ءباھادۇر مەكتەبىنىڭ باعلانى

الەم چەمپيوناتىندا توپ جارىپ, ريو وليمپياداسىنىڭ قولا جۇلدەسىن الىپ ۇلگەرگەن اۋىر اتلەت الەكساندر زايچيكوۆ قازاقشاعا سۋداي. كىشكەنتايىنان قازاق بالالارى اراسىندا وسكەن ساشانىڭ مۇنىسىنا كوپ جۇرت تاڭعالعانىمەن, اكەسى ۆيتالي اناتولەۆيچ ونشالىقتى قايران قالا قويمايدى. – ۆيتالي اناتولەۆيچ, ساشانىڭ اۋىر اتلەت بولاتىنى قاي كەزدە باي­قالدى؟ – ۇلىم كىشكەنە كۇنىنەن قولدى-اياققا تۇرمايتىن شيراق بولىپ ءوستى. مۇنى جۇرت تا بايقايدى ەكەن. ءبىر كۇنى ۇيگە عالىم دەگەن جاس جىگىت كەلدى. ءوزى مەنىڭ بالامنىڭ قولىنان ۇستاپ الىپتى. باسىندا ساشا بىردەڭەنى ءبۇلدىرىپ قويدى ما ەكەن, دەپ كىپى الىپ قالعام. سويتسەم, كەلگەن جىگىت گرەك-ريم كۇرەسىنىڭ جاتتىقتىرۋشىسى ەكەن, ۇلىمدى سىرتتاي كورىپ ءجۇرىپ, وزىنە شاكىرت ەتىپ الماقشى بولىپتى. بۇعان دەيىن سپورتتىڭ كاراتە, ۆەلوسپورت, فۋتبول, باسكەتبول سياقتى ءبىراز تۇرلەرىنە قانىعىپ وسكەن ۇلىم كۇرەسكە بارۋعا ىنتالىلىق تانىتتى. وسىلايشا ءبارىن كۇرەستەن باستادى. – ال اۋىر اتلەتيكاعا قاشان اۋىس­تى؟ – كۇرەسىپ جۇرگەن كۇندەرىندە قازىرگى جاتتىقتىرۋشىسى الماس ابدراەۆ كورىپ قالىپ, بىردەن اۋىر اتلەتيكاعا شاقىرادى. شاماسى, دەنە بىتىمىنە قىزىعىپ قالسا كەرەك. ساشانىڭ ءوزى دە وعان قۋانا باردى. – ۇلىڭىزدىڭ تۇعىرداعى تايتالاسىن كورگەن شىعارسىز؟ ادامدا ونداي كەزدە ۇيقى بولا ما, ۇيگە تۋعان-تۋىستار مەن دوستاردىڭ ءبارى جينالىپ, تاڭدى بىرگە اتىردىق. جانىمىزدا ساشانىڭ ناعاشى اتاسى ۆيكتور الەكساندروۆيچ تە بولدى. وسى تۇندە بۇل كىسى 69 جاسقا تولدى. ەكى قۋانىش قاتار كەلىپ, ول ءبىراز تولقىدى. – ۇلىڭىز قالاي «قازاق» بولىپ كەتىپ ءجۇر؟ – ءبىز اۋەلگىدە ول قازاق ءتىلىن بالالارمەن ويناپ ءجۇرىپ ۇيرەنگەن بولار دەپ ويلاۋشى ەدىك. ونىڭ قازاقشانى وسىنشا تازا سويلەيتىنىن كەيىن بىلدىك. ساشا ۇستازى ارماننىڭ كەڭەسىمەن قالاداعى ءجالاڭتوس ءباھادۇر اتىنداعى سپورتتا دارىندى بالالارعا ارنالعان مەكتەپ-ينتەرناتتا وقىدى. وندا بارلىق پاندەر قازاق تىلىندە جۇرەتىن ەدى. ءبىز بالامىز وسىدان قيىندىق كورەتىن شىعار دەپ قاۋىپتەندىك. بىراق ول ساباقتى قازاق بالالارىمەن بىردەي وقىپ, مەكتەپتى ويداعىداي  ءبىتىرىپ شىقتى. اڭگىمەلەسكەن رۋسلان يگىلىك