جاقىندا تۇرعىن ۇيلەر اۋلاسىنداعى قالدىقتارعا ارنالعان كونتەينەرلەر جانىنان مايدان, سۋدان, باسقا دا تاماق ونىمدەرىنەن بوساعان پلاستيك قۇتىلارعا ارنالعان سارى جاشىكتەر پايدا بولعانى جۇرتقا ايان. ادەتتە, تۇرعىن ۇيلەردىڭ قۋىس-قۋىسىندا, وزەن-كولدەردىڭ جاعاسىندا شاشىلىپ جاتقانىنا ابدەن ەتىمىز ۇيرەنگەن پلاستيك بوتەلكەلەردى «اسپەتتەپ», ولارعا قوقىس سالاتىن قوراپتاردان بولەك ورىن ءبولىپ, تور جاشىكتەردىڭ قويىلعانىنا قاراعاندا, ءبىزدىڭ ەلىمىز دە وركەنيەتتى ەلدەرگە ۇقساپ قوقىس-قالدىقتاردى كادەگە جاراتا باستاعان ەكەن-اۋ دەگەن قۋانىشتى ويعا بولەنگەنىمىز راس. قالا تۇرعىندارىنىڭ مادەنيەتى تۋرالى بىلگىسى كەلگەن ادام ءۇشىن وسى جىلت ەتكەن جاڭالىقتىڭ ءوزى كوڭىلدەگى كوپ تۇيتكىلدى تارقاتىپ تاستايدى-اق.
ايتايىن دەگەنىمىز, بىراق, بۇل ەمەس. سول تور جاشىكتىڭ سىرتىنداعى جازۋعا بايلانىستى تۋعان وي.
ونىڭ سىرتىنداعى اۋەلى ورىسشا: «زدەس جيۆەت پلاستيك» دەلىنىپ, ودان كەيىن «بۇل جەردە پلاستيك تۇرادى» دەپ قازاقشا ءىلىنگەن جازۋلار وقىعان ادامنىڭ ەزۋىنە ەرىكسىز كۇلكى ۇيىرەر ەدى. بىرىنشىدەن, «مىنا جەردە پلاستيك تۇرادى» دەپ قازاق قاشان ايتىپتى؟ الاباجاق اۋدارما ەمەس پە؟ «پلاستيككە ارنالعان جاشىك» دەسە, نەلەرى كەتىپ ەدى؟ ءتىپتى, قوقىس جاشىكتىڭ سىرتىنا ءبىر تىلدە جازىلسا دا جەتىپ جاتقان جوق پا, الدە مۇنىڭ پلاستيك بوتەلكەگە ارنالعان جاشىك ەكەنىن مىنا جۇرت باسقا نارسەمەن شاتاستىرىپ الادى دەي مە ەكەن؟
قاي جەر بولسا سول جەرگە, نە بولسا, سونى قازاقشا جازىپ, انا ءتىلىمىزدىڭ ايدىنىن تارىلتىپ المايىق دەگەننەن تۋعان ءبىر ۇزىك سىردى ءبولىسىپ جاتقان جايىمىز عوي. بەلگىلى ءتىل جاناشىرى, مارقۇم ارىپتەسىمىز بەيبىت قۇسانبەك ءوز باعدارلاماسىندا سىرتتان اتويلاعان كىرمە سوزدەردى قوقىسقا تاستاتىپ وتىراتىن ءبىر ءداستۇردى ەنگىزىپ ەدى. سارى شارباقتى قوقىس جاشىكتىڭ سىرتىنداعى جازۋدى كوزىمىز شالعان سايىن ءبىز دە الگى قازاقى ميدىڭ قابىعىنا سىيمايتىن ءساتسىز اۋدارمانى سول ساتتە سىپىرىپ الىپ, قوقىس جاشىككە ءبىر-اق لاقتىرۋعا شاق تۇرامىز.
قاراشاش توقسانباي,
«ەگەمەن قازاقستان»