كۇنى كەشە عانا ءوزىنىڭ مارەسىنە جەتكەن XXXI جازعى وليمپيالىق ويىندار قازاقستان قۇراما كومانداسى ءۇشىن جەتىستىكپەن اياقتالدى. ءبىزدىڭ سپورتشىلارىمىز وسى ايتۋلى الاماندا جالپى سانى 17 مەدال جەڭىپ الىپ, مۇنىڭ الدىنداعى بەيجىڭ مەن لوندون وليمپيادالارىندا كورسەتكەن كورسەتكىشتەرىنەن 4 جۇلدە العا كەتتى.
اقيقاتىن ايتساق, ءبىز ويىندارعا اتتاندىرىپ سالعان ساڭلاقتارىمىزدىڭ ەل نامىسىن قولدان بەرمەۋ جولىندا بارىن سالاتىندارىنا قانشا جەردەن سەنىمدى بولعانىمىزبەن, ولاردىڭ تاپ وسىنشالىقتى دارەجەدە تابىس ءبيىگىنەن كورىنە الاتىندارىن الدىن الا بولجاي قويعان جوق ەدىك. بۇعان تاپ وسى جاھاندىق جارىس باستالار قارساڭىندا ەكى بىردەي وليمپيالىق ويىنداردىڭ چەمپيونى يليا يلين مەن لوندون وليمپياداسىندا توپ جارعان ءزۇلفيا چينشانلو, مايا مانەزا جانە سۆەتلانا پودوبەدوۆا باستاعان اۋىر اتلەتتەر قۇراماسى ساپىنىڭ دوپينگ داۋى سالدارىنان سەلدىرەپ قالۋى تىكەلەي سەبەپشى بولدى.
بۇعان قوسا, الەمدىك جارىستاردا چەمپيون اتانىپ, جۇلدەلى ورىنداردان كورىنىپ جۇرگەن جاسۇلان قادىرباەۆ, الماس وتەشوۆ سەكىلدى جاڭا تولقىن وكىلدەرىنىڭ دە وسى جانجالدىڭ شۋىمەن ويىندارعا جىبەرىلمەۋى جاعدايدى ودان بەتەر قيىنداتا ءتۇستى.
كەيىن ريوداعى اۋىر اتلەتتەر سايىسىنىڭ قورىتىندىلارى كورسەتكەندەي, ءبىز تەك وسىنىڭ ناتيجەسىندە عانا كەمىندە ەكى التىن مەدالدان قاعىلعان ەكەنبىز. دەگەنمەن, نەگىزگى قۇرامنىڭ ورنىن باسىپ, اتلانت مۇحيتىنىڭ ارعى بەتىنە جول تارتىپ كەتكەن تارلاندار دا نامىستى وڭايلىقپەن قولدان بەرە قويمادى. ولار مۇمكىندىگى بولعانىنشا لوندون تورىندە ايدى اسپاننان ءبىر-اق شىعارعان شوقتاي شوعىردىڭ جەڭىستى جولىن جالعاستىرىپ اكەتۋگە كۇش سالىپ باقتى. تۇپتەپ كەلگەندە, بۇل ءوزىنىڭ وڭ ناتيجەسىن بەردى. ءسويتىپ, اۋىر اتلەتتەرىمىز ريو تۇعىرىندا 1 التىن, 1 كۇمىس جانە 3 قولا مەدالدى قورجىنعا سالىپ, سايىس كوشباسشىلارىنىڭ قاتارىنان تابىلدى. مۇندا نيدجات راحيموۆ (77 كگ) – التىن, جازيرا جاپپارقۇل (69 كگ) – كۇمىس, ال فارحات حاركي (62 كگ), كارينا گوريچەۆا (63 كگ), الەكساندر زايچيكوۆ (105 كگ) قولا مەدالداردىڭ يەگەرلەرى اتاندى. بۇلاردان بولەك, جارىستا ارلي چونتەي (56 كگ) مەن دەنيس ۋلانوۆ (85 كگ) – ءتورتىنشى, مارگاريتا ەليسەەۆا (48 كگ) بەسىنشى بولدى.
اۋىر اتلەتتەر باسەكەسىندە باس جاتتىقتىرۋشى الەكسەي ني جەتەكشىلىك ەتەتىن قازاقستاندىق زىلتەمىرشىلەر العان مەدالدارىنىڭ سانى بويىنشا كوماندالىق ەسەپتە بەسىنشى ورىنعا شىقتى. ال مەدالداردىڭ جالپى سانى جاعىنان قىتايلىق ارىپتەستەرىنەن كەيىنگى ەكىنشى ساتىعا ورنالاستى. جارىس سوڭىندا اسپاناستى ەلى جاماعاتى قورجىنىندا 7 مەدال بولسا, ءبىزدىڭ ورتاق قازىنامىزعا 5 جۇلدە ءتۇستى. قالعان كوماندالاردىڭ بارلىعى مەدالدار سانى جاعىنان جەرلەستەرىمىزدەن قالىپ قويدى. وسىنىڭ ءوزى قازىرگى تاڭدا ەلىمىزدە اۋىر اتلەتيكانىڭ وزىندىك مەكتەبى قالىپتاسىپ, ءداستۇرى ورنىعا تۇسكەنىن انىق اڭعارتادى. ءبىر زاماندارى, 1980 جىلى ۆيكتور ءمازيننىڭ ماسكەۋ وليمپياداسىندا, 1988 جىلى اناتولي حراپاتىيدىڭ سەۋل ويىندارىندا التىن جۇلدە الۋمەن باستالعان جەڭىستى جولدارى تاۋەلسىزدىك جىلدارىندا جاڭاشا جالعاستى. بۇدان ءارى 1996 جىلى اتلانتادا – حراپاتىي, 2004 جىلى افينادا – سەرگەي فيليمونوۆ, 2008 جىلى بەيجىڭدە يرينا نەكراسوۆا, اللا ۆاجەنينا ەل قورجىنىنا كۇمىس مەدالدار سالدى. ال يليا يلين بەيجىڭدە العاش رەت چەمپيون اتانىپ, ەگەمەن ەلىمىزدىڭ اۋىر اتلەتيكاداعى ءبىرىنشى التىن مەدالىن الىپ بەرسە, ماريا گرابوۆەتسكايا سول جولى قولا مەدالگە قول جەتكىزدى.
ريو-دە-جانەيرو ويىندارى قازاقستان كومانداسىندا ەرتەڭىنەن ءۇمىت كۇتتىرەتىن جاس تولقىننىڭ جەتكىلىكتى ەكەنىن كورسەتىپ بەردى.
سەرىك ءپىرنازار,
«ەگەمەن قازاقستان»