استاناداعى مەملەكەتتىك قىزمەت سالاسىنداعى وڭىرلىك حاب باسقارۋشى كوميتەتى توراعاسى اليحان بايمەنوۆ مەملەكەتتىك باسقارۋ سالاسىنداعى ازيالىق قاۋىمداستىق (AAPA) پرەزيدەنتى, يونسەي ۋنيۆەرسيتەتى پروفەسسورى پان سۋك كيممەن كەزدەستى.
تاراپتار ەكىجاقتى قارىم-قاتىناستاردى ءارى قاراي دامىتۋ, ونىڭ ىشىندە وڭىرلىك حابپەن 13-14 ساۋىردەگى اارا حالىقارالىق كونفەرەنتسياسىن بيىل استانادا وتكىزۋ بويىنشا دايىندىق ماسەلەلەرىن تالقىلادى. جيىن بارىسىندا ازيا ەلدەرىنىڭ جەتەكشى عالىمدارى مەن پراكتيكتەرى مەملەكەتتىك قىزمەت دامۋىنىڭ وزەكتى ماسەلەلەرىن, جاڭا سىناقتار مەن يننوۆاتسيالىق ءادىس-تاسىلدەردى قاراستىرادى. كونفەرەنتسيادا سونىمەن بىرگە «پانازيالىق ديالوگ: ءتيىمدى باسقارۋ مەن تۇراقتى دامۋ ماقساتتارى» اتتى جوعارعى دەڭگەيدەگى سەسسيا وتەدى.
پان سۋك كيم كەزدەسۋدى ۇيىمداستىرعانى ءۇشىن ريزاشىلىعىن بىلدىرە وتىرىپ, وڭىرلىك حابتىڭ مەملەكەتتىك قىزمەتتى دامىتۋداعى قىزمەتىنىڭ ماڭىزىنا توقتالدى. «حابتىڭ نەگىزگى مانداتى - مەملەكەتتىك قىزمەت جۇيەسىن ايماقتا عانا ەمەس, الەمنىڭ باسقا جەرلەرىندە دە ىلگەرىلەتۋ. سوندىقتان حاب مەملەكەتتىك باسقارۋ سالاسىندا ساراپشىلار جەلىسىن قۇرۋ, زەرتتەۋلەر مەن جاقسى تاجىريبەلەردى ىلگەرىلەتۋ بويىنشا وراسان زور جۇمىس اتقارۋدا», - دەدى پان سۋك كيم.
كەزدەسۋدە سونىمەن بىرگە حاب پەن مەملەكەتتىك باسقارۋ سالاسىنداعى ازيالىق ۇيىمنىڭ ىنتىماقتاستىعىنىڭ نەگىزگى باعىتتارى, ونىڭ ىشىندە بىرلەسكەن وقىتۋ ءىس-شارالارى, زەرتتەۋلەر مەن عىلىمي جاريالانىمدار ازىرلەۋ ماسەلەسى ايقىندالدى.
استاناداعى مەملەكەتتىك قىزمەت سالاسىنداعى وڭىرلىك حاب - ايماقتاعى مەملەكەتتىك قىزمەت سالاسىنداعى تاجىريبە مەن ءبىلىم الماسۋدىڭ ينستيتۋتسيونالدى الاڭى. قازىرگى تاڭدا حابتىڭ قاتىسۋشى-ەلدەرى قاتارىندا 36 مەملەكەت, ونىڭ ىشىندە امەريكا, ەو, تمد, كاۆكاز جانە AسEAن ەلدەرى بار.