ا.پۋشكين اتىنداعى شىعىس قازاقستان وبلىستىق كىتاپحاناسىندا ءلايلا احمەتوۆانىڭ «1941. برەست بەكىنىسى. قازاقستان» اتتى كىتابىنىڭ تۇساۋكەسەرى ءوتتى. اتالعان شاراعا ءوڭىر زيالىلارى, قالامگەرلەر مەن جۋرناليستەر جانە جاستار قاتىستى.
سونداي-اق, كىتاپتىڭ تۇساۋكەسەرىن شەمونايحا, بەسقاراعاي, اباي, جارما, اياگوز جانە گلۋبوكوە اۋداندىق كىتاپحانالارى مەن ءۇرجار, ماقانشى اۋداندارىنداعى اۋىلدىق كىتاپحانالار, كۇرشىم اۋدانىنىڭ تەرەكتى اۋىلدىق كىتاپحاناسى ونلاين جۇيەسى ارقىلى كورۋگە مۇمكىندىك الدى. اۆتورمەن كەزدەسۋگە اتالعان كىتاپقا ەسىمدەرى ەنگەن قاھارمان جاۋىنگەرلەردىڭ تۋعان-تۋىستارى دا كەلدى.
ءلايلا احمەتوۆا بۇل كىتابىندا اتى اڭىزعا اينالعان برەست بەكىنىسىندە سوعىس الدىنداعى كەزەڭ مەن 1941 جىلدىڭ ماۋسىم ايىندا بولعان وقيعالاردى باياندايدى. زەرتتەۋ ەڭبەگى 1941 جىلى فاشيستەردىڭ العاشقى سوققىسىن قارسى العان قامالدا قىزمەت ەتكەندەردىڭ ءتىزىمى جاريالانۋىمەن ءجانە ءارى قارايعى تاعدىرلارى تارقاتىلۋىمەن قۇندى. ولاردىڭ اراسىندا شىعىسقازاقستاندىقتار دا بار.
– قىرقىنشى جىلدىڭ اقپان ايىندا سەمەيدەن اسكەر قاتارىنا اتتانعاندار ەشەلونمەن برەست-ليتوۆسكىگە باعىت الىپ, ولاردىڭ ءبىر بولىگى برەست قامالىنا ءبولىندى. بيىل 1 مامىردا مەن برەست بەكىنىسىن قورعاۋعا قاتىسقان 556 قازاقستاندىقتىڭ ەسىمىن تاپتىم. ولاردىڭ ىشىندە 88 سەمەيلىك جانە 10 شىعىسقازاقستاندىق جاۋىنگەر بار. ارينە, ىزدەۋ جۇمىستارى ءالى جالعاسادى. ويتكەنى, قامالدى قورعاۋعا قاتىسقاندار مۇنىمەن شەكتەلمەيدى. سول سەبەپتى بۇل ءبىرىنشى كىتاپ رەتىندە جارىققا شىقتى. ماسەلەن, جارما اۋدانىنىڭ بالاجال كەنتىنىڭ وزىنەن 30 ادام برەست قامالىن قورعاۋعا قاتىسقان. مەن ارحيۆ قۇجاتتارىنان تەك ەكەۋىن عانا تاپتىم, – دەيدى ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى ءلايلا سەيسەنبەكقىزى. كىتاپ اۆتورىنىڭ ايتۋىنشا, 44-اتقىشتار پولكى بويىنشا تابىلعان كوپتەگەن قۇجاتتارعا سايكەس, پولكتىڭ باسىم بولىگى شىعىس قازاقستان وبلىسىنان جاساقتالعان. الايدا, ۇرىسقا قاتىسۋشىلاردىڭ كوپشىلىگى تۇتقىنعا تۇسكەندىكتەن, كوپ جىلدار بويى ولاردى ۇلى وتان سوعىسىنىڭ قاتىسۋشىلارى ساناتىنا قوسپاعان.
ءلايلا سەيسەنبەكقىزى وقۋشىلار اتا-بابالارىنىڭ سوعىستا جاساعان ەرلىكتەرىنەن حاباردار بولۋى ءۇشىن اتالعان كىتاپتىڭ ءوڭىر مەكتەپتەرىندە كومەكشى قۇرال رەتىندە پايدالانىلۋىن جانە پۋشكين مەن اباي اتىنداعى وبلىستىق كىتاپحانالاردا ەسىمدەرى جازىلعان شىعىسقازاقستاندىق جاۋىنگەرلەردىڭ تىزىمىنە تۋعان-تۋىستارىنىڭ ءۇن قاتىپ, ەڭبەكتىڭ ودان ءارى تولىعا ءتۇسۋى ءۇشىن قولدا بار دەرەكتەرىمەن ءبولىسۋىن سۇرادى. كەزدەسۋگە كەلگەن مايدانگەرلەردىڭ ۇرپاقتارى مەن اعايىندارى كىتاپتان بالعىباەۆ, دميتريەنكو, پوپوۆ جانە باسقا دا جاۋىنگەرلەردىڭ ەسىمىن تاۋىپ, قۋانىسىپ قالدى. بۇل رەتتە كىتاپ اۆتورى ۇلى وتان سوعىسىنىڭ قاھارماندارىن بىرىگىپ ىزدەۋگە باعىتتالعان توپ قۇرىپ, بىرگە جۇمىس ىستەۋگە, وسىلايشا ىزدەۋسىز كەتكەن جەرلەستەردىڭ ەرلىككە تولى ءومىرىن پاش ەتۋگە شاقىردى. ايتا كەتەلىك, ۇلى وتان سوعىسى جىلدارىندا شىعىس ءوڭىرىنىڭ وزىنەن 109 كەڭەس وداعىنىڭ باتىرى شىققان بولاتىن.
وسكەمەن