سەناتتا قازاقستان رەسپۋبليكاسىنىڭ 2016 جىلعا دەيىنگى اقپاراتتىق قاۋىپسىزدىك تۇجىرىمداماسىن ىسكە اسىرۋ قورىتىندىلارى تالقىلاندى. شاراعا سەناتورلار مەن مۇددەلى مەملەكەتتىك ورگانداردىڭ وكىلدەرى قاتىستى, دەپ حابارلادى وسى پالاتانىڭ ءباسپاسوز قىزمەتى.
كەزدەسۋدى اشقان سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ ءتورايىمى داريعا نازارباەۆا اقپاراتتىق قاۋىپسىزدىك جالپى ۇلتتىق قاۋىپسىزدىكتى قامتاماسىز ەتۋ جۇيەسىن دامىتۋداعى ۇزاق مەرزىمدى جانە باسىم باعىتتارىنىڭ ءبىرى بولىپ تابىلاتىنىن اتاپ ءوتتى.
اقپارات جانە كوممۋنيكاتسيالار ۆيتسە-ءمينيسترى الان اجىباەۆ دەپۋتاتتاردى تۇجىرىمدامانى ىسكە اسىرۋدىڭ نەگىزگى قورىتىندىلارى تۋرالى حاباردار ەتتى. اتاپ ايتقاندا, ول تەحنولوگيا مەن تەلەكوممۋنيكاتسيانى دامىتۋدىڭ احۋالىنا, اقپاراتتىق جۇيەلەردىڭ قاۋىپسىزدىگىن قامتاماسىز ەتۋگە, بۇقارالىق اقپارات قۇرالدارىندا وتاندىق ءونىمدى ارتتىرۋعا, سونداي-اق, نورماتيۆتىك-قۇقىقتىق نەگىزدەردى جەتىلدىرۋگە توقتالدى.
قورعانىس جانە اەروعارىش ونەركاسىبى ءمينيسترىنىڭ ورىنباسارى دميتري گولوبۋردا اقپارات سالاسىنداعى ماڭىزدى قاۋىپتەرگە قارسى مەكەمەنىڭ ءىس-قيمىلى ءجونىندەگى الداعى جوسپارلارى تۋرالى اڭگىمەلەدى.
تالقىلاۋعا سەناتورلار م.التىنباەۆ, ن.ابىقاەۆ, ي.ادىربەكوۆ, س.جاقسىبەكوۆ, گ.كيم قاتىستى. پىكىرتالاس بارىسىندا الداعى كەزەڭدە وسى سالانى رەتتەۋگە ارنالعان ستراتەگيالىق قۇجاتتاردى ءازىرلەۋ ماسەلەلەرى كوتەرىلدى. دەپۋتاتتار اقپاراتتىق قاۋىپسىزدىك سالاسىن تەحنولوگيالىق تۇرعىدا جانە ماماندارمەن قامتاماسىز ەتۋ, سونداي-اق وسى ماسەلەدەگى مەكەمەارالىق ءوزارا ءىس-قيمىلدىڭ كەيبىر تۇستارىنا نازار اۋداردى.
كەزدەسۋ سوڭىندا كوميتەت ءتورايىمى د.نازارباەۆا تالقىلاۋ ءناتيجەسى بويىنشا ازىرلەنگەن ۇسىنىستاردىڭ ۇكىمەتكە جىبەرىلەتىنىن جانە زاڭ شىعارۋ جۇمىستارىندا ەسكەرىلەتىنىن ايتتى.