پاۆلودار پوليتسياسىنا ءۇي اۋلاسىنان «مازدا- 626» كولىگىنىڭ ۇرلانعانى تۋرالى حابارلاما كەلىپ ءتۇستى. بۇل تۋرالى قازاقپارات حابارلايدى. پوليتسيا «ۇستاۋ» جوسپارىن قۇردى جانە از ۋاقىتتا ءپاترۋلدى پوليتسيا ۇرلانعان اۆتوكولىكتى تاپتى. ونىڭ رولىندە 21 جاستاعى پاۆلودار تۇرعىنى بولعان. پوليتسيانىڭ انىقتاۋىنشا, بويجەتكەن اۋلاداعى كولىكتى كورىپ, ۇرلاپ اكەتۋدى ويلاستىرعان. كەش باتقان سوڭ, جولاۋشىلار ەسىگىن بۇراۋىشپەن اشىپ, قوزعالتقىشىن ىسكە قوسىپ, ايداپ اكەتكەن. كۇدىكتى بۇرىن ءىستى بولعان, ەش جەردە جۇمىس ىستەمەيدى. اتالعان فاكت بويىنشا قر قك 200-بابى, 1-ءبولىمى («اۆتوكولىكتى جىمقىرۋ ماقساتىنسىز ايداپ كەتۋ») بويىنشا سوتقا دەيىنگى تەرگەۋ ءجۇرىپ جاتىر. كۇدىكتى ەكى جىلعا باس بوستاندىعىنان ايىرىلۋى مۇمكىن.