيۋدجەتكە 840 ميلليارد تەڭگە اۋداردى, ۇلتتىق قورعا دا تيىسىنشە تولەمدەر جاسادى.
ۆيتسە-پرەزيدەنت بۇدان ءارى قمگ-ءنىڭ وپەراتسيالىق شىعىندارىنا, جالپى شارۋاشىلىق قىزمەتىنە تەرەڭىرەك توقتالدى. بۇل باعىتتا ەڭبەك ونىمدىلىگىن ارتتىرۋ, وندىرىستىك ۇردىستەردى, ەڭبەك جانە تۇرمىستىق جاعدايدى جاقسارتۋعا باعىت ۇستالاتىنىن جەتكىزدى. ول ءۇشىن ءوندىرىستى جەتىلدىرۋ, دامۋدى قامتاماسىز ەتۋ قاجەت. بۇعان كومپانيانىڭ مۇمكىندىگى مول جەتەدى.
سەرىك ابدەنوۆ ترانسفورماتسيالاۋ باعدارلاماسىنىڭ ءمانىن اشا كەلىپ, جۇرگىزىلىپ جاتقان قايتا قۇرۋدىڭ كومپانيانىڭ العا قويعان ستراتەگيالىق مىندەتتەرىنەن باستاپ كادرلاردى دايارلاۋ جانە ىرىكتەپ الۋعا دەيىنگى بارلىق بۋىنىن قامتيتىنىن اتاپ ءوتتى. بۇل باعدارلامادا تەك ءوندىرىستىك جاعدايلار عانا ەمەس, ۇجىمداعى تۇراقتىلىق پەن ۇيىمشىلدىققا نەگىزدەلگەن الەۋمەتتىك ماسەلەلەردى شەشۋ قاراستىرىلعان.
جالپى ترانسفورماتسيالاۋ باعدارلاماسىندا تاياۋ جانە ۇزاق مەرزىمدى دامۋ ستراتەگياسى, بيزنەستىڭ باسىم باعىتتارى, ۇردىستىك جانە وپەراتسيالىق مودەلدەر, ۇيىمداستىرۋ قۇرىلىمى, قىزمەتكەرلەرگە قويىلاتىن تالاپتار ويلاستىرىلعان. ولاردى جۇزەگە اسىرۋ ەڭبەك ونىمدىلىگىن ارتتىرۋعا, جاڭا تەحنولوگيالاردى يگەرۋگە, سىرتقى نارىققا بۇرىنعىدان گورى كەڭ كولەمدە شىعۋعا العىشارت جاسايدى. سەرىك ابدەنوۆ ترانسفورماتسيالاۋ باعدارلاماسىنىڭ كومپانيا جۇمىسىن جاڭا دەڭگەيگە كوتەرۋگە سەرپىن بەرەتىنىن, بۇل باعىتتا رەزەرۆتەردىڭ ءالى دە مول ەكەنىن تىلگە تيەك ەتە كەلىپ, كومپانيانىڭ قازىرگى جاعدايىن شەتەلدىك ارىپتەستەرىنىڭ دەڭگەيىمەن سالىستىرا اڭگىمەلەۋى تارتىمدى شىقتى. قازىر قمگ جاڭا كەن ورىندارىن بارلاۋ, مۇناي ءوندىرۋ, تاسىمالداۋ جانە وڭدەۋ بويىنشا الەمدەگى جەتەكشى 50 كومپانيانىڭ قاتارىنا كىرەدى. مۇندا بولاشاقتا جۇمىس تيىمدىلىگىن ارتتىرا وتىرىپ, وتىزدىققا ەنۋ كوزدەلۋدە.
بۇگىنگى تاڭدا كومپانيانىڭ ەل اۋماعىندا 73 وندىرىستىك اكتيۆى بار. سونداي-اق, شەتەلدىك ارىپتەستەرىمەن بىرلەسىپ باسقاراتىن اكتيۆتەرى دە جەتەرلىك. ماتەريالدىق-تەحنيكالىق بازاسى جاقسى, 15 ءوندىرۋ كاسىپورىنى, 20 كەن بارلاۋ ورنى, 8 مۇناي سەرۆيستىك كومپانياسى, 11 مۇناي تاسىمالداۋ, 9 گاز تاسىمالداۋ, 3 مۇناي وڭدەۋ زاۋىتى, اۆتوكولىككە ماي قۇيۋ ستانسالارى جانە باسقا بولىمشەلەرى بار. سوندىقتان, تاڭداپ الىنعان بەس باعىت – مۇناي جانە گاز ءوندىرۋ, وڭدەۋ ماركەتينگى, مۇناي-گاز تاسىمالداۋ, مۇناي سەرۆيستىك قىزمەت بويىنشا دامۋ كوزدەلۋدە. سەرىك ابدەنوۆ بيزنەستىڭ اركىمنەن نەنى تالاپ ەتەتىنىن, كومپانيا الدىنا قانداي باسىمدىقتار قويىپ وتىرعانىن العا تارتتى.
ودان كەيىن ءسوز العان «قازمۇنايگاز» ۇك» اق جاستار كەڭەسىنىڭ توراعاسى سايات قايگەلدينوۆ كەڭەس جۇمىسىن بايانداي كەلىپ, الدا تۇرعان مىندەتتەردى ايتتى, جاستاردىڭ كاسىبي ءوسۋى, يننوۆاتسيالىق باستامالار, الەۋمەتتىك قولداۋعا توقتالدى. جاستار كەڭەسىنىڭ مارتەبەسىن كوتەرىپ, ونىڭ ۇمىتكەرلەردى جۇمىسقا الۋ, كادرلىق رەزەرۆتى انىقتاۋ بويىنشا ىرىكتەۋ كونكۋرستارىنا قاتىسۋى تۋرالى ويلارىن ورتاعا سالدى. ول ونەرتاپقىشتار كلۋبى تۋرالى ايتا كەلىپ, قمگ-دە قۇرىلعان ونەرتاپقىشتىق ۇسىنىستاردىڭ يدەيالار بانكى جاستار باستامالارىنا سەرپىن بەرىپ قانا قويماي, ولاردىڭ يننوۆاتسيالىق قىزمەتىن كەڭەيتە تۇسەتىنىن اتاپ ءوتتى.
سلەتتە «پىكىرتالاس كلۋبى», «برەينگ-رينگ» زياتكەرلىك ويىنى» جانە «English club» جوبالارىنىڭ تۇساۋكەسەرى بولدى.
– ءبىزدىڭ كاسىپورىندا بەلسەندى جاستار كۇشىمەن 2013 جىلدان بەرى «بابالار جۇرگەن ىزبەنەن» جوباسى جۇزەگە اسىرىلۋدا. جىل سايىن ارناۋلى ەكسپەديتسيا جاساقتالىپ, تۋعان ەلىمىزدىڭ تابيعي-تاريحي ورىندارىندا بولادى. ەكسپەديتسيا «اقسۋ – كەندىرلى», «قاراعان بوساعا» جانە باسقا تاريحي-تابيعي ورىنداردا بولىپ قايتتى. بۇل جوبانىڭ تانىمدىق-تاعىلىمدىق ونەگەسى مول, – دەيدى «وزەنمۇنايگاز» اق جاستار كەڭەسىنىڭ توراعاسى بايىمبەت باۋىرجان.
مۇنايشى جاستاردىڭ القالى جيىنىندا كاسىبي ءوزىن-ءوزى دامىتۋ, قىزمەت بابىندا ءوسۋدى جوسپارلاۋ ماسەلەلەرى ءسوز بولدى. پانەلدىك سەسسيالاردىڭ بىرىندە قمگ كومپانيالار توبىندا كاسىپتىك ءبىلىم بەرۋدىڭ
دۋالدى جۇيەسىن ەنگىزۋ جولىمەن جاستاردى دايارلاۋ ءماسەلەلەرى تالقىلاندى. تىكەلەي جۇمىس ورنىندا وقىتۋ باعدارلاماسى الدىڭعى قاتارلى, ءتيىمدى جانە الەمدىك تاجىريبەدە دالەلدەنگەن باعدارلاما بولىپ تابىلادى. «ەمبىمۇنايگاز» اق, «پاۆلودار مۇناي-حيميا زاۋىتى» جشس جانە چەليابى قۇبىر پروكات زاۋىتى ماماندارى وقىتۋدىڭ وسى جۇيەسىن ەنگىزۋ جانە وقۋ سىناق الاڭىن قۇرۋ تۋرالى تاجىريبەلەرىمەن وي ءبولىستى.
«پاۆلودار مۇناي-حيميا زاۋىتى» جشس-دە وقىتۋدىڭ دۋالدى جۇيەسى 2013 جىلدان بەرى ەنگىزىلگەن. وسى كەزەڭدە وندا 83 ستۋدەنت ءبىلىم الىپ, ونىڭ 53-ءى جۇمىسقا ورنالاسقان. قازىر 50 ادام ءوندىرىس جانە وقۋ جۇيەسى بويىنشا وقىپ ءجۇر. ال, «ەمبىمۇنايگاز» اق دۋالدى وقىتۋ جۇيەسىن بىلتىردان بەرى پايدالانۋدا. باستاپقى كەزەڭدە اتىراۋ مۇناي جانە گاز ينستيتۋتى مەن «APEK Petrotechnic»-ءتىڭ 39 ءۇشىنشى جانە ءتورتىنشى كۋرس ستۋدەنتى قاتىسقان.
سلەت اياسىندا «اتامەكەن» ۇلتتىق كاسىپكەرلەر پالاتاسى جانە نەمىس قولونەرشىلەر پالاتاسى ۇسىنعان ءوندىرىس شەبەرلەرى مەن تالىمگەرلەرىن وقىتۋ جوباسى بويىنشا جۇمىستار تالقىلاندى. 2016 جىلى «ەمبىمۇنايگاز» اق-تىڭ 6 مامانى تالىمگەرلەر ءۇشىن «كاسىبي جانە ەڭبەك پەداگوگيكاسى» تاقىرىبىندا ءۇش مودۋلدى وقۋدان وتكەن. جاستار جيى-
نىندا ولارعا «تالىمگەر» ءمارتەبەسىن بەرۋ تۋرالى سەرتيفيكاتتار تاپسىرىلدى.
سلەت اياسىندا جاستاردىڭ وبلىس اكىمى بەردىبەك ساپارباەۆپەن كەزدەسۋى وتە قىزعىلىقتى ءوتتى. ءوڭىر باسشىسىمەن جاس مۇنايشىلار اشىق اڭگىمە-ءدۇكەن قۇردى. جاستارمەن اشىق ءاڭگىمەدە بەردىبەك ماشبەك ۇلى ەل ەكونوميكاسى ءۇشىن مۇناي-گاز سالاسىنىڭ ماڭىزى زور ەكەنىن, مۇناي ءونىمىنىڭ باعاسى تومەن ەكەنىنە قاراماستان, ەلباسىنىڭ ساليقالى ساياساتىنىڭ ارقاسىندا ەلىمىز ەكونوميكالىق قيىندىقتان شىعا بىلگەنىن ايتتى.
– تاۋەلسىزدىك العان كۇننەن باستاپ ەلباسى جاستار ساياساتىنا ەرەكشە نازار اۋداردى. مەملەكەتتىك ساياساتتىڭ نەگىزگى باعىتى جاستار ماسەلەسىن شەشۋ, ولاردىڭ الەۋەتىن كوتەرۋگە باعىتتالدى. حالىقارالىق ستاندارتتارعا ساي ءبىلىم الۋ ءۇشىن بارلىق جاعداي جاسالدى. مەملەكەت باسشىسىنىڭ باستاماسىمەن جيىرما جىل بۇرىن «بولاشاق» باعدارلاماسى قولعا الىنىپ, ونى وقىپ كەلگەن جاستار قازىر ەل ەكونوميكاسىن كوتەرۋگە اتسالىسىپ ءجۇر. سىزدەر قۋاتتى, اقىلدى, تالانتتى جاستارسىزدار. قازىر ءسىزدەردىڭ قاي سالادا بولسىن تىڭ يدەيالاردى ىسكە اسىرۋعا مول مۇمكىندىكتەرىڭىز بار. مەملەكەت قاشاندا جاستاردىڭ باستاماسىن قولدايدى, – دەدى ءوڭىر باسشىسى.
«قازمۇنايگاز» ۇك» اق ۆيتسە-پرەزيدەنتى سەرىك ابدەنوۆ فورۋمدى قورىتىندىلاي كەلە, جاستاردى كومپانيانىڭ دامۋىنا, وندىرىستىك كورسەتكىشتەردى كوتەرۋگە, يننوۆاتسيالار مەن جاڭا تەحنولوگيالاردى ەنگىزۋگە قاتىسۋعا شاقىردى. جيىن بارىسىندا بەلسەندى جاستار وبلىس اكىمدىگى مەن كومپانيانىڭ العىس حاتتارىمەن ماراپاتتالدى.
سلەتتىڭ ەكىنشى كۇنى جاستار قازاقستان رەسپۋبليكاسىنىڭ تۇڭعىش پرەزيدەنتى ن.نازارباەۆ اتىنداعى ورتالىق ساياباقتا اعاش كوشەتتە-
ءرىن وتىرعىزدى, وسىندا ۇيىمداستىرىلعان فلەش-موبقا قاتىستى. مۇنايشى جاستاردىڭ ەكى كۇنگە سوزىلعان القالى جيىنى «قازمۇنايگاز» ۇك» اق كومپانيالار توبى جاس قىزمەتكەرلەرىنىڭ كۇشىمەن ۇيىمداستىرىلعان كونتسەرتتىك باعدارلامامەن اياقتالدى.
ساتىبالدى ءساۋىرباي,
«ەگەمەن قازاقستان»
اقتوبە