جۇرتشىلىق بۇل جاقسى جاڭالىقتى وبلىس اكىمى باقىتجان ساعىنتاەۆتىڭ قاتىسۋىمەن وتكەن كەڭەستەن كەيىن ەستىپ-ءبىلىپ قۋانىپ قالعاندارى انىق. ەلىمىزدىڭ تاۋەلسىزدىك العانىنا 20 جىل تولۋى قارساڭىندا وبلىس بويىنشا بۇل مەرەكە مەكتەپتەر مەن بالاباقشالاردىڭ, دەنساۋلىق ساقتاۋ سالاسىنىڭ, كلۋبتار مەن سپورتتىق نىسانداردىڭ بوي كوتەرىپ, حالىق يگىلىگىنە بەرىلۋىمەن اتالىپ ءوتىلمەك. ياعني, وبلىس ورتالىعى, ەكىباستۇز, اقسۋ قالالارىندا ارقايسىسى 330 ورىندىق ءۇش بالاباقشا پايدالانۋعا بەرىلەدى. ءسويتىپ, ورىن كەزەگىن كۇتىپ, ۇيلەرىندە وتىرعان بۇلدىرشىندەر قۋاناتىن بولدى. وبلىس اكىمدىگىندە وتكەن كەڭەسكە قاتىسقان ءبىلىم باسقارماسىنىڭ باستىعى باقىت بەكسەيىتوۆانىڭ ايتۋىنشا, وسى كۇندەرى جۇمىس جاساپ تۇرعان بالاباقشا عيماراتتارىن قايتا جاڭارتۋعا 500 ميلليون تەڭگە قارجى ءبولىنەتىن بولىپتى. سونىمەن قاتار, وبلىس ورتالىعىندا بيىلعى جىلى تامىز ايىندا 1200 ورىندىق №16 جالپى ءبىلىم بەرەتىن ورتا مەكتەپتىڭ قۇرىلىسى اياقتالماق. ەڭ نەگىزگىسى, وتىن-ەنەرگەتيكا سالاسى ءۇشىن سالىنىپ جاتقان ماماندار دايىنداۋ جونىندەگى ەكىباستۇزداعى 700 ورىندىق ايماقارالىق ورتالىق وقۋ ورنى دا الداعى قىركۇيەك ايىندا ستۋدەنتتەر قابىلدايتىن بولسا, قازان ايىندا جەلەزين اۋدانىنىڭ مىڭكول اۋىلىندا 80 ورىندىق جاڭا مەكتەپ پايدالانۋعا بەرىلەدى دەپ كۇتىلۋدە.
ەرەكشە ءبىر جاڭالىق – بيىل وبلىس ورتالىعىندا حيميا-بيولوگيالىق باعىتتا ءبىلىم بەرەتىن 720 ورىندىق «نازارباەۆ زياتكەرلىك مەكتەبىنىڭ» قۇرىلىسى باستالادى. ال دەنساۋلىق ساقتاۋ باسقارماسىنىڭ باستىعى ارداق كۇزەكوۆتىڭ بايانداۋىنشا, وبلىستاعى باياناۋىل, كەنجەكول, بەسجان اۋىلى مەن قالاعا جاقىن ورنالاسقان كەنتتە جاڭادان دەنساۋلىق ساقتاۋ نىساندارى سالىناتىن بولسا, وبلىستىق مادەنيەت باسقارماسىنىڭ باستىعى قانات كارىموۆتىڭ ءمالىمدەۋىنشە, شالعايداعى بىرنەشە اۋىلدىڭ تۇرعىندارى تاۋەلسىزدىك مەرەكەسىن جاڭا كلۋبتاردا قارسى الماق, سونداي-اق قوسىمشا 31 اۋىلدىڭ كلۋبتارىنا كۇردەلى جوندەۋ جۇمىستارى جۇرگىزىلەتىن بولادى.
بۇل كۇندەرى وبلىس ورتالىعىندا حالىقارالىق دەڭگەيدەگى سپورت كەشەنىنىڭ قۇرىلىسى ءجۇرىپ جاتىر دەسەك, ونىڭ قۇرىلىسىن, بيزنەستىڭ الەۋمەتتىك سالاداعى جاۋاپكەرشىلىگى اياسىندا «قازمۇنايگاز» ۇلتتىق كومپانياسى قارجىلاندىرۋدا.
فاريدا بىقاي, پاۆلودار.