اقمولا وبلىسىندا "ەكو بولاشاق" əلەۋمەتتىك-ەكونوميكالىق جوباسى قولعا الىنباق, دەپ حابارلايدى "قازاقپارات" حاا ءتىلشىسى وڭىرلىك كوممۋنيكاتسيالار قىزمەتىنە سىلتەمە جاساپ.
اتالمىش جوبانى اعىمداعى جىلدىڭ 20 ناۋرىزىنان باستاپ, 8 ءساۋىرى ارالىعىندا قر ەنەرگەتيكا مينيسترلىگىنىڭ قولداۋىمەن "Agripp Business Group" (استانا) كومپانياسى قولعا الماق. بۇل ماكۋلاتۋرا جيناۋ بويىنشا جالپى رەسپۋبليكالىق اكتسياعا ەلىمىز بويىنشا 2 ميلليونعا جۋىق ورتا مەكتەپ وقۋشىلارىن تارتۋ جوسپارلانعان.
اكتسيا "ەكو بولاشاق" əلەۋمەتتىك-ەكونوميكالىق جوباسى شەڭبەرىندە قولعا الىنباق. تاپسىرىلعان ماكۋلاتۋرانىڭ əر كەلىسى ءۇشىن بەرىلەتىن 5 تەڭگە تسەرەبرالدى ءسال اۋرۋىمەن ناۋقاس بالالارعا كومەك رەتىندە "قاسيەتتى جول" قايىرىمدىلىق قورىنىڭ ەسەپ شوتىنا اۋدارىلادى. "ماكۋلاتۋرا جيناۋدان تۇسكەن تابىس ءبىلىم بەرۋ مەكەمەلەرىنە سپورتتىق ينۆەنتار, تۇقىم, تىڭايتقىش ساتىپ الۋعا جۇمسالاتىن بولادى. جوبانىڭ ەڭ باستى ماقساتى كەلەشەك ۇرپاقتى تابيعاتتى, قورشاعان ورتانى ايالاۋعا تاربيەلەپ, جاۋاپكەرشىلىككە ۇيرەتۋ", - دەيدى "ەكو بولاشاق" جوباسىن دامىتۋ جونىندەگى ديرەكتورى ستاس مەلنيكوۆ.
ايتا كەتۋ كەرەك, ۇيىمداستىرۋشىلار اتالعان جوبا ۇلتتىق اكتسياعا اينالىپ, جىل سايىن تۇراقتى تۇردە وتەتىنىنە سەنىم ارتۋدا.