العاش رەت مۋزىكا تىلىندە «سويلەدى»
استانا مەملەكەتتىك اكادەميالىق فيلارمونياسىنىڭ قازاق حالىق اسپاپتارى وركەسترى «الپامىس باتىر» مۋزىكالىق تەاترلاندىرىلعان كونتسەرتىن ساحناعا شىعارىپ, كورەرمەندەردىڭ ىستىق ىقىلاسىنا بولەندى. استانا كونتسەرت زالىندا العاش رەت باستان-اياق ورىندالعان كولەمدى مۋزىكالىق تۋىندىنىڭ اۆتورى – جاس كومپوزيتور ارمان جايىم.
بۇل كونتسەرت اتالعان ونەر ۇجىمىنىڭ ەل تاۋەلسىزدىگىنىڭ 25 جىلدىعى قارساڭىندا كورەرمەن نازارىنا ۇسىنعان ايرىقشا تارتۋى بولدى. ءبىر ساعاتتىڭ بەدەرىندە ورىندالعان شىعارما تەاترلاندىرىلعان كورىنىستەرىمەن, ياعني, رولدە ويناۋشىلار مەن مۋزىكانىڭ ءوزارا ۇندەستىگىمەن ەرەكشەلەندى.
قيلى كەزەڭنىڭ قاسىرەتتەرى, اۋمالى-توكپەلى زاماننىڭ تراگەديالىق كورىنىستەرى, جاۋگەرشىلىك تۇسىنداعى قازاق حالقىنىڭ باستان كەشكەن قيىندىقتارى, الپامىس باتىردىڭ جاۋعا قارسى كۇرەسى – ءبارى-ءبارى مۋزىكا تىلىمەن باياندالدى. ءارى سوعان وراي اتالعان تۋىندىنىڭ كەيىپكەرلەرىن كورەرمەندەر ساحنادان كورە ءبىلدى.
ءبىر ايتا كەتەرلىك جايت, قازاق حالىق اسپاپتارى وركەسترىنىڭ قۇرامىندا كاسىبي اكتەرلەر بولماعانمەن, «الپامىس باتىر» جىرىنداعى كەيىپكەرلەردى ونەر ۇجىمىنداعى انشىلەر مەن بيشىلەر ساحناعا لايىقتى شىعارا ءبىلدى. اتاپ ايتقاندا, جىراۋدىڭ ءرولىن – نۇراي تاناباەۆ, الپامىستى – ايان وماروۆ, گۇلبارشىندى – لاۋرا مينەەۆا, تايشىق حاندى – دانيار مۇقان, مىستان كەمپىردى – ينديرا عابدراحمانوۆا, كەيقۋاتتى – ولجاس مىرزاباەۆ سومدادى. بيشىلەر ونەرىن «شالقىما» بي ءانسامبلى ۇسىندى.
قازاق حالىق اسپاپتارى وركەسترىنە وسى ۇجىمنىڭ كوركەمدىك جەتەكشىسى ءارى باس ديريجەرى, قر ەڭبەك سىڭىرگەن قايراتكەرى, پروفەسسور ايتقالي جايىموۆ ديريجەرلىك جاسادى.
كونتسەرت سوڭىندا ساحناعا كوتەرىلگەن پارلامەنت ءماجىلىسىنىڭ دەپۋتاتى اباي تاسبولاتوۆ: «تاريحسىز ەل بولمايدى. بۇگىن اسا كۇردەلى شىعارمانى ساحناعا شىعارعاندارىڭىزعا ءبىزدەر وتە تاڭعالدىق ءارى ريزا بولدىق. ءجۇرەكتى تەبىرەنتكەن, كورگەن ادامداردىڭ ەسىندە قالاتىن ونەر كەشىن تاماشالادىق. جاستاردىڭ بويىنا پاتريوتتىق سەزىمدى قالىپتاستىراتىن ءدال وسىنداي شىعارمالار. مۇنداي كونتسەرتتەردى حالىققا ءجيى كورسەتۋ كەرەك. قيىن شىعارمانى ۇسىنعان وركەستر ۇجىمىنا كورەرمەن رەتىندە ءبىزدەر باسىمىزدى يەمىز», – دەپ ريزاشىلىعىن ءبىلدىردى.
تارتىمدى شىققان تۋىندىنىڭ باس رەجيسسەرى استانا مەملەكەتتىك اكادەميالىق فيلارمونياسىنىڭ كوركەمدىك جەتەكشىسى جانە باس ديرەكتورى, قازاقستاننىڭ ەڭبەك سىڭىرگەن قايراتكەرى ساكەن ءابدىراحمانوۆ, رەجيسسەرى اسحات قوشاەۆ.
ايباتىر سەيتاق
استانا