جاسىم بىرازعا كەلسە دە, ەل ومىرىندەگى وقيعالارعا قۇلاق ءتۇرىپ وتىراتىن اداممىن. ەلمەن بىرگە جاساسىپ كەلەمىز. جاقسىلىقتى دا, قيىندىقتى دا سول حالىقپەن بىرگە كوردىك. ازىن-اۋلاق ەڭبەگىمدى دە سول حالىققا, ەلىمە ارناعانىمدى ماقتان دا ەتەمىن. بۇل ءار پەندەنىڭ باسىنداعى جاي. ادام ءوز ءومىرىنە الدىمەن ءوزى باعا بەرەدى. ءومىرى حالىققا قىزمەت ەتۋگە ارنالعان ادام وكىنبەيدى. سول حالىقتىڭ جاعدايى جاقسارا تۇسسە, ءوزىنىڭ ماقسات-مۇددەسى جالعاسقانداي, قۋانىشقا بولەنەدى. شۇكىرشىلىك دەيىك, مەنىڭ قۋاناتىن ساتتەرىم دە از ەمەس. ەلىمىزدە بولىپ جاتقان يگىلىكتى ىستەر قۋانتادى.
كەشە وتكەن سايلاۋ ماعان سونداي قۋانىش سىيلادى. ارينە, مەن نۇرسۇلتان ءابىش ۇلى نازارباەۆتىڭ جەڭىسكە جەتەتىنىنە ءبىر ءسات تە كۇمان كەلتىرگەن ەمەسپىن. بىرەۋلەر قالاسىن-قالاماسىن, حالىقتىڭ قالايتىنى – قازىرگى پرەزيدەنت. ونىڭ جەڭەتىنى نەگىزدى شىندىق ەدى. بۇل شىندىق – پرەزيدەنتتىڭ بۇگىنگە دەيىنگى قىزمەتى, ەلىمىزدىڭ جۇرگەن جولى. حالىق ونىڭ ءبارىن كورىپ وتىر. سودان دا حالىقتىڭ كىمدى تاڭدايتىنى الدىن الا ايقىن ەدى.
تاعى دا ايتاتىن ءبىر جاي بار. كوپشىلىك حالىق نۇرسۇلتان ءابىش ۇلى نازارباەۆتى بىلگىر باسشى, ۇلكەن قايراتكەر رەتىندە مىنە, شيرەك عاسىردان بەرى بىلەدى. ال مەن ونى ودان بۇرىنىراقتان بىلەمىن. سول باسشىلىققا كەلەر جولىن دا كورگەن اداممىن. نۇرەكەڭ باسشىلىققا كەزدەيسوق كەلگەن ادام ەمەس, ءوزىنىڭ ۇلكەن ۇيىمداستىرۋشىلىق قابىلەتىمەن, تۋا ءبىتتى ۇيىمداستىرۋشىلىق تالانتىمەن, باسشىلىق قىزمەتكە ءوزىنىڭ لايىقتى ەكەنىن دالەلدەپ كەلگەن ادام.
مەن نۇرسۇلتان ءابىش ۇلىن 60-شى جىلداردىڭ اياعىندا ول تەمىرتاۋدا قالالىق پارتيا كوميتەتىنىڭ حاتشىسى كەزىندە كوردىم. ساۋدا ءمينيسترى قىزمەتىندە جۇرگەن كەزىمدە سول قالاعا ىسساپارمەن بارىپ, سونداعى جاعدايمەن تانىسقان سوڭ, قالالىق كوميتەت حاتشىسىمەن پىكىر الماستىق. ول سوندا ماعان ءوزىنىڭ العىرلىعىمەن, بىلگىرلىگىمەن ايرىقشا اسەر قالدىردى. سوندا-اق ونىڭ ەل باسشىسى بولارىن ءبىلدىم دەسەم, اسىرا ايتقاندىق كورىنەر, بىراق ونىڭ قالايدا «جارىپ شىعاتىنىنا» سەنىمدى بولدىم. كوپ كەشىكپەي ول وبلىستىق پارتيا كوميتەتىنىڭ حاتشىلىعىنا سايلاندى. سوندا ءجۇرىپ ءوزىن كورسەتكەنىنەن كەيىن, قازاقستان كومپارتياسى ورتالىق كوميتەتىنە حاتشىلىققا سايلاندى.
بۇل ونىڭ رەسپۋبليكالىق دەڭگەيدەگى باسشىلىققا كوتەرىلگەن كەزى ەدى. مەن سوندا مينيسترلەر كەڭەسى توراعاسىنىڭ ورىنباسارى رەتىندە نۇرسۇلتان ءابىش ۇلىمەن قويانقولتىق ارالاسىپ جۇمىس ىستەدىم. ءبىراز ۋاقىت وتكەن سوڭ ول مينيسترلەر كەڭەسىنىڭ توراعاسى بولىپ تاعايىندالدى. بۇل قىزمەتتە ول ءوزىنىڭ باسشىلىق كەمەڭگەرلىگىن ايقىن كورسەتتى. سودان كەيىن ونىڭ ەل بيلىگىنىڭ باس تىزگىنىن ۇستاۋى زاڭدىلىقتاي ەدى.
وتكەن جىلى نۇرسۇلتان ءابىش ۇلى نازارباەۆتىڭ 70 جاسقا تولۋ قارساڭىندا «ەگەمەن قازاقستان» گازەتىندە «سامعاۋ» دەگەن مەنىمەن سۇحبات-ماقالا جاريالاندى. سوندا پرەزيدەنتىمىزدىڭ باسشىلىعىمەن وسىناۋ كەزەڭدە ەلىمىزدىڭ قولى جەتكەن تابىستارعا توقتالعانىم بار. باسقاسىن ايتپاعاندا, تىكەلەي نازارباەۆتىڭ ەتەنە ارالاسۋىمەن جۇزەگە اسقان, ونىڭ اتىن حالقىمىزدىڭ تاريحىندا ماڭگىلىككە جازاتىن ءۇش ماسەلەنى اتاپ كورسەتكەن ەدىم. ولار – بىرىنشىدەن, سارىارقانىڭ تورىنەن استانا دەيتىن اسەم قالا سالدىرعانى, ەكىنشىدەن, كەزىندە تاريحتىڭ تالكەگىمەن جەر شارىنا تارىداي شاشىراعان قانداستارىمىزدىڭ اتامەكەنگە ورالۋىنا بارلىق جاعداي جاساعانى, سونداي-اق, اتا-بابالارىمىزدان امان جەتكەن مەملەكەتتىك شەكارامىزدى بارلىق حالىقارالىق تالاپقا ساي ەتىپ بەكىتىپ بەرگەنى.
ارينە, نازارباەۆتىڭ اتىنا قاتىستىرا ايتاتىن باسقا دا تابىستار بارشىلىق قوي, بىراق بارىنە توقتالىپ جاتۋدى ءجون كورمەپ ەدىك. مىنە, سودان بەرى جىلعا جۋىق ۋاقىت ءوتتى. ال وسىناۋ قىسقا مەرزىمدە ەلىمىزدە قانشاما ايتۋلى وقيعالار بولدى. تاعى دا قىسقارتىپ, سونىڭ ەكەۋىنە عانا توقتالعىم كەلىپ وتىر. بىرىنشىدەن, بىلتىر ەلىمىز ەۋروپاداعى قاۋىپسىزدىك جانە ىنتىماقتاستىق ۇيىمىنا ءتوراعالىق ەتتى جانە وسى كەزەڭدە ون ءبىر جىلدان بەرى وتپەي كەلە جاتقان ەقىۇ-نىڭ ءسامميتىن وتكىزدى. وتكىزگەندە, جوعارى دەڭگەيدە, جۇرتتى تاڭداندىرىپ وتكىزدى.
مۇنداي ۇلكەن جاۋاپكەرشىلىكتى ءىستى جۇزەگە اسىرۋ قاي ەلدىڭ بولسىن ارمانى, اڭساعانى. كوپشىلىگىنىڭ قولى وعان جەتە بەرمەيدى. وسىناۋ ءىستى جۇزەگە اسىرۋ دا تىكەلەي نۇرسۇلتان نازارباەۆتىڭ ىسكەرلىگىنە, الەمدىك بەدەلىنە قاتىستى بولدى دەۋىمىز كەرەك. ەكىنشى وقيعا – ول ەلىمىزدە ويداعىداي وتكىزىلگەن قىسقى ازيادا ويىندارى. ءبىز ونى ۇيىمداستىرۋ دەڭگەيى جاعىنان جوعارى دارەجەدە وتكىزىپ قانا قويعانىمىز جوق, ونداعى جارىستاردا سپورتشىلارىمىز ۇزدىك ءناتيجەلەرگە جەتىپ, ەلىمىزدىڭ بەدەلىن اسپانعا كوتەردىك. تاعى دا وسىناۋ تابىستا ەل بيلىگى تىزگىنىن ۇستاپ وتىرعان ادامنىڭ ىسكەرلىگى مەن بەدەلى العا توسىلادى.
كەشەگى وتكەن سايلاۋدى ايتقاندا, كوڭىلگە وسىنداي جايلار ورالادى. جۇرتتىڭ نۇرسۇلتان نازارباەۆتى تاڭداۋى – زاڭدىلىق. الەمدىك دەڭگەيدەگى قايراتكەردىڭ قاجىرلى ەڭبەگىنە بەرىلگەن باعا, ەلدىڭ ابىرويىن كوتەرگەن ازاماتقا قۇرمەت.
ەندى سول سايلاۋدىڭ قالاي وتكەنىنە دە از-كەم توقتالا كەتكەن ءجون سياقتى. كۇرەسكە ءتورت ۇمىتكەر قوسىلدى. باسا ايتاتىن نارسە, ولاردىڭ بارلىعىنا بىردەي جاعداي جاسالدى. اقپارات قۇرالدارى ولاردى ناسيحاتتاۋدا ەشكىمدى الالاعان جوق. مەن ءوزىم ءبىراز گازەتتەردى الىپ, وقىپ وتىرامىن. بالكىم, سونداي نۇسقاۋ دا بەرىلگەن شىعار, سول گازەتتەردىڭ بارىندە ۇمىتكەرلەردىڭ بارلىعىنا بىردەي ورىن بەرىلىپ وتىردى. ءتىپتى كەيدە ولاردىڭ اتىن اتاۋعا تۋرا كەلگەندە, الفاۆيتكە سۇيەنىپ, نازارباەۆتىڭ اتى سوڭىنان اتالعانىنا قاراپ تا ءبىراز جايدى اڭعاراسىن. سايلاۋ ءادىل ءوتتى دەپ تولىق سەنىممەن ايتا الامىز.
سونداي ءادىل سايلاۋدا ەلىمىزدىڭ كوشباسشىسىنا حالىقتىڭ سەنىمى مەن سۇيىسپەنشىلىگى ايرىقشا كورىندى. حالىق ءوزىنىڭ قامقورشىسىنا داۋىس بەردى. ونىڭ جاقسى ىستەرگە, ەلدىڭ بىرلىگىنە, تۇراقتىلىققا باستايتىنىنا سەنىم ءبىلدىردى.
سۇلتان جيەنباەۆ, الماتى قالاسىنىڭ قۇرمەتتى ازاماتى.
الماتى.