يتالياداعى گران-ساسسو تاۋىنىڭ ماڭىندا Rigopiano قوناق ۇيى قار كوشكىنى استىندا قالدى. الدىن الا مالىمەتتەر بويىنشا, وندا 30 ادام بولعان, دەپ حابارلادى ۆۆس.
قۇتقارۋشىلار قار استىنان ءۇش ادامدى الىپ شىققان. باسىلىمنىڭ حابارلاۋىنشا, بىرنەشە ادام قايتىس بولىپ, 22 ادام ءىس-ءتۇسسىز جوعالعان. يتاليالىق باق وكىلدەرى ۇش قاباتتى قوناق ءۇي سارسەنبى كۇنى كەشكە قار كوشكىنىنىڭ استىندا قالعانىن ايتادى. الايدا, قالىڭ قار جاۋىپ, جولدار جابىلىپ قالعاندىقتان, قۇتقارۋشىلار تابيعي اپات ورنىنا تەك بەيسەنبى كۇنى جەتكەن. قۇتقارۋ قىزمەتىنىڭ باسشىسى انتونيو كروچەتتا جۋرناليستەرگە: "قازا تاپقاندار كوپ", دەدى. ونىڭ ايتۋىنشا, قاتتى قار كوشكىنىنەن قوناق ءۇيدىڭ توبەسى ورتاسىنا قۇلاعان. اپات ورنىندا قاردىڭ قالىڭدىعى بەس مەترگە جەتەدى. بۇل دا ادامداردى قۇتقارۋ وپەراتسياسىنا ءبىرشاما كەدەرگى كەلتىرۋدە. "قوناق ۇيگە تىكۇشاقپەن قۇتقارۋشىلار كەلىپ جاتىر. قازىر قاردى قازۋ جۇمىستارىن جۇرگىزۋدەمىز", دەيدى ءورت ءسوندىرۋ قىزمەتىنىڭ رەسمي وكىلى لۋكا كاري. مامانداردىڭ بولجاۋىنا قاراعاندا, قار كوشكىنىنىڭ تۋىنا يتاليادا بولعان جەر سىلكىنىسى اسەر ەتكەن. ەستەرىڭىزگە سالا كەتسەك, يتاليانىڭ لاتسيو, ابرۋتستسو مەن مارك وبلىستارىندا ءبىر كۇندە ماگنيتۋداسى بەستەن اساتىن ءتورت جەر سىلكىنىسى بولعان ەدى.