قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆانىڭ تورايىمدىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى.
وتىرىستا قازاقستان پرەزيدەنتى ن.ءا.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا ايقىندالعان مىندەتتەرگە سايكەس «بولاشاق» حالىقارالىق ستيپەندياسىن ودان ءارى جەتىلدىرۋدىڭ تاسىلدەرى تالقىلاندى. مەملەكەتتىك حاتشى قويىلعان ماقساتتارعا قول جەتكىزۋ كوبىنەسە ءبىلىمنىڭ ساپالى بولۋىنا بايلانىستى ەكەنىن اتاپ ءوتتى. سوندىقتان باعدارلامانى جەتىلدىرۋ ەلدىڭ ادامي كاپيتالىنىڭ باسەكەگە قابىلەتتىلىگىن ارتتىرۋعا سەپتىگىن تيگىزەتىن بولادى.
گ.ابدىقالىقوۆا وسى ماقساتپەن قۇرامىنا مۇددەلى مەملەكەتتىك ورگانداردىڭ وكىلدەرى, قازىرگى زامانعى حالىقارالىق ءبىلىم بەرۋ سالاسىنىڭ ساراپشىلارى مەن «بولاشاق» باعدارلاماسىنىڭ تۇلەكتەرى ەنگەن جۇمىس توبى قۇرىلعانىن اتاپ ءوتتى. ول «قازاقستان-2050» ستراتەگياسىندا, «100 ناقتى قادام» ۇلت جوسپارىندا ايقىندالعان باسىمدىقتاردى ەسكەرە وتىرىپ, ۇسىنىستار ازىرلەدى.
وتىرىس بارىسىندا جۇمىس توبىنىڭ ۇسىنىستارى تالقىلاندى. «بولاشاق» ستيپەندياسىن ءۇش باعىتتا: 1) ستراتەگيالىق مىندەتتەرگە ءسايكەس ادامي كاپيتالدىڭ جاھاندىق باسەكەگە قابىلەتتىلىك جولىندا ستيپەنديانىڭ ءرولىن ايقىنداۋ جانە كۇشەيتۋ; 2) ستيپەندياتتاردى ىرىكتەۋدىڭ جاڭا قادامدارىن قالىپتاستىرۋ; 3) تۇلەكتەردىڭ الەۋەتىن جۇزەگە اسىرۋدى كۇشەيتۋدى ودان ءارى جەتىلدىرۋ كوزدەلۋدە.
ەلدىڭ ورنىقتى دامۋىن قامتاماسىز ەتۋ جانە ونىڭ ۇزاق مەرزىمدى پەرسپەكتيۆادا جاھاندىق باسەكەگە قابىلەتتىلىگىن ارتتىرۋ ماقساتىندا جاستاردىڭ جوعارى دەڭگەيلى ءبىلىم الۋىنا ينۆەستيتسيالار سالۋدى تالاپ ەتەدى. باعدارلامانى ىسكە اسىرۋ ءتاسىلدەرىن وڭتايلاندىرۋ ءۇمىتكەرلەردى ىرىكتەۋ جۇيەسى مەن ولارعا قويىلاتىن تالاپتاردى جەتىلدىرۋگە, ۇمىتكەرلەردىڭ اعىمداعى جانە كەلەشەكتەگى الەۋەتىن انىقتاۋعا, ءبىلىم بەرۋدىڭ باسىم باعىتتارىن انىقتاۋعا جانە شەتەلدىك جوعارى وقۋ ورىندارىنا قويىلاتىن تالاپتاردى قايتا قاراۋعا باعىتتالاتىن بولادى.
جۇمىس توبىنىڭ ۇسىنىستارى ودان ءارى پىسىقتالۋى ءۇشىن ەل ۇكىمەتىنە جولداندى.
جولدىباي بازار,
«ەگەمەن قازاقستان»