قۇقىقتىق كەمشىلىكتەردى جويۋدى قاجەت ەتەدى
«اتامەكەن» ۇكپ جانىنداعى سىبايلاس جەمقورلىققا جانە كولەڭكەلى ەكونوميكاعا قارسى ءىس-قيمىل جونىندەگى كەڭەستىڭ كەزەكتى وتىرىسى ءوتىپ, وندا كەپىلدەندىرىلگەن تەگىن مەديتسينالىق كومەكتىڭ كولەمى اياسىندا الىناتىن مەديتسينالىق تەحنيكالار مەن وسى ماقساتتاعى بۇيىمداردى جانە دارىلىك زاتتاردى ساتىپ الۋ سالاسىنداعى سىبايلاس جەمقورلىققا قارسى كۇرەس جۇرگىزۋدىڭ جاي-كۇيى قارالدى.
وتىرىسقا جەتەكشىلىك ەتكەن كەڭەس توراعاسى قايىربەك سۇلەيمەنوۆ ەلدەگى ءدارى-دارمەك تاراتۋ سالاسىنا ارنايى جۇرگىزىلگەن مونيتورينگ ناتيجەسىندە بىرقاتار ۇيىمدىق-قۇقىقتىق كەمشىلىكتەر ورىن العاندىعىن مالىمدەپ, مۇنداي جاعداي ەكونوميكانىڭ وسى سەگمەنتىندە باسەكەلەستىكتى شەكتەۋ مەن سىبايلاس جەمقورلىق كورىنىستەرىنە نەگىز بولاتىنىن اتاپ ءوتتى. سونىمەن قاتار, جيىنعا ونلاين-جۇيە ارقىلى قاتىسقان كاسىپكەرلەر قاۋىمى دا بۇل پىكىردى قوشتاي وتىرىپ, باس پروكۋراتۋراعا دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باسەكەلەستىكتى شەكتەيتىن جانە جەكەلەگەن زاڭدى تۇلعالارعا ارتىقشىلىقتار بەرەتىن كەيبىر بۇيرىقتارىنا قارسىلىق ءبىلدىرۋدى ءبىراۋىزدان ماقۇلدادى.
نەگىزىنەن, بىلدەي ءبىر مينيسترلىكتىڭ اتىنا مۇنداي ءۋاج ايتۋدىڭ سەبەبى دە جوق ەمەس سەكىلدى. ونىڭ ءمانىسى القالى باسقوسۋدا بايانداما جاساعان كەڭەس مۇشەسى, پارلامەنت ءماجىلىسىنىڭ دەپۋتاتى يۆان كليمەنكونىڭ كەلتىرگەن دەرەكتەرىمەن اشىلا ءتۇستى. بايانداماشىنىڭ ءسوزىنشە, قولدانىستاعى دارىلەر مەن مەديتسينالىق تەحنيكاعا باعا بەلگىلەۋ جانە ولاردى تىركەۋ تارتىبىندەگى كەمشىلىكتەر كاسىپكەرلەردىڭ ساتىپ الۋلارعا قاتىسۋىنا كەدەرگى جاسايتىن كورىنەدى. «ماسەلەن, باعانى تىركەۋ ۇدەرىسى كاسىپكەرلەردىڭ قۇقىقتارى مەن بوستاندىقتارىن جۇزەگە اسىرۋعا باعىتتالعان مەملەكەتتىك فۋنكتسيالاردى ىسكە اسىرۋ نىسانى بولىپ تابىلاتىنىنا قاراماستان, بۇل فۋنكتسيالار مەملەكەتتىڭ كورسەتىلەتىن قىزمەتتەر تىزىلىمىنە ەنگىزىلمەگەن جانە قۇقىقتىق تۇرعىدا رەتتەلمەگەن. سول سياقتى, ءبىزدىڭ زەرتتەۋىمىز فورمۋليارلىق كوميسسيانىڭ جۇمىسى تۋرالى اقپاراتتىڭ بولماۋى سىبايلاس جەمقورلىق تاۋەكەلدەرىنىڭ دامۋىنا ىقپال ەتە الاتىن قۇقىقتىق ۆاكۋمدى قۇرايتىندىعىن ءبىلدىردى. ال دەمپينگكە قارسى ءىس-قيمىلدى رەگلامەنتتەۋدەگى قۇقىقتىق كەمشىلىك وتاندىق تاۋار وندىرۋشىلەرگە زالال كەلتىرىپ, ادىلەتسىز باسەكەلەستىكتىڭ قالىپتاسۋىن تۋىنداتاتىندىعىنان حابار بەرەتىندەي», – دەدى دەپۋتات.
دەپۋتات تاراپىنان ايتىلعان مۇنداي سىنعا ءۇن قاتقان مينيسترلىك وكىلى, ءدارى-دارمەكتى اقپاراتتىق تالداۋ ورتالىعىنىڭ ءبولىم باسشىسى زاۋرەش مۋشانوۆا قازىرگى كۇنى ءتيىستى مەكەمەلەر ءدارى-دارمەك سالاسىندا حالىقارالىق شەڭبەردە مويىندالىپ, تاجىريبەسى ارتقان كونسالتينگتىك كومپانيالار كەڭەسىنە جۇگىنىپ جاتقاندىعىن العا تارتتى. «مىسالى, كاسىپكەر ءوزى شىعارعان دارىلىك ءونىمىن بىزگە تىركەۋگە الىپ كەلگەن كەزدە ءوز تاۋارىنىڭ باعاسىن ناقتىلاپ بەرۋ جۇيەسىن ىسكە قوسۋ باعىتىندا ىزدەنۋدەمىز. سونىمەن قاتار, ولار ءونىمنىڭ نارىقتاعى باعاسىنا قاتىستى جوعارى-تومەن دەپ پىكىر ءبىلدىرىپ, تالداۋ جۇرگىزۋ قۇقىنا دا يە بولماق. بۇل, اسىرەسە, ءدارى-دارمەكتىڭ الىپساتارلىق سالدارىنان قۇنىنىڭ شەكتەن تىس شارىقتاۋىن تومەندەتۋدە تيىمدىلىگىن كورسەتەدى دەگەن سەنىمدەمىز», – دەدى ول.
نۇرلىبەك دوسىباي,
«ەگەمەن قازاقستان»