ەلوردادا گەنەرال ساعادات نۇرماعامبەتوۆ اتىنداعى «جاس ۇلان» رەسپۋبليكالىق اسكەري مەكتەبىنە جاڭادان قابىلدانعان 10-سىنىپ ۇلاندارىنىڭ سالتاناتتى تۇردە انت قابىلداۋ ءراسىمى ءوتتى.
اسكەري كيىمدەرى بويلارىنا جاراسقان, سىمداي تارتىلعان 62 ۇلان ساپ تۇزەپ, ارنايى ءازىرلەنگەن كەڭ زالعا ەندى.
ورتاعا كوك بايراعىمىز اكەلىنىپ, ىلە ءانۇران شىرقالعاننان كەيىن ۇلانداردىڭ انت قابىلداۋ ءراسىمى باستالدى. اتى-جوندەرى اتالعان ساتتە ساپتان العا نىق باسىپ شىعىپ, انت ءماتىنىن مانەرلەپ وقىعان جاس ءوسكىندەردىڭ سەنىمدى دە اشىق داۋىسى قۇلاققا جاعىمدى ەستىلەدى, جۇرەگىڭە جىلى تيەدى.
جيىن بارىسىندا اسكەري مەكتەپ باسشىسى, پولكوۆنيك مۇحتار مايكەەۆپەن از-كەم سۇحباتتاسۋعا مۇمكىندىك بولدى. ءبىزدىڭ قويعان ساۋالىمىزعا وراي مەكتەپ باسشىسى: «مەملەكەت باسشىسىنىڭ باستاماسىمەن قۇرىلعان, 1999 جىلدىڭ 4 قاراشاسىندا رەسمي تۇردە اشىلعان «جاس ۇلان» رەسپۋبليكالىق اسكەري مەكتەبى – ەلىمىزدىڭ قارۋلى كۇشتەرى سالاسىنا قىزمەت ەتۋدى ماقسات ەتكەن جەتكىنشەكتەردى تاربيەلەۋدە ءوزىندىك ورنى بار ءبىلىم وشاعى. تاۋەلسىز قازاقستاننىڭ قارۋلى كۇشتەرى ءۇشىن اسكەري قىزمەتكەرلەردى مەكتەپ قابىرعاسىنان دايىنداۋ ىسىنە ەلباسى نۇرسۇلتان نازارباەۆتىڭ ايرىقشا كوڭىل ءبولىپ كەلە جاتقانىنىڭ ارقاسىندا بۇل ءاسكەري مەكتەپ جاقسى جاقتارىمەن كورىنىپ كەلەدى. قۇرىلعالى بەرگى 17 جىلدىڭ ىشىندە 700-دەن استام جاس تۇلەكتى ءتاربيەلەپ شىعارعان مەكتەپتىڭ تۇساۋىن ەلباسىنىڭ ءوزى كەسكەنى, سونداي-اق, ءبىلىم ۇياسىنا كەڭەس وداعىنىڭ باتىرى, حالىق قاھارمانى, قازاق حالقىنىڭ اتى اڭىزعا اينالعان پەرزەنتى, تاۋەلسىز قازاقستاننىڭ تۇڭعىش قورعانىس مينيسترى, ارميا گەنەرالى ساعادات نۇرماعامبەتوۆ ەسىمىنىڭ بەرىلۋى ءبىزدىڭ ۇجىمعا ۇلكەن جاۋاپكەرشىلىك جۇكتەيدى. مىنە, وزدەرىڭىز كۋا بولىپ وتىرعانداي, مەكتەبىمىزگە بيىل قابىلدانعان 62 وقۋشى انت قابىلداۋ ۇستىندە. بۇل شارانىڭ ماڭىزى وتە زور. ويتكەنى, شاكىرتتەرىمىز وسى انت قابىلداۋ ارقىلى وزدەرىنىڭ اسا جاۋاپتى جولدى تاڭداعاندارىن تەرەڭ سەزىنە تۇسەدى, – دەدى.
ودان ءارى پولكوۆنيك م.مايكەەۆ 2015 جىلدان باستاپ قابىلداۋ ەرەجەسىنە وزگەرتۋلەر ەنگىزىلىپ, مەكتەپكە 10-سىنىپتان باستاپ وقۋشىلار قابىلداناتىنىن, مەكتەپ جارعىسىنا سايكەس اسكەري پاندەر جانە كۇشەيتىلگەن دەنە دايىندىعى, مەملەكەتتىك جانە شەت تىلدەرى تەرەڭدەتىلىپ وقىتىلاتىنىن, مۇندا 420 تاربيەلەنۋشىگە ءبىلىم بەرۋ قاراستىرىلعانىن اتاپ ءوتتى. سونىمەن بىرگە, ول مەكتەپتى بىتىرۋشىلەردىڭ 80 پايىزى قازاقستان رەسپۋبليكاسى قورعانىس مينيسترلىگىنىڭ, رەسەي, بەلارۋس, ءتۇركيا مەملەكەتتەرىنىڭ جوعارى اسكەري وقۋ ورىندارىندا ءبىلىم الىپ جاتقانىن جەتكىزدى. ونىڭ سوزىنە قاراعاندا, قازىرگى تاڭدا مەكتەپتە ەلىمىزدىڭ 14 وبلىسىنان, استانا, الماتى قالالارىنان كەلگەن تاربيەلەنۋشىلەر, 14 ۇلتتىڭ وكىلدەرى ءبىلىم الۋدا. مەكتەپتە تاربيەلەنۋشىلەردىڭ قۇرامىندا جەتىم بالالار, قامقورلىققا الىنعان وسكىندەر, كوپ بالالى وتباسىنىڭ پەرزەنتتەرى, اتا-انالارى مۇگەدەك جەتكىنشەكتەر, اسكەري قىزمەتشىلەردىڭ بالالارى بار. بۇلار ءتاربيەلەنۋشىلەردىڭ جالپى سانىنىڭ 50 پايىزىن قۇرايدى ەكەن.
انت قابىلداۋ ءراسىمى اياقتالعان سوڭ قورعانىس مينيسترلىگىنىڭ وكىلدەرى, ارداگەرلەر, ۇستازدار مەن اتا-انالار ءسوز سويلەپ, جاس ۇلاندارعا تابىس تىلەپ, اق تىلەكتەرىن ارنادى. ءوز كەزەگىندە انت قابىلداعان جاس ورەندەر دە قورعانىس مينيسترلىگىنىڭ باسشىلىعى مەن ۇستازدارىنا العىستارىن ءبىلدىرىپ, تاۋەلسىز قازاقستاننىڭ جاس وتان قورعاۋشىلارى رەتىندە تالاپ ۇدەسىنەن شىعاتىندارىنا سەنىم بىلدىرەدى.
بۇدان كەيىن وقۋعا جاڭادان قابىلدانعان 4-وقۋ-روتاسى ۇلاندارىنان قۇرالعان كوركەمونەرپازدار توبى كەلگەن قوناقتار مەن اتا-انالارعا ارناپ كونتسەرتتىك باعدارلاما ۇسىندى. سوڭىندا ارنايى شاقىرىلعان قوناقتار مەن اتا-انالار مەكتەپتىڭ جالپى جاعدايىمەن تانىستى.
جولدىباي بازار,
«ەگەمەن قازاقستان»
استانا
سۋرەتتەردى تۇسىرگەن
ورىنباي بالمۇرات