2017 جىلدىڭ قاڭتار-ناۋرىز ايىندا قازاقستاندىق بانكتەردىڭ جيىنتىق پايداسى 82,4 ملرد تەڭگەنى قۇرادى, بۇل كورسەتكىش 2016 جىلدىڭ ءبىرىنشى توقسانىمەن سالىستىرعاندا 14,1%-عا تومەن. بۇل تۋرالى قازاقپارات حابارلايدى.
وتكەن جىلدىڭ ءبىرىنشى توقسانىندا قر ەكىنشى دەڭگەيلى بانكتەرىنىڭ (ەدب) ىشىندە 2 بانكتىڭ جالپى تابىسى 48,7%-دان كەلسە, ال 2017 جىلى تەك ءبىر بانك تازا جيىنتىق پايدانىڭ 42,4%-ىن قۇراپ وتىر.
2017 جىلدىڭ ءبىرىنشى توقسانىندا ەدب اراسىندا ەڭ كوپ تابىسقا حالىق بانكى يە بولدى. ونىڭ تابىسى 34,9 ملرد تەڭگەگە جەتىپ, قر ەدب جالپى تابىسىنىڭ 42,4%-ىن قۇرادى. وتكەن جىلى اتالمىش بانكتىڭ بۇل كورسەتكىشى 15,1 ملرد تەڭگەنى, ياعني قر ەدب جالپى تابىسىنىڭ 15,7%-ىن قۇراپ, 2 ورىندى ەنشىلەگەن ەدى.
بيىلعى كورسەتكىش بويىنشا 6,9 ملرد تەڭگەمەن كازكوم ەكىنشى ورىنعا شىقتى. بۇل كورسەتكىش وتكەن جىلمەن سالىستىرعاندا 78,2%-عا تومەن. كازكوم وتكەن جىلى 31,7 ملرد تەڭگەمەن كوش باستاعان بولاتىن.
ۇشتىكتى سيتيبانك تۇيىندەپ تۇر. ونىڭ پايداسى 2016 جىلدىڭ قاڭتار-ناۋرىزىمەن سالىستىرعاندا 17,8%-عا ازايىپ, 6,6 ملرد تەڭگەنى قۇرادى.