«حان شاتىر» – استاناداعى تاڭعاجايىپ عيماراتتاردىڭ ىشىندەگى ەڭ كورنەكتىسى عانا ەمەس, كورىكتىسى. ورتالىق ازياداعى ەڭ ۇلكەن ساۋدا ويىن-ساۋىق ورتالىعى رەتىندە ءوزىنىڭ ورنىن بەلگىلەگەن قايتالانباس نىسان.
شاھاردىڭ جاڭا ورتالىعىنىڭ ءدال كىندىگىندە ورنالاسقان اسەم عيمارات كوشپەلى قازاق حالقىنىڭ كوشپەلى تىرشىلىگىنەن حابار بەرىپ قانا قويماي, سول حالىقتىڭ ءوز قولىمەن تۇرعىزعان حان شاتىرلارىنىڭ تۇتاس ءبىر جيىنتىق كورىنىسى ىسپەتتى ەلەستەيدى. ەلوردانىڭ سول جاعالاۋىنان ورىن تەپكەن الىپ نىساننىڭ قۇرىلىسىن اعىلشىندىق Foster & Parthers فيرماسى جوبالاسا, تۇرىكتىڭ «سەمبول ينشاات» كومپانياسى ونى سوڭىنا دەيىن جەتكىزگەن. بىلتىرعى جىلى قالا كۇنىندە پايدالانۋعا بەرىلگەن, اينالاسى 4 جىلدىڭ ىشىندە بوي كوتەرگەن, بەرىك مونوليتتىك مەتالل قوندىرعىلارىنان تۇراتىن «شاتىردىڭ» بيىكتىگى 150 مەتردى, ال جالپى اۋماعى 133 شارشى مەتردى قۇرايدى.
ارقانىڭ قۇبىلمالى اۋا رايىنا بەيىمدەلىپ سالىنعان «حان شاتىر» ءبىر مەزەتتە 10 مىڭ ادامدى قابىلداپ, قىزمەت كورسەتە الاتىن مۇمكىندىككە يە. مۇندا كەلگەن كەز كەلگەن جان ءوزىنىڭ ۋاقىتىن كوڭىلدى ءارى قىزىقتى وتكىزە الادى. ءبىرىنشى قاباتتاعى 700 اۆتوكولىككە ارنالعان پاركينگ, ەكىنشى قاباتتا ورنالاسقان ساۋدا دۇكەندەرى, ءۇشىنشى قاباتتاعى 450 ورىندىق كينوزال, ءتورتىنشى قاباتتاعى فاست-فۋد, كىشى-گولف جانە بالالارعا ارنالعان ويىن الاڭدارى, وزگە قاباتتاردا ورنالاسقان تۇرىك مونشالارى مەن سۇلۋلىق سالوندارى, فيتنەس ورتالىعى, الەمنىڭ ءار قيىرىنىڭ وزىنە ءتان ءتىل ۇيىرەر دامىنەن اس ءمازىرىن دايىنداپ, كەلۋشىلەرگە ۇسىناتىن اسحانالار – ەلوردالىقتاردىڭ عانا ەمەس, شەتەلدەن كەلگەن تۋريستەردىڭ جايلى دەمالىسىنا كەپىل بولماق.
ال «حان شاتىردىڭ» شىرقاۋ بيىگىندەگى پالمالارمەن قورشالعان جابىق, قۇمدى جاعاجاي مەن حاۋىزدار تىنىعۋشىلاردى الەمنىڭ بەينە ءبىر تروپيكالىق مەكەندەرىندە, ماسەلەن, جەرورتا تەڭىزىندە دەمالىپ جۇرگەندەي اسەر قالدىرۋى مۇمكىن. مۇنداعى حاۋىزدىڭ جاعاجايىنا توسەلەتىن قۇم الىس ارالداردان جەتكىزىلىپتى. «شاتىردىڭ» ىشىندەگى ادەمى تابيعي لاندشافتتىڭ ءوزى كورگەن جاننىڭ كوزىن قۋانتپاي قويماسى انىق. ماسەلەن, تابيعاتتىڭ ءتۇرلى كليماتتىق بەلدەۋلەرىندە وسەتىن جاسىل جەلەكتى ەكزوتيكالىق وسىمدىكتەر شەتەلدىڭ تۇكپىر-تۇكپىرىنەن ارنايى اكەلىنگەن. ەلوردانىڭ تاڭعاجايىپ, قايتالانباس ارحيتەكتۋرالىق عيمارات-نىساندارىنىڭ كەلىستى كوشىن جالعاستىرعان «حان شاتىر» ايگىلى ديسكاۆەري تەلەارناسىنىڭ دا نازارىن وزىنە اۋداردى. بۇل تەلەارنا جاقىندا «الەمنىڭ تاڭعاجايىپ قۇرىلىسى» سەرياسى بويىنشا «الەمدەگى ەڭ الىپ شاتىر» دەگەن اتپەن دەرەكتى فيلم ءتۇسىرىپتى.
وندا «شاتىر» قۇرىلىسىنىڭ نەگىزى قالانعان ساتتەن باستاپ, ونىڭ ەڭسەلى عيماراتقا اينالۋ كەزەڭدەرىندە كەزدەسكەن قيىنشىلىقتار مەن قايتالانباس ساتتەر جان-جاقتى سۋرەتتەلگەن. ەگەر, جەر جاھاننىڭ ەڭ ايشىقتى دەگەن عيماراتتارىنىڭ ىشىنەن دۇنيەجۇزىنە تانىمال تەلەارنانىڭ نازارىنا ىلىككەن نىسان كەمدە-كەم ەكەنىن ەسكەرسەك, بۇل رەتتە نورمان فوستەردىڭ وزگەشە يدەياسىنان تۋىنداعان وزىق عيماراتتىڭ وزىندىك بەدەل-بيىگى مەن قايتالانباس ۇلگىسىن ايرىقشا اتاپ وتكەنىمىز ءجون. بۇگىندە «حان شاتىردى» سالۋداعى سونى تەحنولوگيالىق شەشىمدەر قازىرگى زامانعا ساي «قۇرىلىس عىلىمىنداعى» قايتالانباس نىسان رەتىندە باعالانۋدا. دەمەك, بۇل نىسان ۇزاق جىلدار بويى وزىق تەحنولوگيالىق ويدىڭ سيمۆولى ءارى ماقتانىشىنا اينالاتىنىنا سەنىم مول.
ءلايلا ەدىلقىزى.