قازاقستاندا مۇناي ءوندىرۋ كولەمى 8,9 پايىزعا ارتىپ, تاۋلىگىنە 1,559 ملن. باررەلدى قۇرادى, دەپ حابارلايدى ەگەمەن-اقپارات قازاقپاراتقا سىلتەمە جاساپ.
«وتكەن اپتانىڭ قورىتىندىسى بويىنشا تاۋلىكتىك مۇناي ءوندىرۋ كولەمى 8,9 پايىزعا ارتىپ, تاۋلىگىنە 1,559 ملن. باررەلگە جەتتى. بۇعان قوسا, گاز ءوندىرۋ دە 17,6 پايىزعا ءوسىپ, 122,5 ملن. تەكشە مەترگە جەتىپ وتىر. سوڭعى تاۋلىكتە مۇناي ءوندىرۋ ءوسىمى بارلىق مۇناي ءوندىرۋشى كومپانيالاردا تىركەلگەن», - دەلىنگەن «مۇناي جانە گاز اقپاراتتىق-ساراپتامالىق ورتالىعى» اق تاراتقان اقپاراتتا.
سونىمەن قاتار اتالعان ورتالىق مالىمەتتەرىنە سايكەس, اپتا ىشىندە ەلىمىزدىڭ جەتەكشى 3 مۇناي وڭدەۋ زاۋىتتارىندا مۇناي وڭدەۋ كولەمى 1,7 پايىزعا ازايىپ, تاۋلىگىنە 222,1 مىڭ باررەلگە دەيىن تومەندەگەن. ايتا كەتەرلىگى, مۇناي وڭدەۋ كولەمىنىڭ قىسقارۋىنا شىمكەنت قالاسىنداعى «پەترو قازاقستان ويل پروداكتس» زاۋىتىنىڭ جوسپارلى-ءماجبۇرلى جوندەۋ جۇمىستارىنا بايلانىستى توقتاتىلۋى سەبەپ بولۋدا.
وتكەن اپتا قورىتىندىسىندا ديزەل وتىنىنىڭ ەلىمىزدىڭ وبلىستارىنداعى ورتاشا باعاسى 128,2 تەڭگەنى قۇراعان. بۇل رەتتە ەڭ جوعارى باعا رەسەيمەن شەكتەسەتىن پاۆلودار وبلىسىندا ليترىنە 136,1 تەڭگە, شىعىس قازاقستان وبلىسىندا 133,9 تەڭگە, سولتۇستىك قازاقستان وبلىسىندا 132,4 تەڭگە, باتىس قازاقستان وبلىسىندا 132,4 تەڭگە جانە استانا قالاسىندا 132,2 تەڭگە كولەمىندە بەلگىلەنگەن. مۇنداي جايت رەسەيدەگى ديزەل وتىنىنىڭ ورتاشا باعاسىنىڭ ليترىنە 190 تەڭگە بولۋىنا بايلانىستى ورىن الۋدا. بۇل ترانزيتتىك كولىك قۇرالدارىنىڭ تەك قازاقستان اۋماعىندا جانارماي قۇيۋى ءۇشىن ەكونوميكالىق العىشارت جاساۋدا. ال جەرگىلىكتى جانارماي قۇيۋ بەكەتتەرى جەرگىلىكتى تۇتىنۋشىلار تاپشىلىق كورمەۋى ءۇشىن باعانى كوتەرۋدە.