بۇگىن «ەگەمەن قازاقستان» گازەتىنىڭ رەداكتسياسىندا جازۋشى ءابىش كەكىلباەۆتىڭ ماقالالارى جيناقتالعان جاڭا كىتاپتىڭ تۇساۋى كەسىلىپ, قالامگەردى ەسكە الۋعا ارنالعان دوڭگەلەك ۇستەل ءوتتى.
الاشتىڭ ابىزى ءابىش كەكىلباەۆ دۇنيە سالعالى دا جىل بولىپ قالدى. جاقسىنىڭ بارى بىلىنبەيدى, جوعى بىلىنەدى. سوڭىندا قالعان قالىڭ ەلى ورداداي ورنىن ويسىراتپاۋعا بارىن سالىپ-اق جاتىر. بايتاق قازاقيانىڭ باتىس پەن شىعىسى اراسىن ءابىش الەمىنە ءۇڭىلتىپ, ءابىش تەرەڭىنە بويلاتۋعا تالپىنعان نە ءبىر ايتۋلى شارالار وتۋدە. سونىڭ ءبىرى بۇگىن ەلىمىزدىڭ باس باسىلىمى «ەگەمەن قازاقستان» گازەتى تورىندە بولدى.
تىڭ باستاما. بۇدان بىلاي «ەگەمەن قازاقستان» كىتاپحاناسى سەرياسىمەن عاسىرلىق تاريحقا يە باسىلىمنىڭ بەتىندە جاريالانعان تۇلعالارىمىزدىڭ زامانا لەبى, ءداۋىر تىنىسىن ءدال باسقان, مازمۇن-ماعىناسى ۋاقىتتىڭ داۋىلى مەن جاۋىنىنا شايىلىپ كەتپەيتىن بىرەگەي شىعارمالارى جەكە كىتاپ بولىپ جارىققا شىعىپ وتىرماق. بۇل باستاما قازاقستاننىڭ حالىق جازۋشىسى, ەڭبەك ەرى, كەزىندە ءوزى دە «ەگەمەن قازاقستان» گازەتىندە باسشىسى بولىپ قىزمەت ەتكەن ءابىش كەكىلباەۆپەن باستالدى.
كەنجەعالي ساعاديەۆ, قويشىعارا سالعارا, قاجىعالي مۇحامبەتقالي, تولەن ابدىك, ساۋىتبەك ابدراحمانوۆ, نەسىپبەك ايت ۇلى, زەينوللا الشىنباەۆ سياقتى قابىرعالى قالامگەرلەر جانە ءابىش اعامىزدىڭ جارى كلارا اپامىز قاتىسقان بۇل جينالىس القا-قوتان وتىرىس, ەمەن-جارقىن اڭگىمە سيپاتىندا ءوربىدى. «ەگەمەن قازاقستان» گازەتىنىڭ باسشىسى دارحان قىدىرالى جيىلعان قاۋىمعا «ءداۋىر داۋىسى» دەپ اتالاتىن جاڭا كىتاپ جونىندە ءسوز باستادى. «ءبىز بۇل كىتاپقا ءابىش اعانىڭ باسقا جاققا شىقپاعان, 1990-2015 جىلدار ارالىعىندا تەك وسى «ەگەمەندە» جارىق كورگەن ماقالالارىن ەنگىزىپ وتىرمىز. وسى باسىلىم بەتتەرىنە مەملەكەتتىك ۇلكەن قىزمەتتەردى اتقارا ءجۇرىپ قولى قالت ەتكەندە جازعان 144 ماقالاسى جارىق كورگەن ەكەن. ولاردىڭ جالپى كولەمى 1500-گە جۋىق بەتتى قۇرادى. ءبىز سولاردىڭ اراسىنان ىرىكتەپ, وسى جيناقتى دايىندادىق» دەدى دارحان قىدىرالى.
ارى قاراي قالامگەرلەرگە ءسوز بەرىلدى. «كەيدە ءبىر شىعارماشىلىق يەسى تۋرالى ايتاردا «ەندى مۇنىڭ نەسىن» ايتام دەپ ويلانىپ قالاتىن كەزدەر بولادى, ال, ءابىش تۋرالى كيمەلەپ كەلگەن كوپ ويدىڭ قايسىسىنان باستارىڭدى بىلمەي ابدىراپ قالاسىڭ» دەگەن جازۋشى قاجىعالي مۇحامبەتقالي جازۋشىنىڭ ەنتسيكلوپەديالىق كەڭ ءبىلىمى جايىن ءسوز ەتتى. كەكىلباەۆتىڭ بىلىمدارلىعىنا كەڭىرەك توقتالعان ساۋىتبەك ءابدراحمانوۆ الەم ادەبيەتىنەن قازاق تىلىنە اۋدارۋ جونىندە ابىشپەن كەڭەسكەنى تۋرالى ەستەلىكتەر ايتا كەلىپ, «ءتىپتى, بۋنين قاليحان ىسقاقتىڭ وڭ جامباسىنا كەلەدى دەگەن سەكىلدى, قاي اۆتوردى كىمنىڭ اۋدارعانى وڭدى بولاتىنىنا دەيىن تاپتىشتەي ايتقاندا ەرىكسىز تاڭعالعان ەدىك» دەدى.
ال جازۋشى تولەن ابدىك بولسا كەكىلباەۆتىڭ كوركەم شىعارماداعى وزگەشە ورنى جايىندا ءسوز قوزعادى. «كەيدە ءتىپتى تاريحي تاقىرىپتار كەدەرگى بولعانداي كورىنەدى. وندا كوركەم شىعارماداعىداي ەركىندىك جوق قوي, تاريحتىڭ سورابىمەن جۇرەسىڭ. دەگەنمەن ونى دا ءابىش وزگەشە الىپ شىقتى» دەي كەلە, «ءابىشتى اۋليە دەدىك قوي, ول شىن اۋليە. ونىڭ اۋليەلىگى تازالىعىندا, كىسىلىگىندە» دەپ ونى ادەمى ەستەلىكتەرمەن كومكەردى.
قويشىعارا سالعارا اقسەلەۋ سەيدىمبەك ەكەۋىنىڭ «قازاققا وسى كەزدە تانىمدىق دۇنيە كەرەك» دەپ كوركەم ادەبيەتتى قويا تۇرىپ تاريحي, تانىمدىق دۇنيەلەگە قالام تەربەگەنى, سول ورايدا وزىنە ءابىشتىڭ جول اشقانى تۋرالى ەستەلىك ايتتى. «ءابىش «مالىم جانىمنىڭ, جانىم ارىمنىڭ ساداعاسى» دەيتىن دەگدار حالىقتىڭ قالاي قاراقان باسىنىڭ قامىنان اسپايتىن قۇل-قۇتانعا اينالعانىن ىشتەن كوردى, ىشتەن ءبىلدى. ونىڭ حالىقتىق قاسيەتىنە قايتۋىنا بۇكىل كۇش-جىگەرىن ارنادى» دەپ ءتۇيدى.
نەسىپبەك ايت ۇلى اعامىز ابىشكە ارناپ قىسقا عانا ولەڭ وقىدى. قاسىندا وتىرعان تولەن اعامىز «سەرىك تۇرعىنبەك ءۇش شۋماق ولەڭ وقىردىڭ الدىندا جارتى ساعات سويلەپ الۋشى ەدى, سەن جاقسى جىگىت ەكەنسىڭ» دەپ ازىلدەپ جۇرتتى دۋ كۇلدىرىپ الدى.
ءيا, ءبارىنىڭ دە قازاقتىڭ ابىشىنە ايتارى تاۋسىلار ەمەس. اعىلىپ ايتىپ جاتىر. كەنجەعالي ساعاديەۆ پەن كلارا اپامىز كىتاپتىڭ تۇساۋكەسەر ىرىمىن جاسادى. وسى ورايدا گازەت باسشىسى «ەگەمەن قازاقستان» گازەتىنىڭ ءابىش كەكىلباەۆ اتىنداعى شاكىرتاقى تاعايىنداعانىن جەتكىزدى.
كلارا اپامىز «ءابىش دۇنيەدەن وتكەنمەن ەل-جۇرتى, ازاماتتار وسىنداي ءىس-شارا اتقارىپ جاتقاندا جالعىزسىرامايدى ەكەنسىڭ» دەگەن جۇرەكجاردى ءسوزىن ايتتى.
وتىرىس سوڭىندا قوناقتار «ەگەمەن قازاقستاننىڭ» جاڭا كىتاپحاناسىندا كلاسسيك جازۋشىنىڭ مۇراسىنا ارنالعان ءمۇيىستى تاماشالاپ تارقاستى.
ۇلاربەك نۇرعالىم ۇلى, «ەگەمەن قازاقستان»