ءبىلىم جانە عىلىم مينيسترلىگىنىڭ جاۋاپتى حاتشىسى ءامىرحان راحىمجانوۆ جۇمىس ساپارىمەن قورقىت اتا اتىنداعى قىزىلوردا مەملەكەتتىك ۋنيۆەرسيتەتىندە بولىپ, بىرقاتار نىسانداردى ارالادى. بۇل تۋرالى اتالعان ۋنيۆەرسيتەتتىڭ ءباسپاسوز قىزمەتى حابارلادى.
جاۋاپتى حاتشى الدىمەن وقۋ ورنىنىڭ «ارحەولوگيا جانە ەتنوگرافيا» عىلىمي-زەرتتەۋ ورتالىعىنىڭ كورمە زالىندا ايالداپ, سىر وڭىرىندەگى ارحەولوگيالىق جانە تاريحي-مادەني ەسكەرتكىشتەردىڭ زەرتتەلۋ تاريحىمەن تانىستى. ولكەدە وركەندەگەن ارحەولوگيالىق مادەنيەتتەرگە بايلانىستى دايىندالعان ارنايى تاقىرىپتىق ستەندتەر مەن قازبا جۇمىستارى ناتيجەسىندە تابىلعان جادىگەرلەردى ارالاپ كوردى. سونىمەن قاتار, «ەلباسى جانە تاۋەلسىز قازاقستان» وقۋ-كورمە زالى, «فيزيكا-حيميالىق تالداۋ ادىستەرى» ينجەنەرلىك بەيىندەگى زەرتحانا مەن مۇراجايدى ارالاپ, ماتەريالدىق-تەحنيكالىق بازاسىمەن, ۋنيۆەرسيتەت عالىمدارىنىڭ عىلىمي جوبالارىمەن تانىستى.
ءوز كەزەگىندە ۋنيۆەرسيتەت رەكتورى, تەحنيكا عىلىمدارىنىڭ دوكتورى, پروفەسسور قىلىشباي بيسەنوۆ ۋنيۆەرسيتەتتىڭ ميسسياسى, ءبىلىم بەرۋ قىزمەتى مەن عىلىمي الەۋەتى جانە حالىقارالىق بايلانىسى جونىندە بايانداپ بەردى.
مۇنان سوڭ اتالعان مينيسترلىك وكىلى وقۋ ورداسىنىڭ وقىتۋشى قۇرامىمەن كەزدەسىپ, ءبىلىم بەرۋ باعىتىنداعى وزەكتى ماسەلەلەردى تالقىلادى.
تالعات رايىمبەك