ەلورداداعى ماڭعىستاۋ وبلىسى كۇندەرى اياسىندا ماڭعىستاۋ وبلىستىق تاريحي-ولكەتانۋ مۋزەيىنىڭ «جاڭعىرعان اسىل مۇرا» جانە وبلىستىق كىتاپحانانىڭ «ءتۇپ-توركىنىن تورگە وزدىرعان ماڭعىستاۋ» اتتى كورمەلەرى اشىلدى.
«جاڭعىرعان اسىل مۇرا» كورمەسى استانالىقتاردى « ۇلىستىڭ ۇرانى – ءپىر بەكەت», «ماڭعىستاۋدىڭ ءداستۇرلى قولدانبالى ونەرى», «تۇبەك تابيعاتىنىڭ تاڭعاجايىپتارى» جانە «ماڭعىستاۋ وبلىسىندا جۇرگىزىلگەن ارحەولوگيالىق جۇمىستار» اتتى بولىمدەر بويىنشا ءوڭىردىڭ قازىناسىمەن تانىستىردى.
«ءتۇپ توركىنىن تورگە وزدىرعان ماڭعىستاۋ» اتتى كورمەدە ماڭعىستاۋ وبلىسىنىڭ ەل تاۋەلسىزدىگىنىڭ 25 جىلدىعىندا جەتكەن جەتىستىكتەرى, ءوڭىردىڭ تاريحى مەن اكىمشىلىك-اۋماقتىق كارتاسى, اۋىل شارۋاشىلىعىنىڭ, مەديتسيناسىنىڭ, مادەنيەتىنىڭ دامۋى تۋرالى مالىمەت بەرەتىن ءباسپاسوز ماتەريالدارى مەن كىتاپتارى قامتىلدى. كورمە تۋرالى وبلىستىق كىتاپحانانىڭ ادىسكەرى نۇرگۇل ەڭسەگەنوۆا: «ءبىز كورمەگە كوبىندە سالالىق كىتاپتار اكەلدىك. وبلىسىمىزدىڭ جەتىستىكتەرى جايىندا سوڭعى جىلدارى شىققان ەنتسيكلوپەديالىق كىتاپتار كوپ. سولاردى قامتۋعا تىرىستىق. ال وڭىرىمىزدەن شىققان اقىن-جازۋشىلارعا كەلەتىن بولساق, «ماڭعىستاۋ اقىن-جازۋشىلارىنىڭ كىتاپحاناسى» سەرياسىمەن 50 توم كىتاپ شىققانىن بىلەسىزدەر. سونداي-اق, «ءتىل تاڭبالى اقىندار» اتتى 5 تومدىق كىتاپ جارىق كورگەن. ءبىز سولاردى كورمەگە قويدىق» – دەدى. كورمە سوڭى ماڭعىستاۋ وبلىسى ونەر شەبەرلەرىنىڭ گالا-كونتسەرتىنە ۇلاستى. كونتسەرتتىك باعدارلامادا كورەرمەندەر ءوڭىردىڭ كەڭىنەن تانىمال, جان-جاقتى مۋزىكالىق جانرداعى, ءارتۇرلى باعىتتاعى اسپاپتى جانە ۆوكالدى مەكتەپتەر ونەرپازدارىنىڭ ونەرىن تاماشالادى.
ايتا كەتەيىك, ماڭعىستاۋ وبلىسى كۇندەرى اياسىندا م.گوركي اتىنداعى مەملەكەتتىك اكادەميالىق ورىس دراما تەاترىندا جازۋشى ءا.كەكىلباەۆتىڭ «شىڭىراۋ» پوۆەسىنىڭ جەلىسى بويىنشا «شىڭىراۋ» دراماسى ساحنالاندى. درامانىڭ قويۋشى رەجيسسەرى – ساحا رەسپۋبليكاسىنىڭ ەڭبەگى سىڭگەن ونەر قايراتكەرى, «زولوتايا ماسكا» تەاتر سىيلىعىنىڭ لاۋرەاتى بىيامان ۋولا سەرگە وبوكۋن.
***
اقتوبە وبلىسىنىڭ ەلورداداعى كۇندەرى اياسىندا وبلىس اكىمى بەردىبەك ساپارباەۆ ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە اقتوبە وبلىسىنىڭ جاستارىمەن كەزدەستى.
اكىمنىڭ مالىمەتى بويىنشا وبلىستا 7 مىڭ جۇمىس ورنى اشىلعان. ۇدەمەلى يندۋستريالىق-يننوۆاتسيالىق دامۋ باعدارلاماسى بويىنشا قۇنى 12 ملرد 800 ملن دوللار تۇراتىن بەس جوبا ىسكە قوسىلعان. ال وبلىس حالقىنىڭ 27 پايىزى جاستار. «اقتوبە قالاسىندا كاسىپكەرلەردىڭ قارجىسىنا 100 ورىندىق جاتاقحانا سالىنىپ جاتىر. وعان قوسىمشا «جۇمىسپەن قامتۋدىڭ جول كارتاسى-2020» باعدارلاماسىنىڭ اياسىندا 70 ورىندىق جاتاقحانا سالىنۋدا. وسى جىلدىڭ سەگىز ايىندا 334 جاستى جۇمىسقا ورنالاستىردىق, – دەگەن وبلىس اكىمى جاستاردى اقتوبەگە جۇمىسقا شاقىردى.
ەلورداداعى اقتوبە وبلىسىنىڭ كۇندەرى اياسىندا بىرقاتار مادەني شارالار ءوتتى. استاناداعى قر قارۋلى كۇشتەرىنىڭ اسكەري-تاريحي مۋزەيىندە قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان تاقىرىپتىق كورمە ۇيىمداستىرىلدى. قالالىق جاستار تەاترىنىڭ ساحناسىندا استانالىق كورەرمەندەر قۋاندىق شاڭعىتباەۆتىڭ «بەۋ, قىزدار-اي» كومەدياسى مەن جابال ەرعاليەۆتىڭ «ەسىگىمدى قاققان كىم» دراماسىن تاماشالادى. سونداي-اق, م.وتەمىس ۇلى اتىنداعى وقۋشىلار سارايىندا اقتوبە وبلىستىق «الاقاي» قۋىرشاق تەاترى ونەر كورسەتتى. استانا قالالىق اكىمدىگىنىڭ الدىندا كاسىبي سۋرەتشىلەر مەن مۇسىنشىلەردىڭ, اقتوبە قالالىق بالالار كوركەمونەر ليتسەيى تاربيەلەنۋشىلەرىنىڭ جارمەڭكە-كورمەسى ۇسىنىلدى. بەينەلەۋ ونەرىنىڭ ءارتۇرلى تاسىلدەرىندە ورىندالعان شىعارماشىلىق تۋىندىلار كەلۋشىلەردىڭ قىزىعۋشىلىعىن تۋعىزدى. كەشكە كونگرەسس-حولل سارايىندا اقتوبە وبلىستىق ونەر شەبەرلەرىنىڭ گالا-كونتسەرتى ۇيىمداستىرىلدى.
ايگۇل سەيىلوۆا,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات