شىعىس وڭىرىندە ۇلتىمىزدىڭ ۇلى تۇلعالارى ۇلىقتالۋدا. ياعني, ۇكىمەت قاۋلىسىمەن بىرقاتار مادەنيەت جانە ءبىلىم بەرۋ مەكەمەلەرىنە ۇلت قايراتكەرلەرىنىڭ ەسىمدەرى بەرىلدى.
اتاپ ايتقاندا, ريددەر قالاسىنداعى №3 ورتا مەكتەپكە – دىنمۇحامەد قوناەۆ, وسكەمەن قالاسىنداعى ورتالىقتاندىرىلعان كىتاپحانالار جۇيەسىنە – ورالحان بوكەي, №33 ورتا مەكتەپكە – اباي قۇنانباي ۇلى, №1 ورتا مەكتەپكە – شاكارىم قۇدايبەردى ۇلى, كوپبەيىندى №3 مەكتەپ-گيمنازياسىنا – شوقان ءۋاليحانوۆ, №16 ورتا مەكتەپكە – زاكي احمەتوۆ, ۇلان اۋدانىنداعى بلاگودارنوە ورتا مەكتەبىنە – احمەت بايتۇرسىن ۇلى, ءۇرجار اۋدانىنداعى كرۋپسكايا اتىنداعى ورتا مەكتەپ-بالاباقشاسىنا ابىلايحان ەسىمدەرى بەرىلدى. جاڭا اتاۋلارعا اۋىستىرۋ ءۇردىسى سەمەي قالاسى مەن كۇرشىم, جارما, كاتونقاراعاي, زىريان اۋداندارىندا جالعاسىپ, ۇلت قايراتكەرلەرىمەن بىرگە ءوڭىر تاريحىندا ورنى بار تۇلعالاردىڭ ەسىمدەرى دە قۇرمەتتەلدى. بۇل اۋداندار اراسىندا وسى كۇنگە دەيىن لەنين مەن كيروۆ اتاۋىمەن اتالىپ كەلگەن مەكتەپتەر دە بار ەدى.
– ەلىمىزدىڭ دامۋ تاريحىندا ايرىقشا ورنى بار مەملەكەت جانە قوعام, مادەنيەت جانە ونەر قايراتكەرلەرى ەسىمدەرىنىڭ وڭىرىمىزدەگى مەكتەپتەر مەن باسقا دا مەكەمەلەرگە بەرىلۋى قۋانتادى. مۇنىڭ جاس بۋىندى ەلشىل, مەملەكەتشىل رۋحتا تاربيەلەۋدەگى ءمانى وتە زور. سونداي-اق بۇل تاۋەلسىزدىگىمىزدىڭ 25 جىلدىق مەرەيتويى اياسىندا تۇرعىندارىمىزعا ەرەكشە تارتۋ بولدى, دەيدى شىعىس قازاقستان وبلىسى اكىمىنىڭ ورىنباسارى جاقسىلىق ومار.
دۋمان اناش, «ەگەمەن قازاقستان»