ش.ايمانوۆ اتىنداعى «قازاقفيلم» اق-قا پارلامەنت ءماجىلىسىنىڭ دەپۋتاتتارى كەلدى. ۇلتتىق كينوستۋديادا پارلامەنتتىڭ الەۋمەتتىك-مادەني دامىتۋ كوميتەتىنىڭ حاتشىسى بەيبىت مامراەۆ, وسى كوميتەتتىڭ مۇشەلەرى كارىباي مۇسىرمان جانە جانات وماربەكوۆا, زاڭناما جانە سوت-قۇقىقتىق رەفورما كوميتەتىنىڭ مۇشەسى سنەجاننا يماشەۆا, سونداي-اق, ەكونوميكالىق رەفورما جانە ايماقتىق دامۋ كوميتەتىنىڭ مۇشەسى ايزادا قۇرمانوۆا بولدى.
كەزدەسۋ بارىسىندا دەپۋتاتتار كينوستۋديانىڭ جۇمىسىمەن, ونىڭ جاڭا جوبالارىمەن جانە كينووندىرىس پروتسەسىمەن تانىستى. سونداي-اق, قوناقتار دۋبلياجداۋدىڭ بارلىق تۇرلەرىنە, ياعني اكتەرلىك دىبىستاۋ, ديكتورلىق دىبىستاۋ, سۋبتيترلاۋعا بولىنەتىن قاراجات تۋرالى اقپار سۇرادى.
تسيفرلىق كەشەننىڭ قىزمەتكەرلەرى دەپۋتاتتارعا 2010 جىلى «قازاقفيلم» كينوستۋدياسى تەحنولوگيالىق بازاسىنىڭ جاڭا جاراقتاندىرۋدان وتكەنى جايىندا ماعلۇماتتار بەردى. ماسەلەن, كينوستۋديا كينووندىرىستىڭ ونە بويىندا كەرەكتى زاماناۋي كامەرالارمەن, جارىق ءتۇسىرۋ جانە دىبىس تەحنيكاسى, كومپيۋتەرلەرمەن قامتاماسىز ەتىلگەنى, وندىرىستىك الاڭداردىڭ ونىڭ ىشىندە پاۆيلوندار, تسەحتار, لابوراتوريالار, فيلموتەكا جوندەۋدەن وتكەن.
– كەڭەستىك كەزەڭدە كينوستۋديا جىلىنا 60-تان استام تولىقمەتراجدى ءفيلمدى دىبىستايتىن. ءبىز قازىر دە قاجەتتى وزىق تەحنيكامەن جابدىقتالعانبىز, ءوندىرىستىڭ بارلىق قىزمەتىن الەمدىك دەڭگەيگە سايكەس كورسەتە الامىز. دەگەنمەن, كينوستۋديا ۇدايى تەحنيكالىق جاڭعىرۋدان ءوتىپ تۇرۋى ءتيىس, – دەيدى «قازاقفيلم» كينوستۋدياسىنىڭ اۋديوۆيزۋالدى جوبالار جەتەكشىسى ولجاباي مۇسابەكوۆ.
سونداي-اق, كينوستۋديا قىزمەتكەرلەرى دىبىستاۋعا بولىنەتىن قاراجات ماسەلەسى جوباعا بايلانىستى ءار ءتۇرلى بولاتىنىن, مىسال رەتىندە, ءبىر ءفيلمدى قازاق تىلىنە اكتەرلىك دىبىستاۋ جاساۋ ءۇشىن 10 ميلليون تەڭگە كولەمىندە قاراجات كەتەتىنىن ايتتى.
كەزدەسۋ سوڭىنا قاراي پارلامەنت ءماجىلىسىنىڭ دەپۋتاتتارى ليتسەنزيالانعان Dolby قايتا دىبىستاۋ ستۋدياسىن ارالاپ, «28 پانفيلوۆشى» ءفيلمىنىڭ قازاق تىلىنە دىبىستالۋ جۇمىسىنا كۋا بولدى.
ەستەرىڭىزگە سالا كەتسەك, وتكەن اپتادا پارلامەنت ءماجىلىسىنىڭ جۇمىس توبى وتكىزگەن وتىرىسىندا «قازاقستان رەسپۋبليكاسىنىڭ مادەنيەت ماسەلەلەرىنە قاتىستى بىرقاتار زاڭ اكتىلەرىنە وزگەرىستەر مەن تولىقتىرۋلار ەنگىزۋ تۋرالى» دەپۋتاتتىق زاڭ جوباسى قارالعان بولاتىن. دەپۋتاتتار, كينو مەن تەاتر سالاسىنىڭ ماماندارى, ازاماتتىق قوعام جانە ساياسي پارتيالار وكىلدەرى ەلىمىزدىڭ ادەبيەت جانە كينو, تەاتر, مۋزەيلەرىنىڭ جۇمىس ىستەۋ بارىسى تۋرالى وزگەرىستەر جايىن تالقىلادى. وسى ورايدا 2017 جىلدىڭ 1 قاڭتارىنان باستاپ قازاقستانعا اكەلىنگەن بارلىق فيلمدەردىڭ قازاق تىلىنە دىبىستالۋ ماسەلەسى تالاس تۋدىرعان بولاتىن.
ايناش ەسالي,
«ەگەمەن قازاقستان»
الماتى