ريو وليمپياداسىنان ەل قورجىنىنا العاشقى التىن مەدالدى سالعان نيدجات راحيموۆتىڭ بالالىق شاعى باكۋ قالاسىندا وتكەن. اكەسى ءالي دە سپورتشى, اۋىر اتلەتيكانىڭ قىر-سىرىن ءبىر كىسىدەي بىلەدى. سول سەبەپتەن دە بولار, نيدجاتتى بالا كۇنىنەن قولىنان جەتەلەپ, اۋىر اتلەتتەر جاتتىعاتىن زالعا ءجيى ەرتىپ بارىپتى. وسىلايشا بۇعاناسى قاتا قويماعان كەزدەن, زىلتەمىردى دوپشا كوتەرگەن اۋىر اتلەتتەردىڭ ءار قيمىلىنا تامسانۋدان تالماعان ۇل ءوز اڭسارىنىڭ وسى سپورتقا اۋعانىن بايقاماي قالىپتى.
قازاق ەلى ونى قۇشاق جايا قارسى الدى. ءتۇبى ءبىر تۇركى ەلىنىڭ وكىلى نيدجات تا بۇل جاقتى جاتسىنبادى. اتىراۋداي مۇنايلى ءوڭىردىڭ تابيعاتى قاتالداۋ بولعانىمەن, ونى تۇرعىندارىنىڭ قازاقتىڭ كەڭ دالاسىنداي دارحان كوڭىلى جىگەرلەندىردى. جەرگىلىكتى بيلىك جاڭادان بوي كوتەرگەن كوپ قاباتتى ۇيدەن باسپانا بەردى. سپورت ماماندارى قولداۋىن كورسەتتى. تاحير حالماتوۆتاي حالىقارالىق دارەجەدەگى سپورت شەبەرى قامقورلىعىنا الىپ, حالىقارالىق سايىستارعا دايىنداي باستادى.
قازاق ەلىنىڭ, قازاق حالقىنىڭ دارحان كوڭىلىنەن جانىنا مەدەت تاپقان نيدجات تا كوپ ۇزاماي بابىنا كەلدى. ءوز سالماعى – 77 كيلودا ەل چەمپيوناتىندا توپ باستادى. سوسىن, حيۋستوندا جالاۋى جەلبىرەگەن الەم چەمپيوناتىندا وعان تەڭەسەر قارسىلاس تابىلا قويمادى. بۇل ونىڭ قازاق ەلى تۋى استىنداعى العاشقى جەڭىسى بولاتىن.
مەنىڭ ءبىر عانا قارسىلاسىم بار, ول – تەك زىلتەمىر دەپ ءمالىم ەتىپ ەدى حيۋستونداعى الەم چەمپيوناتىنان كەيىن نيدجات راحيموۆ.
ول ريو وليمپياداسىنداعى ەكىنشى جاتتىعۋىندا تاۋەكەلگە باردى. الدىڭعى باعىندىرىلعان بەلەستەن 12 كيلوعا اۋىر سالماققا تاپسىرىس بەردى. 214 كيلو! بۇل سالماقتى اقىرىندا توبەسىنە تىك كوتەرىپ اكەتتى. رەكورد! چەمپيون دا بولىپ شىعا كەلدى.
قازاقستان قورجىنىنا العاشقى التىن مەدال وسىلاي ءتۇستى.
قازاق ەلىنىڭ دالاداي دارحان كوڭىلىنىڭ مەيىرىمى مەن ىستىق ىقىلاسىنا بولەنگەن نيدجات راحيموۆ ەندى ازاماتتىعىن اۋىستىرماۋعا بەكىنىپ وتىر. «ماعان ازاماتتىعىن بەرىپ, وليمپيادا چەمپيونى بولۋىما جول اشقان قازاق ەلى, ءوزىم تۇرىپ جاتقان اتىراۋ وبلىسى ۇنادى. مەن ەندى قازاقستاننان ەشقايدا كەتپەيمىن. بۇدان بىلاي دا قازاقستاننىڭ اتىنان حالىقارالىق دودالارعا قاتىسا بەرەمىن. مەنىڭ باستى ارمانىم – ءوزىم تۇرىپ جاتقان ەلدىڭ ابىرويىن, مەرەيىن تاسىتا بەرۋ!», – دەدى ول.
جولداسبەك شوپەعۇل,
«ەگەمەن قازاقستان»
اتىراۋ