وڭتۇستىك قازاقستان مەملەكەتتىك پەداگوگيكالىق ينستيتۋتىنىڭ ۇجىمى كاسىپقوي بوكسشى قانات يسلامدى شاقىرىپ, جاستارمەن كەزدەسۋ ۇيىمداستىردى, دەپ حابارلايدى قازاقپارات. ونداعى ماقسات - جاستاردى جارقىن ازاماتتاردىڭ ءومىر جولىنا ءۇڭىلدىرىپ, دۇرىس باعىتتا تاربيەلەۋ. كەزدەسۋ ويلاعانداي ءوربىدى.
كاسىپقوي بوكسشى, WBA تۇجىرىمى بويىنشا لاتىن امەريكاسى ايماعىنىڭ چەمپيونى قانات يسلام شىناشاقتاي بالانىڭ شىن باتىرعا اينالۋ قۇپياسىن اشتى. ءيسى قازاققا تانىمال كاسىپقوي بوكسشىنى جاڭا اقپاراتتىق-تەحنولوگيالىق دامۋ زامانىنىڭ جاستارى جازباي تانيدى. تاياۋدا بار جەلى بۇگىنگىنىڭ حاس باتىرى جايلى, ونىڭ ەرلىگى تۋرالى لەك-لەگىمەن جازعان. الەمدىك ارەنادا ەلىمىزدىڭ كوك تۋىن جەلبىرەتىپ, داڭقىن اسقاقتاتىپ جۇرگەن سپورتشىعا جاستار زور قوشەمەت كورسەتتى. جەڭىسىمەن قۇتتىقتادى.
ايتا كەتۋ كەرەك, قانات يسلام شارشى الاڭدا 22 جەكپە-جەك وتكىزىپ, بارلىعىندا باسىم ءتۇستى. ونىڭ ون جەتىسىندە قارسىلاسىن نوكاۋتپەن جەڭدى. جيىن سوڭىندا قاتىسۋشىلار كاسىپقوي بوكسشىعا كوكەيلەرىندەگى سۇراقتارىن قويىپ, سپورتتىق كارەراسىنا ساتتىلىك تىلەدى. وڭتتۇستىك جاستارى اتىنان داڭقتى سپورتشىعا ارناۋ ايتىپ, بار قازاقتىڭ باعىنا تۋعان بالانىڭ ءباسى بيىك بولۋىن تىلەدى.