مەملەكەت باسشىسى نۇرسۇلتان نازارباەۆتىڭ اتىنا پرەزيدەنتتىك سايلاۋدا جەڭىسكە جەتۋىنە بايلانىستى شەتەلدىك ساياسي جانە قوعام قايراتكەرلەرىنەن قۇتتىقتاۋ حاتتار كوپتەپ كەلىپ تۇسۋدە.
پولشا رەسپۋبليكاسىنىڭ ەكس-پرەزيدەنتى الەكساندر كۆاسنەۆسكي ءوز حاتىندا مەملەكەت باسشىسىن سايلاۋداعى تاڭعالارلىق جەڭىسىمەن قۇتتىقتاعان. «قازاقستاندىق قوعامنىڭ كوپشىلىك بولىگىنىڭ قولداۋى مەملەكەت باسشىسى قىزمەتىندەگى ءسىزدىڭ جەتىستىكتەرىڭىزدى مويىنداۋى بولىپ تابىلادى. بۇل سونداي-اق كەلەسى جىلدار ءسىزدىڭ باسشىلىعىڭىزبەن قازاقستان ءۇشىن ودان ءارى دامۋ مەن الەۋمەتتىك جانە ەكونوميكالىق جەتىستىكتەردى نىعايتۋ كەزەڭى بولاتىنىنا سەنىم مەن ءۇمىتتىڭ كورىنىسى بولىپ سانالادى. مەن ءسىزدىڭ ءبىلىمىڭىز بەن تاجىريبەڭىزدىڭ ارقاسىندا قازاقستان كەلەشەكتە باي, اناعۇرلىم ءبىلىمدى جانە جاسامپاز قوعامى بار زاماناۋي مەملەكەتكە اينالاتىنىنا سەنەمىن. زاڭ ۇستەمدىگىن نىعايتقان, تۇراقتىلىق ينستيتۋتتارىن قۇرعان, ەركىن ەكونوميكانى دامىتقان مەملەكەت تەك ازياداعى ءوسۋ مەن پروگرەستىڭ باستى ورتالىعى عانا ەمەس, بارلىق قۇرلىق ءۇشىن ۇستاناتىن ۇلگى بولا الادى. ءسىز ءۇشىن ماڭىزدى دا جاۋاپتى وسى كەزەڭدە سىزگە, پرەزيدەنت مىرزا, مىقتى دەنساۋلىق, كۇش-قۋات پەن قازاقستان حالقى تاعى سەنىپ تاپسىرعان ميسسياڭىزدى ورىنداۋدا تاباندىلىق تىلەگىم كەلەدى. قازاقستان ءوز ءوڭىرىندە جانە ونىڭ سىرتىندا, سونداي-اق حالىقارالىق ۇيىمداردىڭ قۇرىلىمدارىندا ەرەكشە ءرول اتقاراتىن ەل, تۇراقتىلىقتىڭ كوزى, ديالوگ پەن ىنتىماقتاستىقتىڭ ورتالىعى بولىپ تابىلادى. مۇنداي بەلسەندى قىزمەت پەن قولداۋ حالىقارالىق ارەنادا تانىلۋدى تالاپ ەتەدى», دەپ اتاپ وتىلگەن ا.كۆاسنەۆسكيدىڭ حاتىندا.
بەلگىلى نەمىس ساياساتكەرى گانس-ديتريح گەنشەر مەملەكەت باسشىسىن پرەزيدەنتتىك سايلاۋداعى سەنىمدى جەڭىسىمەن قۇتتىقتاعان. «ءسىزدىڭ قازاقستان رەسپۋبليكاسى پرەزيدەنتىنىڭ قىزمەتىنە قايتا سايلانۋىڭىزعا وراي شىن نيەتتى قۇتتىقتاۋىمدى قابىل الىڭىز. مەن سىزگە جانە قازاقستان حالقىنا تابىستى قوعامدىق جانە ەكونوميكالىق دامۋ تىلەيمىن. ءوز ەلىڭىزدە سىزگە كورسەتىلگەن ءۇلكەن قولداۋ دەموكراتيالىق قوعامدى تابىستى دامىتۋدى قامتاماسىز ەتۋ ءۇشىن سىزگە كۇش پەن مۇمكىندىكتەر بەرەدى. قازاقستان ءسىزدىڭ پرەزيدەنتتىك كەزىڭىزدە ەداۋىر پروگرەسكە قول جەتكىزدى, بۇل ەلدى قوعامدىق, ەكونوميكالىق جانە عىلىمي سالادا دامىتۋعا مۇمكىندىك بەردى. وتكەن جىلى ءسىزدىڭ ەلىڭىزدىڭ ەقىۇ-عا توراعا بولۋى سىزگە جانە ءسىزدىڭ ەلىڭىزگە ءبىزدىڭ قۇرلىقتاعى بەيبىتشىلىكتى دامىتۋدى قامتاماسىز ەتۋ ءۇشىن كورسەتىلگەن حالىقارالىق سەنىم بولدى», دەلىنگەن گ.گەنشەردىڭ حاتىندا.
مەملەكەت باسشىسىن سايلاۋداعى سەنىمدى جەڭىسىمەن ۇجىمدىق قاۋىپسىزدىك شارت تۋرالى ۇيىمنىڭ باس حاتشىسى نيكولاي بورديۋجا قۇتتىقتاعان. «ءسىزدىڭ باسشىلىعىڭىزبەن قول جەتكىزىلگەن ۇدەمەلى دامۋ, ورنىقتى ەكونوميكالىق ءوسىم, رەسپۋبليكانىڭ ىشكى جانە سىرتقى ساياساتىنداعى اۋقىمدى تابىستار قازاقستاندىقتار تاراپىنان لايىقتى باعاسىن الدى. ءسىزدىڭ ۇقشۇ قىزمەتىنە, ۇيىم اياسىنداعى ىنتىماقتاستىقتى تەرەڭدەتۋگە كۇش-جىگەرمەن كورسەتكەن كومەگىڭىز, ەۋرازيالىق كەڭىستىكتەگى تۇراقتىلىقتى نىعايتۋعا ۇنەمى نازار قويىپ وتىراتىنىڭىز ءۇشىن ريزاشىلىعىمدى بىلدىرۋگە رۇقسات ەتىڭىز», دەلىنگەن ن.بورديۋجانىڭ حاتىندا.
تمد ۇكىمەت باسشىلارى كەڭەسىنىڭ جانىنداعى ينتەرناتسيوناليست جاۋىنگەرلەر ءىسى جونىندەگى كوميتەتتىڭ توراعاسى, كەڭەس وداعىنىڭ باتىرى رۋسلان اۋشەۆ مەملەكەت باسشىسىن سايلاۋداعى سەنىمدى جەڭىسىمەن قۇتتىقتاعان. «بۇكىلحالىقتىق داۋىس بەرۋ بارىسىندا سىزگە ەلدىڭ سايلاۋشىلارىنىڭ باسىم كوپشىلىگى كورسەتكەن سەنىم قازاقستاننىڭ ەكونوميكالىق-الەۋمەتتىك ساياسي ءومىرى سالاسىنداعى جاڭارۋلار بويىنشا ءسىز جۇرگىزگەن باعىتتى قولداۋدىڭ جارقىن كورىنىسى بولىپ تابىلادى. قازاقستانداعى ايتارلىقتاي تاريحي ءمانى بار وزگەرىستەر ءسىزدىڭ تىكەلەي ەسىمىڭىزبەن تىعىز بايلانىستى جانە رەسپۋبليكا ازاماتتارى ونىڭ ءناتيجەلەرىن لايىقتى باعالايدى, ولار ەلدىڭ تابىستى, ۇدەمەلى داميتىنىنا ناقتى سەنىمدى. ينتەرناتسيوناليست جاۋىنگەرلەر ءىسى جونىندەگى كوميتەت سىزگە قازاقستاندا ءومىر ءسۇرىپ جاتقان ءاسكەري ءىس-قيمىل ارداگەرلەرىنە تۇراقتى كومەگىڭىز بەن قولداۋىڭىز ءۇشىن ءاردايىم ريزا», دەلىنگەن ر.اۋشەۆتىڭ حاتىندا.