كۇن باتارەيالارىن ورناتپاق
فرانتسۋزدىڭ Total مۇناي-گاز كومپانياسى تاياۋداعى 5 جىلدا ءوز يەلىگىندەگى 5 مىڭ جانار-جاعارماي ستانساسىنا كۇن باتارەيالارىن ورناتپاق. كومپانيا تاراتقان اقپاراتقا سايكەس, جوبانىڭ جالپى قۇنى 300 ميلليون دوللار تۇرادى ەكەن. مامانداردىڭ ەسەپتەۋىنشە, ورناتىلاتىن كۇن باتارەيالارى ارقىلى وندىرىلەتىن ەلەكتر قۋاتى 200 مىڭ تۇرعىنى بار قالانى تولىق قامتاماسىز ەتە الاتىنداي قۋاتقا تەڭ. وسى جاڭالىق ارقىلى Total ەلەكتر قۋاتىنا كەتەتىن شىعىنداردى جىل سايىن 40 ميلليون دوللارعا ۇنەمدەمەك. Le Figaro باسىلىمىنىڭ حابارلاۋىنشا, قازىرگى ۋاقىتتا Total-دىڭ الەمنىڭ ءار تۇپكىرىندە ورنالاسقان 16 مىڭ جانار-جاعارماي ستانساسى بار. سونىڭ 5 مىڭىنا كۇن باتارەيالارى ورناتىلماق. بۇل ستانسالاردىڭ 800-ءى فرانتسيانىڭ وزىندە ورنالاسسا, 2,5 مىڭى افريكا قۇرلىعىندا ەكەن.كەرەمەت كوندەنساتور
اقش-تىڭ ورتالىق فلوريدا ۋنيۆەرسيتەتىنىڭ عالىمدارى الداعى ۋاقىتتا ۇيالى تەلەفوندار, ەلەكتروموبيلدەر جانە باسا دا ەلەكتروندى تەحنيكالارعا ورناتىلىپ جاتقان باتارەيالار مەن اككۋمۋلياتورلاردى اۋىستىرا الاتىنداي كوندەنساتورلار جاساپ شىعارۋعا كىرىستى. بۇل جاڭا اككۋمۋلياتوردىڭ كەرەمەتتىگى سوندا, ول 1 سەكۋندتىڭ ىشىندە قۋاتتالىپ, اپتا بويى جۇمىس ىستەي الاتىنداي قابىلەتكە يە ەكەن. بىلايشا ايتقاندا, كادىمگى ليتي-يوندى اككۋمۋلياتورلارعا قاراعاندا, 20 ەسە ارتىق جۇمىس ىستەي الادى. ونىڭ ۇستىنە كادىمگى باتارەيالار 1,5 مىڭ قۋاتتاۋ تسيكلىنا جاراسا, جاڭا بالاما 30 مىڭ قۋاتتاۋ تسيكلىنا توتەپ بەرە الادى ەكەن. بۇل جاڭا اككۋمۋلياتوردىڭ نەگىزىن ءوز بەتشەسىندە ەلەكترونداردىڭ ۇلكەن سانىن ساقتاي بىلۋگە قابىلەتتى گرافەن قۇرايدى. ونىڭ ۇستىنە مۇنداعى ەلەكتر قۋاتى حيميالىق رەاكتسيالار ارقىلى جۇمىس ىستەيتىن ليتي-يوندى اككۋمۋلياتورعا قاراعاندا مۇلدەم باسقا قاعيداتتار بويىنشا ارەكەت ەتەتىن كورىنەدى. قازىرگى نانوتەحنولوگيالار جەتىستىگى ناتيجەسىندە پايدا بولعان بۇل جاڭا اككۋمۋلياتوردىڭ كولەمى مەن سالماعى دا ءداستۇرلى بالامالاردان الدەقايدا شاعىن كورىنەدى.جەل قۋاتىن پايدالانادى
Microsoft كومپانياسى اقش-تىڭ كانزاس جانە ۆايومينگ شتاتتارىنداعى جەل ەلەكتر ستانسالارىنان 237 مەگاۆاتت ەلەكتر قۋاتىن ساتىپ الۋ جونىندە كەلىسىم جاسادى. ازىرگە كەلىسىمنىڭ قارجىلىق كولەمى قۇپيا ۇستالۋدا. دەگەنمەن, Microsoft-تىڭ باس زاڭ كەڭەسشىسى برەد ءسميدتىڭ مالىمدەۋىنشە, جىل سوڭىنا تامان كومپانيانىڭ وندىرىستىك ورتالىقتارىندا پايدالاناتىن ەلەكتر قۋاتىنىڭ 44 پايىزى جەل مەن كۇن جانە سۋ كوزدەرى ارقىلى الىناتىن بولادى. ال ەندى 2 جىلدان كەيىن بۇل كورسەتكىش 50 پايىزعا دەيىن جەتەدى. قازىرگى كۇنى Microsoft 20 مەگاۆاتت كۇن جانە 285 مەگاۆاتت جەل ەنەرگياسىن پايدالانۋ جونىندە كەلىسىم جاساسقان. Bloomberg New Energy Finance باسىلىمىنىڭ بولجامى بويىنشا, 50-گە جۋىق امەريكالىق كومپانيا 2025 جىلعا دەيىن جالپى جيىنتىعى 17,4 گيگاۆاتت قۋاتتى جەل مەن كۇن ەنەرگيالارى ارقىلى الۋ ءجونىندە كەلىسىمدەر جاساساتىن بولادى. مۇنىڭ ءوزى جاڭعىرمالى قۋات كوزدەرىنە يەك ارتۋ الداعى ۋاقىتتا كۇشەيە تۇسەتىنىن بىلدىرەدى.جەل ەنەرگياسى قوندىرعىلارىن شىعارماق
باتىس قازاقستان وبلىسىنداعى «باتىسەنەرگوپروم» جشس قۋاتتىلىعى 2 كۆت-عا دەيىن جەتەتىن جەل ەنەرگياسى قوندىرعىلارىن شىعارۋ ءىسىن ونەركاسىپتىك جەلىگە كوشىرمەك. جەل قۋاتىن وندىرۋگە لايىقتالعان بۇل قۇرىلعى شوپاندار مەكەندەرى مەن ساياجايلاردى ەنەرگيامەن قامتاماسىز ەتۋگە ارنالعان. سونىمەن قاتار, كاسىپورىن بازاسىندا كۇن قۋاتىن وندىرەتىن قۇرالدار شىعارۋ جونىندە جۇمىستار جۇرگىزىلىپ جاتىر. ازىرگە سىناق نەگىزىندە شىعارىلعان كۇن ەنەرگياسى جۇيەسى ۇستىمىزدەگى جىلى اقجايىق اۋدانىنداعى «مۇقاس» شارۋا قوجالىعىنىڭ وندىرىستىك بازاسىندا جۇمىس ىستەپ تۇر ەكەن. سۇڭعات ءالىپباي, «ەگەمەن قازاقستان»