وسكەمەن قالاسىندا كونفەدەراتسيا كۋبوگىنىڭ «ۆ» توبىنداعى ىرىكتەۋ كەزەڭى اياقتالدى. بۇل توپتا شىعىس قازاقستان, سولتۇستىك قازاقستان, باتىس قازاقستان جانە اقمولا وبلىستارى ونەر كورسەتتى. ءبىر كۇن ىشىندە وبلىستاردىڭ قۇرامالارى گرەك-ريم, ەركىن كۇرەس, دزيۋدو جانە تاەكۆوندو سپورتىنان ۇزدىكتەردى انىقتادى.
باتىس قازاقستان وبلىسىنىڭ كومانداسى تاەكۆوندودان وسى توپتىڭ جەڭىمپازى اتانىپ, فينالدىق كەزەڭگە جولداما الدى. الدىمەن ولار 71:31 ەسەبىمەن سولتۇستىك قازاقستاننان بارعان سپورتشىلاردان باسىم تۇسسە, ارتىنشا شىعىس قازاقستان قۇراماسىن 34:23 ناتيجەسىمەن جەڭدى.
بوز كىلەمدە قىزىقتى بەلدەسۋلەر ءوتتى. جارىسقا قاتىسىپ جاتقان كوماندالاردىڭ قۇرامىندا تاجىريبەلى سپورتشىلار مەن تالانتتى جاستار ونەر كورسەتتى. شىعىس قازاقستان قۇراماسى بۇل جارىسقا گرەك-ريم كۇرەسىنەن ەكى وليمپياداعا قاتىسقان, ازيا ويىندارىنىڭ جۇلدەگەرى دارحان باياحمەتوۆ پەن ەركىن كۇرەستەن ازيا ويىندارىنىڭ جۇلدەگەرى, ازيا چەمپيونى راسۋل قاليەۆتى شىعاردى. توپتىق كەزەڭنىڭ قورىتىندىسى بويىنشا گرەك-ريم كۇرەسىنەن سولتۇستىك قازاقستان قۇراماسى جەڭىسكە جەتتى. ءبىرىنشى كەزدەسۋىندە ولار شىعىس قازاقستان كومانداسىن جەڭىپ, ودان كەيىن بقو جانە اقمولا وبلىسى قۇرامالارىن تىزە بۇكتىردى. ەركىن كۇرەستەن شىعىس قازاقستان وبلىسى جەڭىمپاز اتاندى. ولار ءۇش كەزدەسۋىندە دە قارسىلاستارىن 6:0 ەسەبىمەن تاس-تالقان ەتتى.
دزيۋدوشىلاردىڭ جارىسىندا تاتامي قوجايىندارىنا تەڭ كەلەر ەشكىم بولمادى. قۇرامىندا داستان ىقىباەۆ سىندى تاجىريبەلى سپورتشىسى بار شىعىس قازاقستان قۇراماسى بارلىق كەزدەسۋلەرىن سەنىمدى جەڭىسپەن اياقتادى.
ەستەرىڭىزگە سالا كەتەيىك, 18 قازاندا «س» توبىنىڭ ىرىكتەۋ كەزەڭى شىمكەنت قالاسىندا ءوتىپ, وڭتۇستىك قازاقستان قۇراماسى گرەك-ريم جانە ەركىن كۇرەستەن, تاەكۆوندودان جەڭىسكە جەتىپ, فينالدىق كەزەڭگە شىقتى. ال دزيۋدودان قاراعاندى وبلىسى جەڭىمپاز اتانعان بولاتىن. الدا ەكى توپتىڭ ىرىكتەۋ كەزەڭى بار. 30 قازاندا تاراز قالاسىندا «D» توبىنىڭ جارىسى وتسە, 6 قاراشادا «ا» توبى قىزىلوردادا جارىسادى.
كونفەدەراتسيا كۋبوگى – تيمۋر ق ۇلىباەۆتىڭ باستاماسىمەن قولعا الىنعان جاڭا جوبا. جارىستىڭ جالپى جۇلدە قورى – 125 ميلليون تەڭگە. فينالدىق كەزەڭ 3-4 جەلتوقساندا الماتى قالاسىندا وتەدى.