«باس جارىلىپ, كوز شىقسا» دا قىڭق دەمەي, جۇرە بەرەتىن قازاعىمنىڭ بۇگىنگى ۇرپاقتارى ۇساقتالىپ بارا جاتقان سياقتى. بۇلاي تاۋسىلا سويلەۋىمىزگە جەرگىلىكتى سوتتاردىڭ بىرىندە قىلمىستىق كودەكستىڭ 109-بابى بويىنشا جەكە ايىپتاۋ ءىسىنىڭ قارالۋى ەدى. «ە, كىم سوتقا جۇگىنبەي جاتىر» دەۋى ءمۇمكىن وقىرمانداردىڭ ءبىرى. بار گاپ كەزىندە مىڭجىلدىق تۋىستىقتىڭ بەلگىسى رەتىندە ءتوس قاعىستىرىپ, قۇيرىق-با-ۋىر جەسكەن قۇدالار اراسىنداعى ەرەگىستىڭ ابدەن شيرىعۋ شەگىنە جەتىپ, ءبىر-ءبىرىمەن سوتتاسۋىندا بولىپ وتىر.
اۋىلدا تۇراتىن جاس وتاۋ يەلەرى اراسىندا تۇتانعان كەزەكتى ايعاي-شۋدان كەيىن كەلىنشەكتىڭ شىدامى ابدەن تاۋسىلسا كەرەك, وبلىس ورتالىعىندا تۇراتىن اعالارىنا شاعىمدانادى. اراق ءىشىپ السا, «باتىرسىنىپ» كەتەتىن كۇيەۋىنىڭ شويىن جۇدىرىعى باتا تيگەن سىقىلدى. كوز جاسىن كولدەي ەتىپ, تەلەفون قوڭىراۋلاتقان قارىنداسىنىڭ ق ۇلىن داۋسى شىرقىراي شىقسا, «ۇرىستا – تۇرىس» بولۋشى ما ەدى؟ اشۋعا ەرىك بەرگەن قارۋلى جىگىتتەر كۇيەۋ بالالارىن دا, اراشاعا تۇسكەن قۇدالارىن دا ساباپ تاستايدى. ابدەن جەر بولعان قۇدالاردىڭ ءبىرى ار-نامىسىنىڭ اياققا تاپتالعانىن كولدەنەڭ تارتىپ, سوتقا تالاپ-ارىز تۇسىرەدى.
سوت كەزىندە قوس تاراپ ۋاعدالاسۋدىڭ ورنىنا ەسكى جارانىڭ اۋزىن قوپارىپ, ءبىر-ءبىرىن كىنالاۋعا تىرىسادى. تەكەتىرەس ۋشىعىپ بارا جاتقاننان كەيىن سوت ەكى جاقتى قازاقى جولمەن بىتىستىرمەك نيەتپەن اۋىل اقساقالدارىنىڭ ءباتۋالى بيلىگىنە جۇگىنەدى. «اتالى سوزگە ەر توقتار» دەگەن. ءجون سوزگە قۇلاق اسقان قۇدالار ءبىر-ءبىرىن كەشىرىپ, قايتادان ءتوس قاعىستىرادى.
ءبىر قىزىعى, ەرلى-زايىپتىلار سول كۇنى-اق تاتۋلاسقان كورىنەدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى