مەملەكەت باسشىسى «استانا ەكسپو-2017» ۇلتتىق كومپانياسى» اق باسقارماسىنىڭ توراعاسى ا.ەسىموۆتى قابىلدادى. بۇل تۋرالى اقوردانىڭ ءباسپاسوز قىزمەتى حابارلادى.
كەزدەسۋدە ا.ەسىموۆ ەلباسىعا «ەكسپو-2017» حالىقارالىق كورمەسىنە دايىندىق بارىسىنىڭ قورىتىندى كەزەڭى تۋرالى باياندادى.
«استانا ەكسپو-2017» ۇلتتىق كومپانياسى» اق باسقارماسىنىڭ توراعاسى قۇرىلىس جۇمىستارى كەستەگە سايكەس جۇرگىزىلىپ جاتقانىن حابارلادى. العاشقى نىساندار تاپسىرىلۋعا دايىن, سونىڭ ىشىندە جالپى كولەمى 285 مىڭ شارشى مەتر بولاتىن حالىقارالىق پاۆيلوندار بار.
– فرانتسيا, گەرمانيا, قىتاي, تۇركيا جانە ۆەنگريا ەلدەرىنىڭ وكىلدەرىنە پاۆيلوندار بەرىلىپ تە قويدى. الدا تاقىرىپتىق پاۆيلوندار قۇرىلىسىن اياقتاۋ مىندەتى تۇر, – دەدى ا.ەسىموۆ.
ەلباسى ەكسپو-2017 نىساندارىنىڭ ءىس-شارا وتكەننەن كەيىن دە پايدالانىلۋى قاجەتتىگىنە, سونداي-اق كورمە جۇمىسىنا قاتىساتىن ەرىكتىلەردى دايىنداۋ, مادەني ءىس-شارالار وتكىزۋ, رەسپۋبليكا وڭىرلەرىنىڭ اتسالىسۋى, حالىقارالىق كورمەگە وتاندىق تۋريستەردى تارتۋ ماسەلەلەرىنە نازار اۋداردى.
نۇرسۇلتان نازارباەۆقا جىل سوڭىنا دەيىن قازاقستان پاۆيلونىنىڭ قۇرىلىسىن اياقتاۋ جانە ونى ءتيىستى تاقىرىپقا سايكەس مازمۇندىق تۇرعىدان تولىقتىرۋ باعىتىندا اتقارىلىپ جاتقان جۇمىستار تۋرالى باياندالدى.
ا.ەسىموۆ ەكسپو-2017 كورمەسى اياسىنداعى بارلىق ءىس-شارا جۇمىس رەجىمى بويىنشا جۇزەگە اسىرىلىپ جاتقانىن اتاپ ءوتتى. بۇگىندە ەرىكتىلەردىڭ 3 مىڭى دايىندىقتان وتكەن, قوسىمشا تاعى 1,5 مىڭ ەرىكتىنى ىسكە تارتۋ كوزدەلۋدە.
مەملەكەت باسشىسى قۇقىقتىق ءتارتىپتى قامتاماسىز ەتۋ جانە حالىقارالىق كورمەگە قاتىسۋشىلار مەن قوناقتاردى ورنالاستىرۋ ماسەلەلەرىنە ەرەكشە توقتالدى.
«استانا ەكسپو-2017» ۇلتتىق كومپانياسى» اق باسقارماسىنىڭ توراعاسى بۇگىنگى تاڭدا ءىس-شاراعا قاتىسۋشىلارعا بەرىلەتىن 1 374 پاتەردىڭ دايىن ەكەنىن حابارلادى.
مەملەكەت باسشىسى بۇكىل الەمدە بولىپ جاتقان كۇردەلى ەكونوميكالىق ۇدەرىستەرگە قاراماستان ماڭىزدى حالىقارالىق ءىس-شارا وتكىزۋدى جوسپارلاپ وتىرعانىمىزدى ايتتى.
سوڭىندا ەلباسى كورمەنى لايىقتى وتكىزىپ, سودان كەيىن قازاقستاندا ونىڭ جەتىستىكتەرىن پايدالانۋ قاجەتتىگىن اتاپ ءوتتى.
– بىزگە شەتەلدىك قاتىسۋشىلاردىڭ كورمەدە كورسەتەتىن جاڭا يننوۆاتسيالىق تەحنولوگيالارىن بارىنشا پايدالانۋ قاجەت, – دەدى نۇرسۇلتان نازارباەۆ.