«نۇرلى جول» مەملەكەتتىك باعدارلاماسىنىڭ جۇزەگە اسىرىلۋىنىڭ ارقاسىندا 2016 جىلى 100 مىڭنان استام جۇمىس ورنى اشىلدى. بۇل تۋرالى قر ۇكىمەتى وتىرىسىنىڭ بارىسىندا ۇلتتىق ەكونوميكا ءمينيسترى تيمۋر سۇلەيمەنوۆ ايتتى, دەپ جازادى primeminister.kz.
قر ۇلتتىق ەكونوميكا ءمينيسترى ت. سۇلەيمەنوۆ ءوزىنىڭ جىل سايىنعى قازاقستان حالقىنا ارناعان جولداۋىندا مەملەكەت باسشىسى «نۇرلى جول» مەملەكەتتىك باعدارلاماسىنا وڭ باعاسىن بەرگەنىن باياندادى. بۇگىندە باعدارلاما اۆتوجول, تۇرعىن ءۇي قۇرىلىستارىنا, سونىمەن قاتار الەۋمەتتىك سالاعا زور سەرپىن بەرگەن ەكونوميكالىق ءوسىمنىڭ نەگىزگى لوكوموتيۆى بولىپ تابىلادى.
«نۇرلى جول» مەملەكەتتىك باعدارلاماسىنىڭ اياسىندا 2016 جىلى 100 مىڭنان استام جۇمىس ورنى اشىلدى. جىل قورىتىندىلارى بويىنشا ماقساتتى ترانسفەرتتەردىڭ 469,6 ملرد تەڭگەسى نەمەسە 99% يگەرىلدى. تولىق يگەرىلمەۋ جايتتارى نەگىزىنەن مەملەكەتتىك ساتىپ الۋلار بويىنشا ۇنەمدەۋلەرمەن بايلانىستى.
كولىك جولدارى سالاسىن دامىتۋعا 2016 جىلى 151,3 ملرد تەڭگە بولىنگەن, قاراجات تولىق يگەرىلدى. بولىنگەن قاراجات ەسەبىنەن 611 شاقىرىم اۆتوجولدا قۇرىلىس-جول جۇمىستارى اياقتالدى. ناتيجەسىندە استانا – تەمىرتاۋ, الماتى – قاپشاعاي, استانا – پەتروپاۆل باعىتتارى بويىنشا كولىك قوزعالىسى اشىلدى. بيىل بۇل باعىتتاعى جۇمىستار جالعاستىرىلادى.
لوگيستيكالىق ينفراقۇرىلىمدى دامىتۋعا 56,4 ملرد تەڭگە ءبولىندى, ونى كۆازيمەملەكەتتىك سەكتور تولىق يگەردى.
ماسەلەن, بولىنگەن قاراجات استانا اۋەجايىنىڭ جاڭا تەرمينالىنىڭ, ىشكى ينجەنەرلىك جەلىلەردىڭ قۇرىلىس-مونتاجداۋ جانە ارلەۋ جۇمىستارىن اياقتاۋعا, سونىمەن قاتار تەحنولوگيالىق جابدىقتى جەتكىزۋدى قامتاماسىز ەتۋگە مۇمكىندىك بەردى. سونىمەن قاتار وتكەن جىلى يندۋستريالاندىرۋ كۇنى اياسىندا مەملەكەت باسشىسى «قتج ۇك» اق جۇزەگە اسىراتىن ەڭ ءىرى نىسانداردىڭ ىسكە قوسىلۋىنا رۇقسات بەردى. وندا الماتى-شۋ ۋچاسكەسىندە ەكىنشى تەمىرجول جولدارىنىڭ جانە قۇرىق پورتىنداعى پاروم وتكەلىنىڭ قۇرىلىسى قامتىلماق, بۇل قازاقستاننىڭ ەكسپورتتىق-ترانزيتتىك الەۋەتىنە وڭ ىقپالىن تيگىزىپ, ەۋروپا جانە تاياۋ شىعىس ەلدەرىنە شىعۋىنا جول اشادى.
سونىمەن قاتار ەلىمىزدىڭ بارلىق ايماقتارىندا تۇرعىن ءۇي قۇرىلىسى نىساندارىنا كوممۋنيكاتسيالىق ينفراقۇرىلىم جۇرگىزىلۋدە, 2 208 شاقىرىم ينجەنەرلىك جەلىلەرى سالىندى. سونداي-اق «بجك 2020» اياسىندا كاسىپكەرلىك نىساندارىنا جەتكىلىكسىز ينفراقۇرىلىمدى جۇرگىزۋ بويىنشا جۇمىستار جالعاستىرىلۋدا. 2016 جىلى 35 بيۋدجەتتىك ينۆەستيتسيالىق جوبالاردى جۇزەگە اسىرۋعا 77 شوب سۋبەكتىلەرىنە ينفراقۇرىلىم جۇرگىزىلدى.
مەملەكەتتىك باعدارلاما اياسىندا ءبىلىم بەرۋ سالاسىندا ينفراقۇرىلىمدى دامىتۋعا ەرەكشە كوڭىل بولىنگەن, اتاپ ايتقاندا 2018 جىلعا قاراي اپاتتى جانە ءۇش اۋىسىمدا وقىتاتىن مەكتەپتەردى تولىق جويۋ كوزدەلگەن. قازىر 52 نىسان پايدالانۋعا بەرىلدى, ونىڭ ىشىندە 35 مەكتەپ پەن 17 بالاباقشا بار.