ورتالىق كوممۋنيكاتسيالار قىزمەتىنىڭ بريفينگى «قازاقستان» ۇلتتىق ارناسى ەفيرىنەن 12 قىركۇيەك كۇنى كورەرمەنگە جول تارتقان «ايمان-شولپان» تەلەحيكاياسىنا ارنالدى.
فيلم دۇنيە ەسىگىن اشقان ساتتەن ءومىر جولدارى قوس ايىرىلعان, ەكى ءتۇرلى الەۋمەتتىك ورتادا تاربيەلەنگەن ەگىز قىزدار ايمان مەن شولپان تاعدىرى نەگىزىندە قۇرىلىپ, سيۋجەت جەلىسىنە ارقايسىسىنىڭ قوعامداعى ورنى, ومىرگە دەگەن قاراما-قايشى كوزقاراسى مەن وي-تۇيسىگى ارقاۋ بولعان. جيىن بارىسىندا بۇل تۋرالى «قازاقستان» ۇلتتىق ارناسىنىڭ باسقارما ءتورايىمى نۇرجان مۇحامەدجانوۆا ايتىپ ءوتتى.
بريفينگ بارىسىندا ءفيلمنىڭ پروديۋسەرى رۋستام ازاماتوۆ, قويۋشى-رەجيسسەرى ارمان ساندىباەۆ جانە باستى رولدەگى اكتريسا سالتانات باقاەۆا ءسوز الىپ, جۋرناليستەردىڭ سۇراقتارىنا جاۋاپ بەردى.
كورەرمەندەردى باستى رولدەگى اكتريسا سالتانات باقاەۆانىڭ بىردەن ەكى ءتۇرلى وبرازدى سومداعانى قىزىقتىراتىنى راس. بۇل تۋرالى اكتريسا: «العاشىندا ماعان ءبىر مەزەتتە ەكى ءتۇرلى حاراكتەردەگى كەيىپكەرلەردى سومداۋ قيىن ءارى قىزىق بوپ كورىندى. بىراق, جاقسى دايىندىقتان سوڭ رولدەردى يگەردىم دەپ ويلايمىن. ءتۇسىرىلىم بارىسىندا ءبىر رولدەن ەكىنشىسىنە اۋىسقاندا دەرەۋ كيىمدەرىڭدى, ماكياجدى وزگەرتۋ وڭاي عوي. سوعان قوسا جان-دۇنيەڭدى «وزگەرتۋ» ءبىراز قيىنداۋ», – دەيدى.
ايتا كەتەيىك, «ايمان-شولپان» 100 سەريادان تۇراتىن حيكايا. وتباسى قۇندىلىقتارىن دارىپتەۋ, وتباسى ينستيتۋتىن نىعايتۋ ماقساتىندا تۇسىرىلگەن.
ايگۇل سەيىلوۆا