[caption id="attachment_93764" align="aligncenter" width="560"] Version 2[/caption]
«مەنىڭ ەسىمىم ەمما شەيدلەر», – دەدى 18 جاستاعى نەمىس قىزى. ول وتكەن جىلى مەكتەپتى اياقتاپ, «ءىس-شارا مەنەدجمەنتى» ماماندىعىن وقۋ ءۇشىن شوتلانديانىڭ ەدينبۋرگ قالاسىنا كوشىپ بارىپتى. ەمما – الماتىدا وتەتىن قىسقى ۋنيۆەرسياداعا كەلەتىن ەرىكتىلەردىڭ ءبىرى. ول قازاقستانعا كەلۋگە, ۋنيۆەرسيادا سەكىلدى حالىقارالىق جارىستارعا ات سالىسۋعا قۇشتار ەكەنىن ايتادى.
– اعىلشىندار سپورتتى ءومىرىنىڭ ءبىر بولشەگى رەتىندە قارايدى عوي. جالپى ول ەلدەگى ۋنيۆەرسيادانىڭ دەڭگەيى قانداي؟
– ءبىر قىزىعى, كاسىبي سپورتپەن اينالىسپايتىنداردىڭ, قاراپايىم حالىقتىڭ كوپ بولىگى ۋنيۆەرسيادا تۋرالى ەستىمەگەن ەكەن. وليمپيادا مەن «دوستاستىق ويىندارىنان» كەيىنگى ءدۇبىرلى دودا تۋرالى ۇلىبريتانياداعى اقپاراتتىڭ ازدىعى مەنى تاڭعالدىردى. دوستارىما قازاقستانعا قىسقى ۋنيۆەرسياداعا ەرىكتى بولىپ باراتىنىمدى ايتقانىمدا, ولار قانداي جارىس ەكەنىنەن بەيحابار-تۇعىن. ارقايسىسىنا جەكە-جەكە ءتۇسىندىرۋگە تۋرا كەلدى. مەنىڭشە, بريتان ۇكىمەتى ستۋدەنت سپورتشىلاردى جەتكىلىكتى قولدامايتىن سەكىلدى. سەبەبى, ستۋدەنتتەر اراسىنداعى الەم چەمپيوناتى مەن ۋنيۆەرسيادا تۇماندى البيوندا اسا تانىمال ەمەس.
– «دوستاستىق ويىندارى» ۇلىبريتانيادا ءجيى وتكىزىلەدى. حالىقتىڭ وعان دەگەن كوزقاراسى قالاي؟
– قازىر مەن تۇرىپ جاتقان شوتلانديا «دوستاستىق ويىندارىن» وتكىزگەن-ءدى. سوندىقتان ەلدىڭ ءبارى اتالعان بايراقتى باسەكەدەن حاباردار ءارى سول ارقىلى سپورتقا دەگەن قىزىعۋشىلىعى ويانادى. شوتلانديا ءۇشىن «دوستاستىق ويىندارىن» وتكىزۋ ۇلكەن ابىروي بولدى.
– شوتلانديادا ۆولونتەرلار قاتارى كوپ پە؟ جالپى, حالىق كەز كەلگەن شاراعا ەرىكتى بولۋعا قالاي قارايدى؟
– كوپتەگەن اۋەسقوي جاتتىقتىرۋشىلار اقشا تولەنبەگەنىنە قاراماستان ەرىكتى بولۋعا قۇمار. ولار سپورتتى جان-تانىمەن سۇيەدى. اسىرەسە, جاس بالالار ەرىكتى بولۋ ارقىلى كلۋبتارعا جازىلىپ, سپورتپەن اينالىسا باستايدى. سونىڭ ناتيجەسىندە, بولاشاق سپورتشىلار ازىرلەنەدى.
لوندون وليمپياداسىنان كەيىن ۇلىبريتانيادا سپورتتىق دودالاردا ەرىكتى بولۋعا ىنتالىلار سانى ءوستى. سەبەبى, ولار بايراقتى باسەكەنىڭ اتموسفەراسىن جاقسى سەزىندى. كەلەر جىلى لوندوندا جەڭىل اتلەتيكادان الەم چەمپيوناتى وتەدى. لوندون وليمپياداسىنا ۆولونتەر بولعانداردىڭ كوبى سونداي دوداعا قايتا قاتىسۋعا تالپىنىپ وتىر.
– مەديا سالاسىنىڭ سپورتقا, سونداي-اق, دەنە شىنىقتىرۋعا اسەرى قانداي؟
– مەنىڭشە, بۇقارالىق اقپارات قۇرالدارىنىڭ سپورتپەن اينالىسۋعا ۇگىتتەۋدە ۇلەسى زور. مەنىڭ دوستارىمنىڭ كوبى – ۇلىبريتانيادا تۋىپ, وسىندا وسكەندەر. ولاردىڭ ءبارى ءبىراز ۋاقىت فۋتبول ويناعان. فۋتبول تۋرالى اقپاراتتىڭ باق-تا كوپ بولۋى وسىعان جاقسى اسەر ەتتى دەپ ايتا الامىن.
– الماتىعا كەلۋگە نە اسەر ەتتى؟
– ۋنيۆەرسيادا سەكىلدى بايراقتى باسەكەگە قاتىسۋ – وتە ۇلكەن تاجىريبە. كوپتەگەن ەلدەن كەلگەن ادامدارمەن ارالاسىپ, وي ءبولىسۋ وتە قىزىق. سونداي-اق, ۋنيۆەرسياداعا ۆولونتەر بولۋ مەنىڭ ساباعىم ءۇشىن دە پايدالى ءارى ءىس-شارالار يندۋسترياسىندا تاجىريبە جيناۋعا كومەكتەسەدى.
– قازاقستان تۋرالى بۇرىن بىلەتىن بە ەدىڭىز؟
– وكىنىشكە قاراي, قازاقستان تۋرالى بىلەتىنىم از. الايدا ەرىكتى بولۋعا قابىلدانعان سوڭ, ەل تۋرالى اقپارات ىزدەي باستادىم. قازاقستاندى وتە سۋىق دەپ ەستىدىم. بۇل مەن ءۇشىن جاڭا بەلەس بولايىن دەپ تۇر. ءازىرگە قازاق مادەنيەتى تۋرالى از بىلەمىن, ايتسە دە, قازاقستانعا بارعاندا جان-جاقتى تانىسامىن دەپ ويلايمىن.
ۋنيۆەرسيادا سەكىلدى حالىقارالىق جارىستار وتكىزۋشى ەلگە بۇكىل نازاردى اۋدارتىپ, كوپتەگەن تۋريستەردىڭ كەلۋىنە ىقپال ەتەدى. بۇل سول ەلگە ەكونوميكالىق تۇرعىدان وتە ءتيىمدى. ءارى حالىقتىڭ دا بىرىگۋىن, ىنتىماقتاستىعىن ارتتىرىپ, ەلىمەن ماقتانۋىنا سەبەپ بولادى.
– اڭگىمەڭىزگە راحمەت.
اڭگىمەلەسكەن
اباي اسانكەلدى ۇلى