جەزقازعان قالاسىندا چەرنوبىل اپاتىنىڭ قۇرباندارىنا ەسكەرتكىش ورناتىلدى. وتىز جىل بۇرىن ورىن العان تەحنوگەندىك اپات زاردابىن جويۋعا قاتىسىپ, سونىڭ سالدارىنان مەزگىلىنەن بۇرىن باقيلىق بولعان بوزداقتاردى ەستە قالدىرۋ بەلگىسى «قازاقمىس» كورپوراتسياسى» جشس-ءنىڭ دەمەۋشىلىگىمەن قويىلدى.
سوناۋ 1989 جىلدىڭ 26 ساۋىرىندە چەرنوبىل اتوم ەلەكتر ستانساسىندا بولعان جارىلىس, ونىڭ سالدارى مىڭداعان ادامنىڭ ءومىرىن جالمادى. اپات زارداپتارىن جويۋعا كەڭەس وداعىنىڭ تۇكپىر-تۇكپىرىنەن 600 مىڭداي ادام تارتىلدى. ءبىر عانا قازاقستاننان 30 مىڭنان استام ادام بارسا, سونىڭ ەكى جۇزدەن استامى جەزقازعاندىق ازاماتتار بولعان. سولاردىڭ ءبارى اۋاعا جايىلعان اسا قاۋىپتى رادياتسيادان بەيحابار ەدى. جارىلىستىڭ وزىنەن ەمەس, ونىڭ سالدارىنان, ياعني, اپات بولعان جەردى تازارتامىز دەپ, وزدەرى كەسەل تاپقان بەيباق جانداردىڭ دەنى وسى كۇندەرگە جەتە العان جوق. كەيىن بەلگىلى بولعانداي, چەرنوبىل اەس-ىنداعى جارىلىس حيروسيما مەن ناگاساكيگە تاستالعان اتوم بومباسىنان 400 ەسە كۇشتى بولعان ەكەن.
ەسكەرتكىشتىڭ اشىلۋىنا ارنالعان جيىنعا جەزقازعان قالاسىنىڭ اكىمى باتىرلان احمەتوۆ, جەزقازعان قالالىق ءماسليحاتىنىڭ حاتشىسى سوۆەتبەك مەدەباەۆ, «چەرنوبىل جاڭعىرىعى» قوعامدىق ءبىرلەستىگىنىڭ توراعاسى مۇحيت ۇڭگىتباەۆ ءسوز الىپ, لەبىزدەرىن ءبىلدىردى. جينالعان كوپشىلىك اپات قۇرباندارىنا تاعزىم ەتىپ, ەسكەرتكىشكە گۇل شوقتارىن قويدى.
جەزقازعاندا بۇگىندە چەرنوبىل اپاتىنىڭ زارداپتارىن جويۋعا قاتىسقان 93 ازامات تۇرىپ جاتىر. ەسكەرتكىشتىڭ ورنى سولاردىڭ ۇسىنىسىمەن وسىدان جارتى جىلداي بۇرىن بەلگىلەنگەن بولاتىن. جەزقازعاندىق جازىقسىز قۇربانداردىڭ ەسىمدەرى ەسكەرتكىشتىڭ قوس قاپتالىنا قاشالىپ جازىلعان.
قايرات ءابىلدينوۆ,
«ەگەمەن قازاقستان»
قاراعاندى وبلىسى,
جەزقازعان قالاسى