* 9 شىلدەدە اباي اتىنداعى قازاق مەملەكەتتىك وپەرا جانە بالەت تەاترىندا سۇلتانماحمۇت تورايعىروۆتىڭ تۋعانىنا 100 جىل تولۋىنا ارنالعان سالتاناتتى كەش ۇيىمداستىرىلدى.
*20-23 شىلدە ارالىعىندا ەلباسى نۇرسۇلتان نازارباەۆتىڭ تايلاند كورولدىگىنە رەسمي ساپارى بولدى. تايلاند پرەمەر-ءمينيسترى چۋان ليتپايمەن كەزدەسۋ كەزىندە ەكى ەل اراسىنداعى قارىم-قاتىناستارعا بايلانىستى ماسەلەلەر كەڭ اۋقىمدا تالقىلاندى. سونداي-اق, قازاقستان پرەزيدەنتى تايلاند كورولى پۋميپون ادۋليادەتپەن (راما ءىح) كەزدەستى.
*28 شىلدەدە وزبەكستان پرەزيدەنتى يسلام كاريموۆ قىسقا مەرزىمدى جۇمىس ساپارىمەن الماتىعا كەلدى. نۇرسۇلتان نازارباەۆ پەن يسلام كاريموۆ ەكى ەلدىڭ جاقىنداسا ءتۇسۋى ءۇشىن مۇمكىندىكتەر مول ەكەنىن اتاپ كورسەتتى.
* 7 تامىزدا ماسكەۋدە ەلباسى نۇرسۇلتان نازارباەۆ پەن رەسەي باسشىسى بوريس ەلتسيننىڭ باستاماسى بويىنشا بەس مەملەكەت – قازاقستان, قىرعىزستان, رەسەي فەدەراتسياسى, ءتاجىكستان جانە وزبەكستان باسشىلارى كەزدەستى. كەلىسسوز بارىسىندا تاۋەلسىز مەملەكەتتەر دوستاستىعى ءۇشىن ماڭىزى بار بىرقاتار ماسەلەلەر تالقىلاندى. بۇل تۋرالى «ەگەمەن قازاقستان» گازەتىنىڭ 10 تامىز كۇنگى نومىرىندە «ورتالىق ازيا مەملەكەتتەرى مەن رەسەيدىڭ ىنتىماقتاستىعى كۇشەيە تۇسەدى» تاقىرىبىمەن ماقالا جاريالاندى.
* 12 تامىزدا اباي اتىنداعى وپەرا جانە بالەت تەاترىندا قازاقتىڭ كورنەكتى اقىنى ماعجان جۇماباەۆتىڭ تۋعانىنا 100 جىل تولۋىنا ارنالعان سالتاناتتى كەش ءوتتى.
*22 تامىزدا قازاق حالقىنىڭ داڭقتى پەرزەنتى, رەسپۋبليكانى شيرەك عاسىرعا جۋىق ۋاقىت بويى باسقارعان اسا كورنەكتى مەملەكەت جانە قوعام قايراتكەرى دىنمۇحامەد احمەت ۇلى قوناەۆ 82 جاسقا قاراعان شاعىندا قايتىس بولدى.
* 25 تامىزدا قازاقستان حالقى د.ا. قوناەۆتى سوڭعى ساپارعا شىعارىپ سالدى.
* 26 تامىزدا كوكشەتاۋدا قازاقستان, وزبەكستان, قىرعىزستان پرەزيدەنتتەرى – نۇرسۇلتان نازارباەۆ, يسلام كاريموۆ پەن اسقار اقاەۆ كەزدەستى. مەملەكەت باسشىلارى استىق پەن گاز جەتكىزىلىمى تۋرالى ۋاعدالاستىق جاسادى.
*28 تامىزدا پرەزيدەنت نۇرسۇلتان نازارباەۆتىڭ الماتىدا وتكەن يادرولىق قارۋعا قارسى حالىقارالىق كونگرەسكە قاتىسۋشىلارعا قۇتتىقتاۋى جاريالاندى. «وسىدان تۋرا 44 جىل بۇرىن سەمەي پوليگونىندا جاسالعان العاشقى يادرولىق جارىلىستان كەيىن ءبىزدىڭ حالقىمىزدىڭ «اتومدىق ءومىرىنىڭ» قايعىلى كەزەڭى باستالدى. جىل وتكەن سايىن ادامداردىڭ دەنساۋلىعىنىڭ نەگىزى كۇيرەپ, نازىك تابيعي ورتا بۇزىلا بەردى. ءتان ازابى دا, رۋحاني قاسىرەت تە ءبىزدىڭ جۇرەگىمىزدى ءالى كۇنگە سىزداتۋدا. يادرولىق ەسۋاستىقتىڭ بۇكىل ادامزات بالاسىنا قانداي قيساپسىز شىعىندار مەن ورنى تولماس قۇرباندىقتار اكەلەتىنىن ءبىز بىلەمىز», – دەلىنگەن ەلباسى قۇتتىقتاۋىندا.
*10 قىركۇيەكتە رەسەي مادەنيەتىنىڭ قازاقستانداعى كۇندەرى باستالدى. ەكى ەلدىڭ مادەنيەت قايراتكەرلەرىنە جولداعان قۇتتىقتاۋىندا ەلباسى نۇرسۇلتان نازارباەۆ رەسەي مادەنيەتى كۇندەرىن وتكىزۋدىڭ قانداي دا ءبىر وتكىنشى ساتكە ساياسي قۇرمەت ءبىلدىرۋ, نە الدەبىر ەسەپ تۇرعىسىنان ۇپاي جيناۋ ماقساتىندا ەمەس, ناعىز جاقسى كورشى-دوستاردىڭ جۇرەك قالاۋىنان تۋىنداپ وتىرعاندىعىن اتاپ كورسەتتى.
* 15 قىركۇيەكتە الماتىدا تۇركى پوەزياسىنىڭ ەكىنشى فەستيۆالى اشىلدى. فەستيۆالعا قاتىسۋشىلاردى قازاقستان پرەزيدەنتى نۇرسۇلتان نازارباەۆ قۇتتىقتادى.
* 17 قىركۇيەكتە فرانتسيا پرەزيدەنتى فرانسۋا ميتتەران قازاقستانعا رەسمي ساپارمەن كەلدى. كەلىسسوز بارىسىندا ن.نازارباەۆ پەن ف.ميتتەران ساياسي, ەكونوميكالىق, مادەني, عىلىمي جانە باسقا دا سالالاردا ەكى جاقتى ىنتىماقتاستىقتى بۇدان ءارى دامىتۋ نيەتتەرىن ءبىلدىردى.
* 29 قىركۇيەكتە پرەزيدەنت جانىنداعى مەملەكەتتىك ساياسات جونىندەگى
ۇلتتىق كەڭەستىڭ ءماجىلىسى وتكىزىلىپ, وندا قازاقستان قوعامىنىڭ يدەيالىق توپتاسۋ ماسەلەلەرى قارالدى. كەڭەستە ءسوز سويلەگەن نۇرسۇلتان نازارباەۆ بەلگىلى ءبىر يدەولوگيالىق باعدارلارسىز بىردە-ءبىر دەربەس مەملەكەت ءومىر سۇرە المايتىندىعىن اتاپ كورسەتتى.
*2 قازاندا «قازاقستان حالىق بىرلىگى» وداعىنىڭ ءبىرىنشى سەزى ءوتتى. ەلباسى نۇرسۇلتان نازارباەۆ سەزدە ءسوز سويلەدى. «وداقتىڭ بۇقارامەن جۇمىس ىستەۋدىڭ ايقىن بەينەلەنگەن يدەولوگيالىق باعدارلاماسى بولۋى ءتيىس. بۇل ولاردىڭ مەملەكەتتىڭ بولاشاعىن سەزىنىپ, ماقساتتار مەن مىندەتتەرىن تۇسىنۋىنە كومەكتەسەدى. يدەيالىق باعدارلاردىڭ دوگمالارعا ەمەس, ءومىردىڭ اقيقات شىندىعىنا سۇيەنگەنى ماڭىزدى», دەدى پرەزيدەنت.
* 9 قازاندا «ەگەمەن قازاقستان» گازەتىندە قازاقستان پرەزيدەنتى نۇرسۇلتان نازارباەۆتىڭ «قازاقستاننىڭ بولاشاعى – قوعامنىڭ يدەيالىق ءبىرلىگىندە» اتتى ەڭبەگى جاريالاندى. بۇل ەڭبەكتە پرەزيدەنتتىڭ رەفورمالاردىڭ پرينتسيپتى باعىتتارى مەن مازمۇنى جونىندەگى كوزقاراستارى ايتىلىپ, جۇرتشىلىققا الداعى كەلەشەكتىڭ ماقساتى ءتۇسىندىرىلگەن.
* 12 قازاندا جوعارعى كەڭەستىڭ 11-ءشى سەسسياسى جۇمىسىن باستادى. سەسسيانىڭ العاشقى كۇنى پرەزيدەنت نۇرسۇلتان نازارباەۆ رەسپۋبليكاداعى الەۋمەتتىك-ەكونوميكالىق جاعداي جانە جۇرگىزىلىپ جاتقان رەفورمالاردى جانداندىرۋ تۋرالى بايانداما جاسادى. «الدىمىزدا تۇرعان مىندەتتەردىڭ اسا وتكىرلىگىنە قاراماستان, قازاقستاننىڭ ەگەمەن مەملەكەت رەتىندە قالىپتاسۋى تۇرلاۋلى سيپات الدى دەپ نىق ايتۋعا بولادى. ءبىزدىڭ ىلگەرىلەۋىمىزدىڭ باستى دا سەنىمدى نەگىزى ۇلتارالىق بىرلىك, تۇراقتىلىق, توپتاسۋ, حالىقتىڭ رۋحاني كەلىسىمى بولىپ تابىلاتىنى ءسوزسىز. بۇل – قازاقستانداعى رەفورمالاۋ مەن پروگرەستىڭ ماڭىزدى شارتى, باستاۋ الار كوزى», دەدى ەلباسى.
* 18 قازاندا پرەزيدەنت ن.ءا.نازارباەۆ رەسمي ساپارمەن بەيجىڭگە باردى. 21 قازانعا دەيىن بولعان بۇل ساپار بارىسىندا نۇرسۇلتان نازارباەۆ قحر توراعاسى تسزيان تسزەمينمەن كەزدەستى. كەلىسسوزدەردىڭ ناتيجەسىندە قازاقستان مەن قحر اراسىنداعى دوستىق قارىم-قاتىناس نەگىزدەرى تۋرالى بىرلەسكەن دەكلاراتسياعا, سونداي-اق, اۋە قاتىناستارى تۋرالى, تۇرعىندارعا ۆيزالاردى راسىمدەۋ تارتىپتەرى تۋرالى, حالىقارالىق اۆتوكولىك قاتىناستارى تۋرالى, قىزمەت بابىمەن ازاماتتاردىڭ ساپارلارى تۋرالى كەلىسىمدەرگە قول قويىلدى.
* 21 قازاندا قازاقستان پرەزيدەنتى نۇرسۇلتان نازارباەۆ موڭعولياعا رەسمي ساپارمەن باردى. مەملەكەت باسشىسى موڭعوليا پرەزيدەنتى پۋنسالمااگين وچيرباتپەن كەزدەسىپ, ەكىجاقتى كەلىسسوزدەر جۇرگىزدى.
*24 قازاندا پرەزيدەنت ن.نازارباەۆ ەلىمىزگە رەسمي ساپارمەن كەلگەن اقش-تىڭ مەملەكەتتىك حاتشىسى ۋوررەن كريستوفەردى قابىلدادى. كەزدەسۋ بارىسىندا تاراپتار ەكىجاقتى قارىم-قاتىناس پەن بىرقاتار حالىقارالىق ماسەلەلەرگە توقتالدى. اقش سىرتقى ساياسات ۆەدومستۆوسىنىڭ باسشىسى قازاقستاننىڭ ايماقتاعى بەيبىتشىلىك پەن قاۋىپسىزدىكتى نىعايتۋداعى ماڭىزدى ءرولىن جوعارى باعالادى.