ورتالىق كوممۋنيكاتسيالار قىزمەتىندە ەلباسى نۇرسۇلتان نازارباەۆتىڭ جولداۋىنا ارنالعان ءباسپاسوز ءماسليحاتى ءوتتى.
وعان «قازاقستاننىڭ ىسكەر ايەلدەرى قاۋىمداستىعى» رقۇ پرەزيدەنتى راۋشان سارسەمباەۆا, «Luxury Antonovich Design» جوباسىنىڭ جەتەكشىسى ەلەنا انتونوۆيچ پەن «International Gold Group» جشس باس ديرەكتورى ساندۋعاش بەكجىگىتوۆا قاتىستى.
بريفينگتە راۋشان سارسەنباەۆا ىسكەر ايەلدەر ۇيىمى مەملەكەت باسشىسىنىڭ قازاقستان حالقىنا جولداۋىن قولدايتىنىن, ەلىمىز تاۋەلسىزدىك العان كەزدەن بەرى نۇرسۇلتان نازارباەۆ ايەلدەردىڭ جاعدايىن جاقسارتۋ ىسىنە ەرەكشە كوڭىل ءبولىپ كەلە جاتقانىن, سونىڭ ارقاسىندا قازاقستاندا ايەلدەردىڭ ساياساتتا, بيزنەستە جانە قوعامنىڭ بارلىق سالالارىندا نازىك جانداردىڭ الەۋەتىن دامىتۋعا بارلىق مۇمكىندىكتەر جاسالعانىن اتاپ ءوتتى.
–ەلىمىزدە ايەلدەر ءۇشىن بارلىق جاعدايدىڭ جاسالىپ جاتقانىن پارلامەنت ماجىلىسىندەگى دەپۋتاتتاردىڭ سانىنان دا كورۋگە بولادى. ەگەر 2006 جىلى ايەلدەر از بولسا, قازىر ءبىزدىڭ ۇلەسىمىز 27,1 پايىزعا جەتتى. ياعني, ەلىمىزگە ماڭىزدى شەشىم قابىلدايتىن ادامداردىڭ 30 پايىزى ايەلدەر. ال بارلىق دەڭگەيدەگى ءماسليحاتتاردا ايەلدەر وكىلدىگىنىڭ دەڭگەيى سايلانعان دەپۋتاتتاردىڭ جالپى سانىنىڭ 22,2 پايىزىنا جەتىپ وتىر. بۇل جاعىنان قوستاناي مەن اقتوبە وبلىستارى بارىنەن وزىپ تۇر, – دەدى ول.
سونىمەن بىرگە ول ايەلدەر قاۋىمى ەل ەكونوميكاسىنىڭ دامىتۋعا دا قوماقتى ۇلەس قوسىپ كەلە جاتقانىن ايتتى.
–ماسەلەن, سوڭعى 10 جىلدا جىلدان جىلعا ايەلدىڭ جۇمىسسىزدىعى 1,6 پايىزعا تومەندەپ, بيزنەستەگى ايەلدەردىڭ ۇلەسى 50 پايىزعا دەيىن ءوستى. ايەلدەر ەلباسىنىڭ بارلىق باستامالارىنىڭ سەنىمدى قولداۋشىلارىنا اينالىپ, وكىمەتتىڭ بارلىق رەفورمالارىنا بەلسەندى ارالاسىپ, تاۋەلسىزدىگىمىزدى نىعايتۋعا ماڭىزدى ۇلەس قوسىپ كەلەدى, – دەدى ر.سارسەمباەۆا.
جيىندا ىسكەر ايەلدەر قاۋىمداستىعىنىڭ باسشىسى نازىك جانداردىڭ الەۋمەتتىك-تۇرمىستىق جاعدايىنا, وتباسىنداعى كيكىلجىڭدەرگە قاتىستى پروبلەمالارىنىڭ بار ەكەنىن دە ايتىپ, سولاردى شەشۋ ءۇشىن ءتيىستى جۇمىستىڭ جاسالىپ جاتقانىن جەتكىزدى. ال جالپى ايتقاندا راۋشان سارسەمباەۆا پرەزيدەنتتىڭ قازاقستان حالقىنا جولداۋى ايەل, ەركەك كىندىك دەمەي ءبارىمىزدىڭ بولاشاعىمىز ءۇشىن جاسالعان قۇجات ەكەنىن, ونى حالقىمىز ءبىر-ءبىرىمىزدى ۇلتقا, جىنىسقا, ءدىن مەن تىلگە بولمەي بىرىگىپ ىسكە اسىرۋ كەركەتىگىن ايتتى.
بريفينگتە كاسىپكەرلەر ەلەنا انتونوۆيچ پەن ساندۋعاش بەكجىگىتوۆا دا جولداۋدى قولدايتىنىن, وندا ەلباسى ەلىمىزدى جان-جاقتى دامىتۋعا بارلىق العىشارتتاردى جاساپ بەرگەنىن, ەگەر سولاردى ىسكە اسىرساق بولاشاعىمىزدىڭ باياندى بولاتىنىن اتاپ ءوتتى.
داستان كەنجالين,
«ەگەمەن قازاقستان»