قازاقستاندىق بەلگىلى سپورت ءجۋرناليسى نەسىپ جۇنىسباەۆ حالىقارالىق سپورت جۋرناليستەرى قاۋىمداستىعىنىڭ لاۋرەاتى اتاندى. ول وتكەن عاسىردىڭ 80-ءشى جىلى ماسكەۋ وليمپيادالىق ويىندارىنا بارعاننان بەرى 10 ويىننىڭ دۋىن كورىپتى. بۇل – اركىمگە بەرىلە بەرمەيتىن باق. بۇگىندە قازاق سپورتشىلارى الەمدىك بيىكتەردى باعىندىرىپ جاتسا, سول جاقسى جەتىستىكتەرىمىزدە نەسىپتىڭ سالعان ءىزى سايراپ جاتىر.
كەشە برازيليادا ءجۇرىپ اقجولتاي حاباردىڭ كۋاسى بولدىق. حالىقارالىق سپورت جۋرناليستەرى اسسوتسياتسياسى ون جانە وننان كوپ وليمپيادا ويىندارىنا بارىپ, سونداعى جاعىمدى جاڭالىقتاردى قۇس جولىمەن ەلگە جەتكىزگەن جۋرناليستەردى ارنايى سىيلىقپەن ماراپاتتاۋدى قولعا العان. لوندوندا باستاۋ العان وسى مەرەيلى مەرەكەدە ءبىزدىڭ سپورت سالاسىنداعى مەترىمىز نەسىپ جۇنىسباەۆ لايىق دەپ تانىلىپ, ريو-دە-جانەيرودا ارنايى سىيلىققا يە بولدى. تاڭداۋلى سپورت جۋرناليستەرىنە بەرىلەتىن بۇل سىيلىقتى سپورت دوداسىنا تەڭەسەڭىز, وليمپيادالىق ويىنداردىڭ چەمپيونى دەگەن ەڭ قۇرمەتتى اتاقپەن ساي كەلەدى. وسى ارناۋلى سىيلىقتى تابىس ەتۋگە وليمپيالىق ويىنداردىڭ 400 مەترگە جۇگىرۋدەن 5 دۇركىن چەمپيونى, الەمنىڭ بىرنەشە دۇركىن رەكوردشىسى, امەريكالىق جەلاياق مايكل دجونسون, برازيليا فۋتبولىنىڭ اڭىز ويىنشىسى, كوماندا كاپيتانى, الەم چەمپيونى كافۋ, وڭتۇستىكافريكالىق گولف شەبەرى گارري پلايەر, ۇلىبريتانيالىق داڭقتى ۆەلوترەكشى ۆيكتوريا پەندلەتون, سونىمەن قاتار, قىسقى وليمپيادالاردا موناكونىڭ تۋىن ءۇش رەت ۇستاپ شىققان موناكونىڭ ءپرينتسى البەرت II جانە وزگەلەر بار.
ماراپاتتاۋ راسىمىنەن كەيىن نەسىپ جۇنىسباەۆ تىلشىلەرگە بۇل سىيلىقتىڭ ماڭىزى تۋرالى ايتىپ بەردى.
–بۇل سپورت جۋرناليستەرىنە دەگەن ۇلكەن قۇرمەت! حالىقارالىق سپورت جۋرناليستەرى قاۋىمداستىعى (AIPS) وسىمەن ەكىنشى رەت تىلشىلەردى وسىنداي ىرى ماراپاتپەن قۋانتىپ جاتىر. ءبىرىنشىسى لوندون وليمپياداسىندا وتكەن. ەكىنشى رەت مىنە, وزدەرىڭىز كورىپ وتىرعانداي ريو-دە-جانەيرو قالاسىندا, تاعى دا وليمپيادا اياسىندا ۇيىمداستىرىلىپ جاتىر. بۇل وليمپيادادا چەمپيون سپورتشىلاردى قالاي قۇرمەتتەسە, سپورت تىلشىلەرىن دە سولاي قۇرمەتتەۋمەن تەڭ.
بۇگىنگى ماعان كورسەتىلگەن قۇرمەت وسىعان دەيىن قازاق تاريحىندا بولعان جوق. مىنە, ءبىرىنشى رەت ماراپاتتالىپ جاتىرمىز. بۇل مەنىڭ عانا ەمەس, قازاق ەلىنىڭ, قازاق سپورت جۋرناليستيكاسىنىڭ جەتىستىگى. از-كوپ بولسىن, 10 وليمپيادانىڭ كوزىن كوردىم. بارعان سايىن ەرتەڭگى ۇرپاق ءۇشىن وليمپياداداعى جارقىن جەتىستىكتەرىمىز تۋرالى كىتاپتار جازدىم. بۇل دا بولسا ەڭبەگىمنىڭ وتەۋى, – دەدى نەسىپ جۇنىسباەۆ.
ماراپاتتاۋدان سوڭ قازاق سپورتىنىڭ ارداگەرى ءوزىنىڭ ون جىلدىق وليمپيادالىق جولدارى تۋرالى جازىلعان ءتورت تومدىق تۋىندىلارىن حالىقارالىق سپورت جۋرناليستەرى قاۋىمداستىعىنىڭ مۋزەيىنە تاپسىردى.
باقتيار تايجان
ريو-دە-جانەيرو