وتاندىق تاۋار وندىرۋشىلەردى قولداۋ ءۇشىن الماتى وبلىسى اكىمىنىڭ قاۋلىسىمەن وڭىرلىك كوميسسيا قۇرىلعان ەدى. وعان وبلىس اكىمىنىڭ ورىنباسارى سەرىك تۇرداليەۆ پەن وبلىستىق كاسىپكەرلەر پالاتاسىنىڭ ديرەكتورى ءلاززات شىڭعىسباەۆا تەڭ توراعا بولىپ بەكىتىلدى. ماقساتى مەملەكەتتىك ورگاندار مەن وتاندىق تاۋار وندىرۋشىلەردىڭ ساتۋ-ساتىپ الۋ ماسەلەسىنە قولداۋ كورسەتىپ, كاسىپكەرلەر قىزمەتىن ۇيلەستىرۋ, مەملەكەتتىك ساتىپ الۋداعى جەرگىلىكتى قۇرام ۇلەسىن ارتتىرۋ بولىپ تابىلادى.
سونىمەن, اتالعان كوميسسيانىڭ جارتى جىلدىقتى قورىتىندىلاعان وتىرىسىندا وبلىستىق قۇرىلىس باسقارماسى 66 بايقاۋ, ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى 61 بايقاۋ ءوتكىزگەنى حاباردار ەتىلىپ, كاسىپكەرلەرگە مەملەكەتتىك ساتىپ الۋ جوسپارىن ۇسىندى. سونداي-اق, كاسىپكەرلەردىڭ دە پىكىرلەرى مەن ۇسىنىستارى تىڭدالدى. جوبالىق-سمەتالىق قۇجاتتارداعى تاريف مەرزىمىنىڭ ءوتىپ كەتۋى وزەكتى ماسەلە بولىپ تۇر. جوبانى ماقۇلداۋعا, قارجىلاندىرۋعا قۇجات ازىرلەنگەننەن كەيىن قارجى ءبولۋ ۇردىسىنە 1 جىلدان 3 جىلعا دەيىن ۋاقىت كەتەتىندىگى انىقتالدى. وسى ۋاقىت ارالىعىندا تاۋار مەن قىزمەت كورسەتۋ باعالارىنىڭ قىمباتتاپ كەتەتىندىگى بەلگىلى. الايدا, ساتىپ الۋدى وتكىزۋ كەزىندە مەملەكەتتىك ورگان قۇجاتتى ازىرلەۋ مەرزىمىن ەسەپكە المايدى جانە ءۇش جىل بۇرىن قويىلعان ءتاريفتى وزگەرتپەيدى. ال كاسىپكەردىڭ سول باعامەن كەلىسپەسكە امالى جوق.
«مۇنداي تاپسىرىستى بىرنەشە رەت ورىندادىم. تەحنيكالىق ەرەكشەلىكتى دايىنداۋ بارىسىندا ماماندار نارىق جاعدايىنا سايكەس كەلمەيتىن تاۋار باعالارىن كورسەتەدى. ال قىزمەتتەر مەن تاۋارلار تۋرالى اقپارات سايتتاردان الىنادى, ونداعى مالىمەتتەر بىرنەشە جىلدان بەرى جاڭارتىلماعان», دەيدى «Galamat» جيھاز فابريكاسىنىڭ ديرەكتورى تالاس مەڭسىزباەۆ.
قورىتا ايتقاندا, اكىمشىلىك كەدەرگىلەردى شەشۋ ءۇشىن «اتامەكەن» ۇكپ مەن جەرگىلىكتى اتقارۋشى ورگاندارعا ۇسىنىس-حات جىبەرىلەتىن بولدى.
نۇربول الدىباەۆ,
«ەگەمەن قازاقستان»
تالدىقورعان