بۇرناعى كۇنى قۇرلىقتىق حوككەي ليگاسىنىڭ تۇراقتى چەمپيوناتىندا «بارىس» نيجنەكامسكىنىڭ «نەفتەحيميگىمەن» كەزدەسىپ, 5:4 ەسەبىمەن جەڭىسكە جەتتى.
بۇل ماتچتا ەسەپتى رەسەيلىكتەر اشتى. ويىنشى باسىمدىعىن ءساتتى پايدالانعان نيجنەكامسكىلىكتەر 6-مينۋتتا يگور پولىگالوۆتىڭ ارقاسىندا العا شىقتى. الايدا, 16-مينۋتتا ايدىن يەلەرى مارتين سەن-پەردىڭ كومەگىمەن تارازى باسىن تەڭەستىرىپ كەتتى.
ەكىنشى كەزەڭ «بارىستىڭ» شابۋىلىمەن باستالدى. كەزدەسۋدىڭ 21-مينۋتىندا كيم باركەر مەرگەندىگىمەن كوزگە ءتۇسىپ, كومانداسىن العا شىعاردى. بىراق, بۇل گولدان كەيىن ەدۋارد زانكوۆەتس شاكىرتتەرىنىڭ قارقىندارى باسەڭدەپ قالدى. ەسەسىنە, قوناقتار شابۋىلدارىن ۇدەتىپ, 7 مينۋتتا ءۇش شايبا سوعىپ كەتتى. الدىمەن, 29-مينۋتتا الەكساندر كيتاروۆ ەسەپتى تەڭەستىرسە, 31-مينۋتتا دجەففري كينرەيد كومانداسىن العا شىعاردى. ال 36-مينۋتتا ريحاردا گيۋنگە ەسەپتى 4:2-گە جەتكىزدى.
وسىدان كەيىن عانا «بارىس» حوككەيشىلەرى جيناقىلىق تانىتىپ, جۇيەلى ويناي باستادى. اسىرەسە, كيم باركەر, نايدجەل دوۋس, برەندون بوچەنسكي ۇشتىگى قارسىلاستاردىڭ قاقپاسىن نىساناعا الۋدى جيىلەتتى. سونداي ۇرىمتال ساتتەردىڭ ءبىرىن ۇتىمدى پايدالانعان بوچەنسكي 39-مينۋتتا ناتيجەلى سوققى جاساپ, ەسەپ ايىرماسىن قىسقارتتى.
كەزدەسۋدىڭ سوڭىندا الاڭ يەلەرى قارقىندارىن ودان ءارى كۇشەيتە ءتۇستى. شابۋىلدا دا ساۋاتتى قيمىلداعان استانالىقتار ويىننىڭ 48-مينۋتىندا ەسەپتى 4:4-كە جەتكىزدى. بۇل جولى تابلوعا «بارىس» ساپىنداعى جاڭا ويىنشىلاردىڭ ءبىرى نيكيتا يۆانوۆتىڭ ەسىمى جازىلدى. ال ويىننىڭ اياقتالۋىنا 4 مينۋت قالعاندا, استانالىقتار بەسىنشى شايبالارىن سوعىپ, جەڭىسكە جەتتى. گولدىڭ اۆتورى – كانادالىق لەگيونەر كوري تريۆينو.
وسى جەڭىستەن كەيىن «بارىس» 7 ۇپايمەن شىعىس كونفەرەنتسياسىندا 12-ورىنعا جايعاستى. استانالىقتار كەلەسى كەزدەسۋلەرىن دە ءوز ايدىندارىندا وتكىزەدى. بۇگىن بولاتىن ويىندا «بارىس» قازاننىڭ «اك بارسىمەن» سىنعا تۇسەدى.
اتالعان ماتچتان كەيىن ىلە-شالا «نەفتەحيميكتىڭ» باس جاتتىقتىرۋشىسى وتستاۆكاعا جىبەرىلگەنى دە بەلگىلى بولىپ وتىر.