م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا قازاقستاننىڭ حالىق ءارتىسى, «پاراسات» وردەنىنىڭ يەگەرى نۇكەتاي مىشباەۆانىڭ 80 جاسقا تولۋ مەرەيتويى اتالىپ ءوتتى.
تەاتر ونەرىنىڭ نەگىزىن قالاعان مايتالمانداردىڭ كوزىن كورىپ, تاربيەسىن العان, ايگىلى اسقار توقپانوۆتىڭ شاكىرتى, ساحنادا سانداعان وبرازدار گالەرەياسىن جاساپ, بىرنەشە بۋىن كورەرمەننىڭ سۇيىكتى اكتريساسىنا اينالعان نۇكەتاي مىشباەۆانىڭ سەكسەننىڭ سەڭگىرىنە شىققان تويىنا مادەنيەت پەن ادەبيەت, ونەر سالاسىنىڭ قايراتكەرلەرى, تەاتر ۇجىمى, كورەرمەن قاۋىم كوپ جينالدى.
الماتى وبلىسى نارىنقول اۋىلىندا دۇنيەگە كەلىپ, 1954 جىلى الماتىداعى قۇرمانعازى اتىنداعى كونسەرۆاتوريانىڭ اكتەرلىك ءبولىمىنە تۇسكەن جاس نۇكەتاي وقۋدى بىتىرگەن سوڭ م.اۋەزوۆ اتىنداعى اكادەميالىق دراما تەاترىنىڭ اكتەرلىك توبىنا قابىلدانعان. سودان بەرگى الپىس جىلعا جۋىق ۋاقىت بويى تەاتر قارا شاڭىراعىندا ۇزبەي ەڭبەك ەتىپ, ساحنانىڭ اۋىر جۇگىن سەرىكتەستەرىمەن بىرگە كوتەرىپ كەلە جاتقان اكتريسا بۇگىندە حالىقتىڭ سۇيىكتىسى, قازاق ونەرىنىڭ كورنەكتى تۇلعاسى بولىپ وتىر.
رەجيسسەر ءازىربايجان ءمامبەتوۆتىڭ «بەۋ, قىزدار-اي!» سپەكتاكلىندە ءساتتى شىققان ايسۇلۋدى العاشقى ءرولى رەتىندە سومداعان نۇكەتاي سول كەزدەرى ءابدىلدا تاجىباەۆتىڭ «توي بولارداسىنداعى» ايبالا, «كوڭىلدەستەر» دراماسىنداعى روزا, قالتاي مۇحامەدجانوۆتىڭ «قۇداعي كەلىپتى» كومەدياسىنداعى اقكوڭىل دە ادال مارفۋعا سياقتى كومەديالىق رولدەردى ساحنالاي ءجۇرىپ, وسى جانردىڭ ۇلكەن شەبەرىنە اينالدى.
نۇكەتاي مىشباەۆانىڭ دراما جانرىنداعى العاشقى كۇردەلى ەڭبەگى «انا – جەر-انا» سپەكتاكلىندەگى ءاليمان ءرولىن سومداۋى بولدى. اكتريسانىڭ وسى رولىنە قاتىستى شىڭعىس ايتماتوۆ: «ءنۇكەتاي مىشباەۆا ءاليماندى مەنىڭ شىعارمامداعىدان دا تەرەڭ وينادى» دەپ جوعارى باعا بەرگەن ەدى.
كۇردەلى الەۋمەتتىك درامالاردا ۇلتتىق دۇنيەتانىمى, قازاقى پايىم-پاراساتى, رۋحى مىقتى, كەسەك مىنەزدى قازاق ايەلىنە ءتان ايرىقشا قاسيەتتەردى اشا بىلگەن نۇكەتاي اكتريسانىڭ جالپى تەاتر ساحناسىنداعى ۇلكەندى-كىشىلى سەكسەنگە جۋىق ءرولىنىڭ بارلىعى دا ونىڭ جۇرەك ءلۇپىلى, ونەر ىزدەرى, ومىرلىك تاجىريبەسى مەن ۇلكەن رۋحاني ىزدەنىستەرىنىڭ جەمىسى ءھام جەڭىسى.
نەگىزگى شىعارماشىلىعى ساحنا بولعانىمەن, نۇكەتاي مىشباەۆا كينو مەن دۋبلياجدىڭ دا مايتالمان مامانى. كينوداعى العاشقى باستى ءرولى – «قازاقفيلم» كينوستۋدياسىنىڭ «شىعىس جولى» (1968 ج.) كوركەم فيلمىندەگى جىلقىشى ايەل. سونداي-اق, ول «جازدا جاۋعان قاردا» (1965 ج.) حاتشا, «اعام ءۇشىن قالىڭدىقتا» وزگەن, «الپامىس مەكتەپكە بارادىدا» مەيىربيكە, «جامبىل» (1996 ج.) فيلمىندە جامبىلدىڭ اناسى, «تاستاندىلاردا» ءسابيتحان اپا رولدەرىندە كورىنگەن.
ساحنا ساڭلاعىنىڭ مەرەيتويىنا وراي وتكەن كەشكە ارنايى كەلگەن مادەنيەت جانە سپورت ۆيتسە-ءمينيسترى اقتوتى رايىمقۇلوۆا ەلباسى نۇرسۇلتان نازارباەۆتىڭ قۇتتىقتاۋ حاتىن وقىپ بەردى. قازاقستان جازۋشىلار وداعىنىڭ باسقارما توراعاسى نۇرلان ورازالين مەملەكەتتىك حاتشى گۇلشارا ابدىقالىقوۆانىڭ, سەنات توراعاسى قاسىم-جومارت توقاەۆتىڭ, ءماجىلىس دەپۋتاتى سەرىك سەيدۋمانوۆ ءماجىلىس توراعاسى نۇرلان نىعماتۋليننىڭ, قۇتتىقتاۋلارىن جەتكىزدى. كەشكە اكتريسانىڭ تۋعان جەرى – نارىنقول اۋىلىنىڭ اكىمى دە كەلىپ, مەرەيتوي يەسىنە سىي-سياپاتىن ۇسىندى. مەرەكەلىك كەش ساحنالىق كورىنىسپەن جانە نۇكەتاي مىشباەۆا ويناعان قويىلىمداردىڭ ۇزىندىلەرىن كورسەتۋمەن جالعاستى.
ميرا بايبەك,
«ەگەمەن قازاقستان»
الماتى