جەتىسۋدىڭ ءتول داقىلى – قانت قىزىلشاسىن ءوسىرۋ قايتا جانداندى. سەبەبى, شيكىزاتتى وتكىزىپ, ەڭبەك وتەۋىن الاتىن زاۋىت ىسكە قوسىلدى. جەرگىلىكتى جاستار وسى مۇمكىندىكتى قالت جىبەرمەي گەكتارلاپ جەر الىپ, القاپتارىن جايقالتا ءتاتتى ءتۇبىر وسىرۋدە.
سول جاستاردىڭ بىرەگەيى, ەڭ باستىسى وزىندىك ويى بار, كوزدەگەن ماقساتىنا جەتۋ ءۇشىن ۇزەڭگىلەستەرىن سوڭىنان ەرتە بىلەتىن اسلان كوبەنتاەۆ سارقان اۋداندىق جاستار رەسۋرستىق ورتالىعىنىڭ جەتەكشىسى لاۋازىمىن اتقارۋدا. قىزمەتىم بار ەكەن دەپ كەڭسەدە وتىرا بەرۋ وعان جات. اپتاپ ىستىققا قاراماي ءتاتتى ءتۇبىر ەگىلگەن القاپ باسىندا كەزدەسىپ تىلدەسكەنىمىزدە: «قانت وندىرەتىن زاۋىتتى شيكىزاتپەن قامتاماسىز ەتۋ يدەياسى جەتىسۋلىق جاستار اراسىندا تۋىپ, قىزۋ تالقىعا تۇسكەندە بوس سوزدەن ناقتى ىسكە كوشۋ كەرەكتىگىن كوكەيىمە ءتۇيدىم. ءسويتىپ سارقان اۋىلىنىڭ ىرگەسىندە بوس جاتقان جەر ويىما ءتۇستى. توپىراعى مايلى, ءبىر قاپتالىنان توعان سۋى اعىپ ءوتىپ جاتىر. كۇرە جول دا ءتيىپ تۇر. ۇسىنىسىمدى سارقان اۋدانىنىڭ اكىمى ەرعازى قوشانبەكوۆ بىردەن قولدادى. سونىمەن, 4,5 گەكتار جەردى يەلەنىپ, «قازىنا» شارۋا قوجالىعىنىڭ كومەگىمەن تىڭ القاپتى جىرتىپ, تىرمالاپ, قانت قىزىلشاسىنىڭ «جاركەنتتىك» دەپ اتالاتىن سۇرپىن سەۋىپ العاشقى جۇمىستىڭ باسىن قايىردىق», دەدى ول.
جالپى, ايتار اۋىزعا وڭاي بولعانىمەن, ءتاتتى ءتۇبىر ءوسىرۋ تاباندىلىقتى, قول ەڭبەگىن وتە كوپ قاجەت ەتەتىن جۇمىس. سەبەبى, قانت قىزىلشاسىنىڭ تۇقىمىن 3,5 گەكتار جەرگە ەككەنىمەن يگەرە الماي تاستاپ كەتكەن شارۋا قوجالىعىنىڭ القابىن وسى جاستار زاڭناما تالابىنا ساي رەسىمدەپ تە الىپتى. ءبىز كەلگەن كۇنى تاعى 7 گەكتار جەردى يگەرۋلەرىنە ۇسىنىس تۇسكەنىن ەستىدىك. بوس قالعان القاپقا دا قانت قىزىلشاسىنىڭ تۇقىمى سەبىلگەن ەكەن. بۇل اسلان كوبەنتاەۆ باستاعان جاستارعا ارتىلىپ وتىرعان ەل سەنىمى. نەگىزى قانت قىزىلشاسىنىڭ «جاركەنتتىك» سۇرپىنىڭ ارتىقشىلىعى – جىل سايىن ونىمدىلىگىنىڭ ءوسىپ وتىراتىندىعىندا. ءارى سول ءونىم تۇقىمىن جيناپ الىپ, كەلەسى جىلى سەۋىپ وسىرۋگە بولادى. ال فەرمەرلەر شەتەلدەن اكەلىپ ەگىپ وتىرعان تۇقىم ءبىر جىل عانا ءونىم بەرەدى. كەلەسى جىلى قايتادان تۇقىم ساتىپ الۋىڭىزعا تۋرا كەلەدى. سوندىقتان, جاستاردىڭ وتاندىق ءونىمدى ءوسىرىپ وتىرعانى قۋانتارلىق جايت. سارقاندتىق جاستار وسىرگەن 4,5 گەكتار جەردە قانت قىزىلشاسىنىڭ ءار ءتۇبىرى بۇگىندە 1330 گرامم سالماققا جەتىپتى. بۇيىرتسا, جاقسى باپتالعان القاپتان گەكتارىنا 50 تسەنتنەر ءونىم جيناۋ كوزدەلۋدە.
اۋدان باسشىسى جاستارعا ۇنەمى قولداۋ كورسەتىپ وتىرادى. تاياۋدا تاعى دا القاپ باسىنا كەلىپ كوكسۋ قانت زاۋىتى جاستار وسىرگەن ءونىمدى تالاپقا ساي قابىلداپ الاتىنىن جەتكىزدى. ال جاستار جاعى بولسا كۇزگى جيىن-تەرىن كەزىندە شامامەن ەكى ءجۇز مىڭ توننادان اساتىن ءتاتتى ءتۇبىر جيناپ, كوكسۋ قانت زاۋىتىنا تاسىمالداۋ جاعدايىندا جان-جاقتى قاراستىرىپ قويىپتى. ءيا, جەتىسۋلىق جاستاردىڭ اتقارىپ وتىرعان يگى ىستەرى شىنىندا كوز قۋانتادى. تابىس كوزىن باعامداعان جاستاردىڭ ىستەرى وڭىنان بولىپ, ءتاتتى تۇبىردەن مول ءونىم جينارى ءسوزسىز.
نۇربول الدىباەۆ,
«ەگەمەن قازاقستان»
سۋرەتتى تۇسىرگەن تەمىر نۇعمانوۆ
الماتى وبلىسى