«جاقسىنىڭ جاقسىلىعىن ايت, نۇرى تاسىسىن!» دەمەكشى, قايىرىمدىلىق پەن مەيىرىمدىلىكتى ناسيحاتتايتىن جوبالار بارشىلىق. ماسەلەن, «التىن جۇرەك» – قايىرىمدىلىق جولىنداعى ەڭ بەدەلدى ماراپات. اراعا 10 جىل ۋاقىت سالسا دا قوعامدا ءوز ءمانىن جوعالتپاعان جوبا, بۇگىندە ەل نازارىندا. ماراپات يەگەرلەرى – ارتىستەر مەن كاسىپكەرلەر, ءىرى كومپانيالار, باق پەن قاراپايىم تۇرعىندار. ەڭ باستىسى, جوبا مۇقتاج جاندارعا كومەك قولىن سوزۋعا دەگەن تالپىنىستى شىڭدايدى.
سوڭعى ۋاقىتتا زامان اعىمى ما, الدە ادام پەيىلى مە, ادامگەرشىلىك جۇرەگىمىزدەن جوعالىپ بارا جاتقان سياقتى. ونىڭ ورنىنا كۇندەلىكتى كۇيبەڭ تىرشىلىك, ءوزىمشىلدىك, ساناسۋ سياقتى قاسيەتتەر بەلەڭ الۋدا. ارينە, كوپكە توپىراق شاشۋ ورىنسىز. ىزگى تىلەكتەرى مەن نيەتتەرىن بىلدىرەتىن ادامدار كوبىنە وزدەرى جايلى ءدۇيىم جۇرتقا پاش ەتۋدەن اۋلاق. سوندىقتان بولار, ولار جايلى بىرەۋ بىلسە, بىرەۋ بىلمەيدى.
جوبا دەمەۋشىلەرى مەشىتتەر مەن شىركەۋلەردىڭ قۇرىلىسىنا, جەتىمدەر مەن مۇگەدەكتەرگە ماتەريالدىق كومەك بەرۋ ماقساتىندا قول ۇشىن سوزادى. سونداي-اق, جارىمجان جاندار مەن جارشىسى جوق جاس تالانتتاردىڭ ونەر جولىنا باتىل قادام باسۋلارىنا جاردەمدەسەدى.
«باۋىرجان» قوعامدىق قورىنىڭ قىزمەتكەرلەرى وسىدان ءبىرنەشە جىل بۇرىن ەل قالاۋلىلارىن بارشا جۇرت تانۋى قاجەت دەگەن شەشىمگە كەلدى. ۇيىم بەلسەندىلەرى وسىلاي «التىن جۇرەك» سىيلىعىن دۇنيەگە اكەلدى. بۇل ارناۋلى ماراپاتتى جەكە تۇلعالارمەن قاتار بىرقاتار تۇتاس كومپانيالار دا يەلەنە الادى.
اتاپ ءوتۋ كەرەك, جوبا حالىق اراسىندا بىردەن نازارعا ىلىكتى. العاشقى جىلدان-اق ۇيىمداستىرۋشىلار 70 ءوتىنىش جيناسا, وسى كۇنى ولاردىڭ سانى 200-گە دەيىن جەتىپ وتىر.
اتالىمدار لەگى ءبىراز ۋاقىتقا دەيىن وزگەرىسسىز بولدى. 10 ءبولىمى بويىنشا 2011 جىلدان بەرى شەتەلدىك ازاماتتارعا دا قاتىسۋعا مۇمكىندىك تۋدى. ەندى «قازاقستاننىڭ دامۋىنا زور ۇلەس قوسقانى ءۇشىن» تاياۋ جانە الىس شەتەل كوشباسشىلارى باق سىناسادى.
«جەتىم بالالارعا كومەك» اتالىمى اياسىندا BI Group قۇرىلىس حولدينگىنىڭ باسشىسى ايدىن راحىمباەۆ, 350 بالا تاربيەلەپ وتىرعان تالعار قالاسىنىڭ تۇرعىنى تۇياق ەسقوجينا, «اقنيەت» بالالار وتباسىلىق ءۇيىنىڭ نەگىزىن سالۋشى ەسىركەپ ەسىمحانوۆ «التىن جۇرەك» سىيلىعىنىڭ لاۋرەاتتارى اتاندى.
2011 جىلى «جىل قايىرىمدىسى» اتالىمى بويىنشا قاليشا تۇرەسبەكوۆا ەسىمدى زەينەتكەر اپا ماراپاتتالعان بولاتىن. بۇل كەرەمەت جاننىڭ 1959 جىلدان باستاپ دونور بولىپ كەلە جاتقانىن ەسكەرسەك, كەز كەلگەن ۋاقىتتا ول ءوز قانىمەن بولىسۋگە اسىعادى. ەلۋ جىلدان بەرى قاليشا اپاي ءوزىنىڭ يگى ءىسى ءۇشىن ەشكىمنەن العىس الماعان. مۇنداي قادامدى ول بورىشىم دەپ ساناسا كەرەك. وسىنداي قايىرىمدىلىق جولىنداعى مارتتىككە تامسانباۋ مۇمكىن ەمەس.
كاسىپكەر وركەن ەسەي مەرەيلى جۇلدەگەرلەر قاتارىندا. ول ءوز قاراجاتىنا ءبىر اۋىلعا ءىرى سپورتتىق كەشەن سالىپتى. سونداي-اق, مەشىت قۇرىلىسىنا 1,5 ملن. تەڭگە جۇمساعان.
ۇلتتىق سىيلىق قايىرىمدىلىق ۇيىمداردىڭ جەتەكشىلەرىن دە نازاردان تىس قالدىرعان ەمەس. قوعامدىق بەلسەندى قايراتكەر ارۋجان ساين مۇگەدەكتەرگە جاساعان قايىرىمدىلىعى ءۇشىن «التىن جۇرەك» اتالىمى بويىنشا ارنايى ماراپاتقا يە بولدى. 10 جىل ىشىندە «دوم» قوعامدىق قورى 1380-نەن استام قازاقستاندىق بالاعا كومەك قولىن ۇسىنعان.
2014 جىلدىڭ لاۋرەاتى, اردي ۇيىمىنىڭ جەتەكشىسى, ءاسيا احتانوۆا «مۇگەدەكتەرگە كومەك» اتالىمىنا ىلىكتى. ۇيىمداعى 24 جىلدىق ەرەن ەڭبەگىنىڭ ارقاسىندا ول 1000-عا جۋىق جەتكىنشەككە جاردەمدەستى. ۇيىمنىڭ بىرقاتار جوبالارىنىڭ نەگىزىندە, وسى كۇنى اسسوتسياتسيا 537 مۇمكىندىگى شەكتەۋلى بالا تاربيەلەيتىن وتباسىلارىنا, 147 مۇگەدەكتەر ارباسىنا تاڭىلعان بالالارعا كومەكتەسىپ كەلەدى.
«التىن جۇرەك» تۇعىرىندا قازاقستاننىڭ بىرقاتار كورپوراتسيالارى دا بار. 2015 جىلى, تانىمال فەرمەر, اقمولا وبلىسىنداعى «رودينا» اگروفيرماسىنىڭ باسشىسى, «التىن جۇرەك»-2015 سىيلىعىنىڭ لاۋرەاتى يۆان ساۋەر ءوز ولكەسىنىڭ دامۋىنا زور ۇلەس قوستى. كومپانيا ءوز قاراجاتىنان 314 ميلليون تەڭگە ءبولىپ, ونىڭ ءبىراز بولىگىن بالالارعا ارنالعان ويىن الاڭدارىنىڭ قۇرىلىسى مەن مەكتەپتەردەگى وقۋشىلاردىڭ كۇندەلىكتى تاماعىنا جۇمساعان.
ۇيىمداستىرۋ كوميتەتىنىڭ ساراپتاماسى بويىنشا, «التىن جۇرەك» سىيلىعىنىڭ 10 جىلدىق تاريحىندا جوباعا اتسالىسقان ۇمىتكەرلەر مەن لاۋرەاتتاردىڭ ارقاسىندا 80 ميلليارد تەڭگەدەن استام قارجىعا قايىرىمدىلىق شارالارى جاسالعان. جوبا قاتارىنداعى اسىل جانداردىڭ بەلسەندىلىكتەرىن ىزگىلىكتىڭ انىق كورىنىسىن بايقاتۋ دەپ بىلەمىز.
گۇلزات ساحوۆا,
«باۋىرجان» قايىرىمدىلىق قورىنىڭ ۇيلەستىرۋشىسى