الەمدە ادام بالاسىن ولىمگە اكەلەتىن العاشقى فاكتور – جۇرەك-قان تامىرلارى اۋرۋلارى ەكەن. جامبىل وبلىسىندا بيىلعى جىلى كارديوەسەپتە تۇرعاندار سانى – 2101 ادامدى قۇراپ وتىر. 2015 جىلى بۇل كورسەتكىش 2150 بولعان. ال بۇل اۋرۋدان بولاتىن ءولىم-ءجىتىم كورسەتكىشى 2016 جىلى 107,9 پايىزدى كورسەتسە, 2015 جىلى 142,1 پايىزعا جەتكەن ەدى. وسى تۇستا ايتا كەتۋ كەرەك, بۇل كەسەلدىڭ الدىن الۋعا جامبىل وبلىسىندا تاۋلىك بويى جوعارى مامانداندىرىلعان كارديولوگيالىق قىزمەت كورسەتەتىن 3 ورتالىقتىڭ قوسقان ۇلەسى زور.
مىنە, وسى اپتادا تاراز قالاسىنداعى عىلىمي-كلينيكالىق كارديوحيرۋرگيا جانە ترانسپلانتولوگيا ورتالىعىندا وتكەن قازاقستان كارديولوگتارى مەن كارديوحيرۋرگتەرىنىڭ «سوزىلمالى جۇرەك جەتىسپەۋشىلىگى» حالىقارالىق كونگرەسىنىڭ باستى تاقىرىبى وسى بولدى. وعان قازاقستان, بەلارۋس, ءۇندىستان, پاكىستان, تۇرىكمەنستان, قىرعىزستان, سلوۆاكيا, تۇركيا, رەسەي جانە باسقا دا شەتەلدىك ماماندار قاتىسىپ, جۇرەك اۋرۋى جونىندە پىكىرلەر الماسىپ, ءوزارا تاجىريبەلەرىمەن ءبولىستى.
بۇگىنگىدەي زاماناۋي تەحنولوگيانىڭ دامىعان زامانىندا جەر شارى دارىگەرلەرى بىرىگىپ, اۋرۋعا قارسى تۇرىپ, دۇنيە جۇزىندە جۇرەك اۋرۋىنىڭ الدىن-الۋ, ەمدەۋ, وتالاۋ جونىندە جاڭاشا ءادىس-تاسىلدەر جەتىلدىرىلىپ جاتسا دا, بۇل ماسەلە كوكەيكەستى كۇيىندە قالۋدا. الەم دارىگەرلەرى باس قوسقان بۇل كونگرەستە سوزىلمالى جۇرەك جەتكىلىكسىزدىگىن ەرتە دياگنوستيكالاۋ جانە ەمدەۋ ماسەلەلەرى, الدىن الۋ شارالارى تالقىلاندى. سونىمەن قاتار, تمد ەلدەرى ساراپشىلارىنىڭ قاتىسۋىمەن جۇرەك اقاۋى الىنىپ, وعان جاساندى سول جاق قارىنشانى قويۋ جانە يمپلانتاتسيالاۋ جونىندە شەبەرلىك سىنىبى وتكىزىلدى.
عىلىمي-كلينيكالىق كارديوحيرۋرگيا جانە ترانسپلانتولوگيا ورتالىعىنىڭ ديرەكتورى, پروفەسسور سەيىتحان جوشىباەۆتىڭ ايتۋىنا قاراعاندا, مۇنداي شارا كارديولوگيا جانە كارديوحيرۋرگيا سالاسىنىڭ ماماندارى ءۇشىن وتە ماڭىزدى. مەديتسينالىق قىزمەتتەردىڭ ساپاسىن جاقسارتۋعا, كاسىبي دەڭگەيىن ارتتىرىپ, وزىق تەحنولوگيالار سالاسىنداعى تاجىريبە الماسۋعا ۇلكەن مۇمكىندىك بەرەدى. قالاي ايتسا دا, بۇل ءىس-شارا وتاندىق مەديتسينانىڭ دامۋىنا قوسىمشا سەرپىن بەرەرى ءسوزسىز.
ورالحان ءداۋىت,
«ەگەمەن قازاقستان»
جامبىل وبلىسى