بەلارۋس ەلىندە ۇلتتىق جينالىستىڭ دەپۋتاتتىق توبى قالىپتاسۋدا. ول بەلارۋس پەن قازاقستاننىڭ ىنتىماقتاستىعىن رەتتەيتىن بولادى. بۇل تۋرالى قازاقستاننىڭ بەلارۋستاعى ەلىشىسى ەرعالي بولەگەنوۆپەن كەزدەسۋىندە التىنشى شاقىرىلىمنىڭ قايتا سايلانعان ۇلتتىق جينالىسىنىڭ پالاتا توراعاسى ۆلاديمير اندرەيچەنكو مالىمدەدى. كەزدەسۋ بارىسىندا تاراپتار قازاقستان-بەلارۋس قارىم-قاتىناسىنىڭ وزەكتى ماسەلەلەرىن تالقىلاپ, پارلامەنتارالىق ىنتىماقتاستىقتى قاراستىردى. ەكى ەلدىڭ ودان ءارى ىنتىماقتاستىعىن حالىقارالىق الاڭداردا نىعايتۋ ماڭىزدىلىعى اتالىپ ءوتتى. تاراپتار ەۋرازيالىق ەكونوميكالىق وداق مۇمكىندىكتەرىن داعدارىسقا دەيىنگى ساۋدا-ەكونوميكالىق ىنتىماقتاستىقتى قالپىنا كەلتىرۋدە قولدانۋدى تالقىلادى. ەلشى اتاپ وتكەندەي, بۇۇ قاۋىپسىزدىك كەڭەسىنىڭ تۇراقتى ەمەس وكىلى رەتىندە قازاقستان 2017-2018 جىلدارعا ارنالعان ستراتەگيالىق جۇمىس جوسپارىن ازىرلەپ جاتىر. بۇل ورايدا بۇۇ-داعى ەكى ەلدىڭ ۇيلەستىرۋ مۇمكىندىكتەرى تۋرالى, ونىڭ ىشىندە حالىقارالىق قاۋىپسىزدىكتى قامتاماسىز ەتۋ مۇمكىندىگىن اتاپ ءوتتى. ە.بولەگەنوۆ قازاقستاندا تاۋەلسىزدىكتىڭ 25 جىلدىعىنا قاتىستى شارالار مەن «ەكسپو-2017» حالىقارالىق مامانداندىرىلعان كورمەسىن وتكىزۋ بارىسى جانە قىسقى ۋنيۆەرسياداعا دايىندىق تۋرالى ايتىپ بەردى. بەلارۋس پارلامەنتىنىڭ تومەنگى پالاتا سپيكەرى ءوز كەزەگىندە قازىرگى تاڭدا ۇلتتىق جينالىستىڭ دەپۋتاتتىق توبى قالىپتاسىپ جاتقانىن, ول بەلارۋس پەن قازاقستاننىڭ ىنتىماقتاستىعىن رەتتەيتىنىن ايتتى. كەزدەسۋ اياسىندا اڭگىمەلەسۋشىلەرگە قر پارلامەنتى سەناتىنىڭ سپيكەرى ق.توقاەۆ پەن پارلامەنت ءماجىلىسىنىڭ توراعاسى نۇرلان نىعماتۋليننىڭ قايتا سايلانۋعا قاتىستى قۇتتىقتاۋلارى تابىستالدى.