جەڭىسىڭىزبەن! جەڭىسىمىزبەن!
باقبەرگەن امالبەك – اقمولا وبلىسىنان: «قازاقستان-2020» جالپىۇلتتىق دەموكراتيالىق كۇشتەر كواليتسياسىنىڭ, «نۇر وتان» حدپ باستاۋىش ۇيىمدارىنىڭ جەتەكشىلەرى مەن بەلسەندىلەرىنىڭ, ۇكىمەتتىك ەمەس ۇيىمداردىڭ, ستۋدەنت جانە جۇمىسشى جاستار, باق وكىلدەرىنىڭ باستاماسىمەن وتكىزىلگەن جەڭىمپازدار فورۋمىن وبلىستىق فيليالدىڭ جەتەكشىسى سەرگەي دياچەنكو «نۇر وتان» حدپ اتىنان پرەزيدەنتتىكتەن ۇمىتكەر بولىپ ۇسىنىلعان ءىس باسىنداعى ەلباسىمىزدىڭ, ۇلت كوشباسشىسىنىڭ جەڭىسىن كوپۇلتتى حالقىمىزدىڭ ورتاق جەڭىسى دەپ باعالادى. سونداي-اق, مارتەبەلى مىنبەرگە باسقا دا كوتەرىلگەندەر بولاشاقتىڭ جالاۋىنا بايلانعان بۇگىنگى جەڭىستىڭ ماڭىزدىلىعىن تاراتا سويلەدى. فورۋم ونەرپازدار كونتسەرتىمەن, سپورتتىق سايىستارمەن جالعاستى. كۇمىسجان بايجان – الماتى وبلىسىنان: تالدىقورعاندىقتار ورتالىق الاڭعا جينالىپ, ايقىن باسىمدىقپەن جەڭىسكە جەتكەن ەلباسىنىڭ قۇرمەتىنە اكتسيا وتكىزدى. ءانۇراننىڭ جۇرەكتى شىمىرلاتقان سازدى اۋەنىنە قوسىلعاندار «ءبىز ەلباسىمەن بىرگەمىز!», «ەل تىلەگى – نۇرسۇلتان, ەلىم مەنىڭ – قازاقستان», دەگەن جالىندى سوزدەر جازىلعان كورنەكىلىك, جالاۋشا جانە گۇلمەن ورىلگەن شارلار ۇستاعاندار الاڭعا جينالدى. اكتسيادا جاستار اسا بەلسەندىلىكپەن ۇرانداپ, ءتىپتى سازدى اۋەنگە قوسىلىپ, اۋەلەتتى. وسى توپتىڭ ورتاسىنداعى وبلىس اكىمى سەرىك ۇمبەتوۆ باستاعان ۇيىم, مەكەمە باسشىلارى مەن ەتنومادەني بىرلەستىك وكىلدەرىنىڭ دە جۇزدەرى جارقىن ەدى. جولداسبەك شوپەعۇل – اتىراۋ وبلىسىنان: نۇرسۇلتان نازارباەۆتىڭ قازاقستان پرەزيدەنتى بولىپ سايلانۋىنا وراي اتىراۋ قالاسىنداعى «يساتاي-ماحامبەت» الاڭىندا وتكەن جەڭىمپازدار فورۋمىنا 10 000 ادام جينالدى. فورۋمدا وبلىستىق ءماسليحات حاتشىسى جالعاس دۇيسەنعاليەۆ ءسوز سويلەدى. سونداي-اق, وبلىستىق ارداگەرلەر كەڭەسىنىڭ توراعاسى قاتيموللا ريزۋانوۆ, مۇنايشىلار اتىنان ءسوز العان اتىراۋ مۇناي وڭدەۋ زاۋىتىنىڭ وپەراتورى الفيا گۋمەروۆا ەل باسشىلىعى نۇرسۇلتان ءابىش ۇلىنداي ەرىك-جىگەرى كۇشتى ساياساتكەر, مىقتى, لايىقتى ازاماتقا بەرىلۋى زاڭدى, دەپ تولقي سويلەدى. فورۋمدا بۇلاردان بولەك ەتنوس وكىلدەرى, دارىگەرلەر, سپورت شەبەرلەرى دە ءسوز الدى. ال ونەر شەبەرلەرى جۇرتشىلىقتىڭ كوڭىلىن «قارا جورعا» بيىمەن كوتەرىپ, انشىلەر اۋەزدى انىمەن الديلەدى. كوسەمالى ساتتىباي ۇلى – جامبىل وبلىسىنان: «نۇر وتان» حدپ وبلىستىق فيليالى «دوستىق» الاڭىندا ءوز ۇمىتكەرى ن.نازارباەۆتىڭ جەڭىسى قۇرمەتىنە «ءبىز جەڭدىك!» دەگەن اتپەن سالتاناتتى جيىن وتكىزدى. وعان وبلىس ورتالىعىنداعى جوعارى وقۋ ورىندارىنىڭ ستۋدەنتتەرى, پروفەسسورلارى, باسقارما, دەپارتامەنت باسشىلارى مەن قىزمەتكەرلەرى جانە قالا جۇرتشىلىعى قاتىستى. جيىندا «نۇر وتان» حدپ وبلىستىق فيليالى توراعاسىنىڭ ءبىرىنشى ورىنباسارى م.بەرىك, مەملەكەتتىك سىيلىقتىڭ لاۋرەاتى, پروفەسسور, اكادەميك م.ۇركىمباەۆ, «دنەپرو» ۋكراين ەتنومادەني بىرلەستىگىنىڭ توراعاسى ف.كليمەنكو ەلەكتوراتتى لايىقتى تاڭداۋىمەن قۇتتىقتادى. ونەرپازدار سالتاناتتى جيىنعا كەلگەندەرگە اسەم ءان مەن ءتاتتى كۇيدەن شاشۋ شاشتى. ايقىن نەسىپباي – قاراعاندى وبلىسىنان: بارشا قازاقستاندىقتار سياقتى قاراعاندىلىقتار دا 3 ساۋىردەگى پرەزيدەنتتىك سايلاۋدا نۇرسۇلتان نازارباەۆتىڭ جەڭىسكە جەتۋىن ۇلكەن ورلەۋ ۇستىندەگى كوڭىل-كۇيمەن قارسى الدى. «جاستار» سپورت كەشەنىنە وبلىس جۇرتشىلىعى اتىنان جينالعان 6 مىڭعا جۋىق ءار جاستاعى ازامات وسى وقيعاعا وراي ورتاق قۋانىشتارىن ءبىلدىردى. ن.ءا.نازارباەۆ جەڭىسىنە ارنالعان فورۋمدى وبلىس اكىمى سەرىك احمەتوۆ اشتى. وڭىرگە تانىمال وزگە ادامدار دا كوپشىلىكتى بۇل تاماشا جەڭىسپەن قۇتتىقتادى. ءنازيرا جارىمبەتوۆا – قوستاناي وبلىسىنان: قوستانايداعى سپورت سارايىندا نۇرسۇلتان نازارباەۆتىڭ بارلىق سەنىمدى وكىلدەرى جانە «قازاقستان 2020» جالپىۇلتتىق دەموكراتيالىق كۇشتەر كواليتسياسى وبلىستىق مۇشەلەرىنىڭ قاتىسۋىمەن جەڭىمپازدار فورۋمى ءوتتى. فورۋمدا شىعىپ سويلەگەندەردىڭ اراسىندا ەسجانوۆتار وتباسى كوپتىڭ نازارىن ەرەكشە اۋداردى. اقليما ەسجانوۆا اجەيدەن ورگەن 8 بالا, 22 نەمەرە جانە 5 شوبەرەدەن وسى سايلاۋعا 31 جان قاتىسىپتى. ولاردىڭ بارلىعى دا نۇرسۇلتان نازارباەۆقا داۋىس بەرگەن. تاعى ءبىر قىزىعى, ەسجانوۆتاردىڭ التاۋى سايلاۋعا ءبىرىنشى رەت قاتىستى. ولارعا فورۋمدا قۇرمەت-قوشەمەت كورسەتىلدى. ەرجان بايتىلەس – قىزىلوردا وبلىسىنان: قىزىلوردادا قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىندا نۇرسۇلتان نازارباەۆتىڭ جەڭىسكە جەتۋىنە بايلانىستى «ءبىز جەڭدىك!» اتتى اكتسيا ءوتتى. ونى قازاقستان رەسپۋبليكاسىنىڭ پرەزيدەنتتىگىنە كانديدات نۇرسۇلتان نازارباەۆتىڭ وبلىستىق قوعامدىق شتابى ۇيىمداستىردى. بۇل جيىنعا جينالعان ەكى مىڭعا جۋىق قىزىلوردالىقتى «نۇر وتان» حدپ وبلىستىق فيليالىنىڭ توراعاسى, وبلىستىق ءماسليحات حاتشىسى نۇرلان قۇدايبەرگەنوۆ, وبلىستىق ارداگەرلەر كەڭەسىنىڭ توراعاسى سەيىلبەك شاۋحامانوۆ, «كورەيلەر اسسوتسياتسياسى قىزىلوردا فيليالى» قوعامدىق بىرلەستىگىنىڭ جەتەكشىسى ەلەنا كيم, ت.ب. قۇتتىقتادى. جولامان بوشالاق – ماڭعىستاۋ وبلىسىنان: اقتاۋ قالاسىنىڭ «استانا» الاڭىندا ۇلت كوشباسشىسىن قولداۋشىلاردىڭ فورۋمى ءوتتى. شارانى «نۇر وتان» حدپ ماڭعىستاۋ وبلىستىق فيليالى ۇيىمداستىردى. وعان پرەزيدەنتتىككە كانديدات ن.نازارباەۆتىڭ سەنىمدى وكىلدەرى, ارداگەرلەر, قوعامدىق جانە ۇكىمەتتىك ەمەس ۇيىمدار مەن كاسىپورىن, مەكەمە وكىلدەرى, ستۋدەنت-جاستار بەلسەنە قاتىستى. وندا وبلىس اكىمى ق.كوشەرباەۆ ءسوز سويلەدى. ول سايلاۋ ناتيجەسى ەلباسىنىڭ حالقى ءۇشىن ەرەن ەڭبەگى بەرىلگەن جوعارى باعا ەكەندىگىن جەتكىزدى. فورۋم قازاقستان حالقىنىڭ بىرلىگىنىڭ ۇلكەن جەڭىسى, تاۋەلسىزدىك تۇعىرىنىڭ بەكي تۇسكەندىگىنىڭ مەرەكەسى بولدى. تەمىر قۇسايىن – باتىس قازاقستان وبلىسىنان: باتىسقازاقستاندىقتار نۇرسۇلتان نازارباەۆتىڭ كەزەكتەن تىس پرەزيدەنتتىك سايلاۋداعى جەڭىسىن كەڭىنەن اتاپ ءوتتى. جەڭىمپازدار فورۋمىن «نۇر وتان» حدپ-نىڭ وبلىستىق فيليالى ۇيىمداستىردى. – بۇل جەڭىس قازاقستاندىق قوعامنىڭ جۇمىلعان جۇدىرىقتاي بىرلىگىن تاعى ءبىر دالەلدەپ بەردى, –دەدى فورۋمنىڭ اشىلۋ ءراسىمى كەزىندە فيليال توراعاسىنىڭ ءبىرىنشى ورىنباسارى كەنجەباي نىعمەت. سونداي-اق, فورۋمدا ءوز كانديداتتارىنىڭ جەڭىسىنە سەنىمدى وكىلدەر, وبلىستىق اسسامبلەيا مۇشەلەرى, «جاس وتان» جاستار قاناتىنىڭ مۇشەلەرى ورتاقتاستى. قۋانىشتى بولىسسە, كوبەيەدى دەگەن وسى دا. داۋلەت سەيسەن ۇلى – سەمەيدەن: ن.ءا.نازارباەۆتىڭ كانديداتۋراسىن قولداۋ ماقساتىمەن قۇرىلعان قوعامدىق شتابتىڭ ۇيىمداستىرۋىمەن جەڭىمپازدار فورۋمى ءوتكىزىلدى. مىڭداعان ادام قاتىسقان بۇل فورۋمدى قالالىق ءماسليحاتتىڭ حاتشىسى قايرات ميراشەۆ قىسقاشا ءسوز سويلەپ اشا كەلىپ, سەمەيلىكتەردى كەزەكتى سايلاۋداعى زور جەڭىستەرىمەن قىزۋ قۇتتىقتادى. فورۋمدا ءسوز العان «نۇر وتان» حدپ قالالىق بولىمشەسى توراعاسىنىڭ ورىنباسارى زۋلفيا جامالەتدينوۆا, جاستار وكىلى, ستۋدەنت تاحيرا كامالجانوۆا, وڭىرلىك زەينەتاقى قورىنىڭ ءتورايىمى داريعا دايىروۆا جانە تاعى باسقالار ەلباسىنىڭ جەڭىسى بارشا قازاقستاندىقتاردىڭ ورتاق جەڭىسى ەكەندىگىن تىلگە تيەك ەتتى. فاريدا بىقاي – پاۆلودار وبلىسىنان: وبلىس ورتالىعىندا «نۇر وتان» حدپ-دان ۇسىنىلعان ۇمىتكەردىڭ جەڭىسىنە مەرەكەلىك شارالار بولىپ ءوتتى. شىعارماشىلىق ينتەلليگەنتسيا مەن جاستار ۇيىمدارىنىڭ وكىلدەرى, زاۋىت, ءىرى ءوندىرىس ورىندارىنىڭ جۇمىسشىلارى, بيۋدجەتتىك جانە قوعامدىق بىرلەستىكتەردىڭ قىزمەتكەرلەرى بار 10 مىڭداي ادام وسى سالتاناتقا ءبىر كىسىدەي اتسالىستى. قايتا سايلانعان ەل پرەزيدەنتىن قولداۋ شاراسىنا «نۇر وتان» حدپ وبلىستىق فيليالىنىڭ توراعاسى باقىتجان ساعىنتاەۆ قاتىسىپ, ءسوز سويلەدى. سالتاناتتى شارانىڭ سوڭى ۇلكەن مەرەكەلىك شاشۋعا ۇلاستى. ءومىر ەسقالي – سولتۇستىك قازاقستان وبلىسىنان: سولتۇستىكقازاقستاندىق جاستار دا ەلباسى نۇرسۇلتان نازارباەۆتىڭ ساياسي جەڭىسىن جەر-جەرلەردە ۇلكەن بەلسەندىلىكپەن اتاپ ءوتتى. سونداي شەرۋلەردىڭ ءبىرىن «جاس وتان» جاستار قاناتى مەن ستۋدەنتتەر اليانسى وبلىس ورتالىعىندا ۇيىمداستىردى. ن.پوگودين اتىنداعى ورىس دراما تەاترى الدىنا جينالعان بەس مىڭعا جۋىق ستۋدەنت-جاستاردىڭ ۇندەرى جارقىن ەستىلىپ, ترانسپارانتتار كوتەرگەن كۇيى ورتالىق كوشەلەرمەن ءجۇرىپ ءوتتى. ءسويتىپ, وزدەرىنىڭ مەملەكەت باسشىسىنا دەگەن بەرىك سەنىمدەرىن تاعى ءبىر پاش ەتتى.