«دونالد ترامپ 16 مامىر كۇنى اق ۇيدە تۇركيا پرەزيدەنتى رەدجەپ تايپ ەردوعاندى قابىلدايدى. مەملەكەتتەر باسشىلارى ەكىجاقتى بايلانىستى ودان ءارى نىعايتۋ جانە تەرروريزمنىڭ كەز-كەلگەن كورىنىستەرىمەن كۇرەسۋ جولدارىن تالقىلايدى», – دەلىنگەن حابارلامادا. الداعى كەزدەسۋدە ۆاشينگتوننىڭ سيرياداعى كۇرد قۇرىلىمدارىن قارۋ-جاراقپەن قامتاماسىز ەتۋ تۋرالى شەشىمى تالقىلانادى دەپ كۇتىلۋدە. 10 مامىر كۇنى بريفينگتە Inherent Resolve انتيتەررورلىق وپەراتسيالار شتابىنىڭ رەسمي وكىلى, اقش اسكەري-اۋە كۇشتەرىنىڭ پولكوۆنيگى دجون دورريان مالىمدەگەندەي, اقش راككا قالاسىن يشيم سودىرلارىنان بوساتۋ وپەراتسياسىنا قاتىسىپ جاتقان كۇردتەردىڭ حالىقتىق ءوزىن-ءوزى قورعاۋ جاساقتارىنا بەلگىلى مولشەردە قارۋ-جاراق جەتكىزەدى. حالىقتىق ءوزىن-ءوزى قورعاۋ جاساقتارى كۇردتەردىڭ «دەموكراتيالىق وداق» پارتياسىنىڭ اسكەري قاناتى بولىپ تابىلادى. انكارا بۇل قۇرىلىمداردى تۇركيا بيلىگىمەن قارۋلى كۇرەس جۇرگىزىپ وتىرعان, ءارى بۇل ەلدە لاڭكەستىك ۇيىم سانالاتىن «كۇردىستان جۇمىسشىلار پارتياسىنىڭ» بۇتاعى دەپ ەسەپتەيدى. تۇركيا پرەمەر-ءمينيسترى بينالي يىلدىرىم امەريكا اكىمشىلىگىنىڭ كۇرد جاساقتارىنا كومەكتەسۋ تۋرالى شەشىمى ورەسكەل قاتەلىك ەكەنىن, مۇنداي ارەكەت اقش-تىڭ وزىنە تەرىس ىقپال ەتۋ مۇمكىندىگىن مالىمدەدى.
اقش پرەزيدەنتى دونالد ترامپ 16 مامىر كۇنى ۆاشينگتوندا تۇركيا باسشىسى رەدجەپ تايپ ەردوعاندى قابىلدايدى, دەپ حابارلادى اق ءۇيدىڭ ءباسپاسوز قىزمەتى.