بيىلعى جىلدىڭ 25 قاڭتارىندا مەملەكەت باسشىسى ءوزىنىڭ وكىلەتتىلىگىن مەملەكەتتىك بيلىك تارماقتارى اراسىندا قايتا ءبولۋ ماسەلەسى بويىنشا ارنايى ۇندەۋ جولداعان بولاتىن. ەلباسى ءوز سوزىندە پرەزيدەنتتىڭ كەيبىر وكىلەتتىلىگىن پارلامەنت پەن ۇكىمەتكە بەرۋدىڭ ەكى نەگىزگى باعىتى بويىنشا تاپسىرما بەردى. مەملەكەت باسشىسىنىڭ زاڭ جۇزىندە بەكىتىلگەن وكىلەتتىلىگىن قايتا ءبولۋ ماسەلەسى بويىنشا ادىلەت مينيسترلىگىنىڭ جۇزەگە اسىرىپ جاتقان جۇمىستارى جونىندە ورتالىق كوممۋنيكاتسيالار قىزمەتىندە وتكەن اقپارات الماسۋ الاڭىندا زاڭناما دەپارتامەنتىنىڭ ديرەكتورى دارحان يگەمباەۆ ايتىپ بەردى.
ونىڭ ايتۋىنشا, پرەزيدەنت وكىلەتتىلىگىن قايتا ءبولۋ جۇمىسى ەكى باعىت بويىنشا جۇزەگە اسىرىلادى.
ءبىرىنشى باعىت – كونستيتۋتسيالىق دەڭگەيدە بيلىك تارماقتارى اراسىنداعى قارىم-قاتىناستاردى تەڭدەستىرۋ;
ەكىنشى باعىت – ۇكىمەت پەن باسقا اتقارۋشى ورگاندارعا پرەزيدەنتتىڭ زاڭمەن بەلگىلەنگەن الەۋمەتتىك-ەكونوميكالىق ۇدەرىستەردى رەتتەۋ جونىندەگى وكىلەتتىلىگىنىڭ بولىگىن بەرۋ.
وسى ورايدا دەپارتامەنت ديرەكتورى ەكىنشى بويىنشا جۇمىستاردى اتقارۋ ادىلەت مينيسترلىگىنە تاپسىرىلعانىن اتاپ ءوتتى.
«ادىلەت مينيسترلىگىنىڭ جانىنان جۇمىس توبى قۇرىلىپ, ولار 298 زاڭ, 11 كونستيتۋتسيالىق زاڭ مەن 20 كودەكستىڭ ماتىندەرىنە تالداۋ جاسادى. ناتيجەسىندە پرەزيدەنتتىڭ زاڭمەن بەلگىلەنگەن الەۋمەتتىك-ەكونوميكالىق ۇدەرىستەردى رەتتەۋ ماسەلەلەرى بويىنشا ەكى زاڭ جوباسىنىڭ تۇجىرىمداماسى دايىندالدى», – دەپ اتاپ ءوتتى د.يگەمباەۆ.
ايدار ورىسباەۆ, "ەگەمەن قازاقستان"