اتىراۋدا سيىرلاردىڭ بەلگىسىز ىندەتكە شالدىققانى تۋرالى «اتى جوق ىندەت» («ەگەمەن قازاقستان» گازەتى, №141, 26 شىلدە) دەگەن تاقىرىپپەن دابىل كوتەرگەنبىز. ۆەتەرينارلىق باقىلاۋ جانە قاداعالاۋ كوميتەتى اتىراۋ وبلىستىق اۋماقتىق ينسپەكتسياسى باسشىسىنىڭ ورىنباسارى سۇلۋحيا بيسەنوۆانىڭ ءمالىم ەتكەنىندەي, ءدال قازىر ىندەتتىڭ دياگنوزى قويىلدى. قۇرمانعازى اۋدانىندا اۋىرعان مالدىڭ بىرنەشەۋىنەن الىنعان بيولوگيالىق سىنامالار رەسەي فەدەراتسياسىنىڭ ۆلاديمير قالاسىنداعى رەفەرەنتتىك زەرتحاناعا دا جولدانىپتى. اتالعان زەرتحانانىڭ قورىتىندىسىنا سايكەس نودۋليارلى دەرماتيت ۆيرۋسى انىقتالىپ وتىر.
وسىعان وراي وبلىس اكىمى نۇرلان نوعاەۆ اۋرۋ بەلگىلەرى انىقتالعان قۇرمانعازى مەن يساتاي اۋداندارى, سونىمەن بىرگە, اتىراۋ قالاسىنىڭ دامبى, كەڭوزەك اۋىلدىق وكرۋگتەرىنىڭ اۋماعىنا كارانتين ەنگىزدى. مۇنداي ءىس-شارانى قولعا الۋعا نودۋليارلى دەرماتيت ۆيرۋسىمەن قۇرمانعازى اۋدانىندا – 2267, يساتاي اۋدانىندا – 326, ال اتىراۋ قالاسىنىڭ ىرگەسىندەگى وكرۋگتەردە 24 سيىردىڭ اۋىرۋى سەبەپ بولىپ وتىر.
– بۇل اۋرۋ قازاقستاندا بۇرىن-سوڭدى تىركەلمەگەن ەكزوتيكالىق, ياعني, سىرتتان كەلگەن اۋرۋ. ونىڭ نەگىزگى كلينيكالىق بەلگىلەرى مىناداي. مالدىڭ ازىق قابىلداۋىنىڭ تومەندەۋى, كوزىنەن جانە تىنىس جولدارىنان سۇيىقتىقتىڭ اعۋى, جوعارى تەمپەراتۋرا, مويىن, كەۋدە, باۋىرى تۇسىندا, جەلىنىندە, شابىندا, باسىندا, تەرى استىندا كونسيستەنتسياسى قاتتى ءبىرنەشە تۇيىنشەك پايدا بولادى. تۇيىنشەكتەردىڭ ديامەترى 2 سم-دەن 5-11سم-گە دەيىن بارادى, بيىكتىگى 0,2-0,5 سم. كەيبىر مالدا سول تۇيىنشەكتەردىڭ تىندەرى ءولىپ, قاۋدىراپ ءتۇسىپ قالادى. ليمفاۋزەلدەر ءىسىپ تۇرادى. مال تەز ارىقتايدى. مالدىڭ ءسۇتىن قىزدىرعاندا گەل سياقتى قويۋلانىپ قالادى, – دەپ ءتۇسىندىردى سۇلۋحيا بيسەنوۆا.
ماماننىڭ پىكىرىنشە, مۇنداي اۋرۋ 2014 جىلى رەسەيدىڭ داعىستان, چەشەنستان جانە كراسنودار ايماعىندا تىركەلىپتى. جەلدىڭ باعىتىمەن ماسا, سونا سياقتى قانسورعىش ناسەكومدار قونىس اۋدارىپ ۇشادى. ناسەكومدار اۋرۋ مالدان سوڭ ساۋ مالدى شاقسا, اتالعان اۋرۋ جۇعادى ەكەن. سول سەبەپتەن, جەرگىلىكتى ۆەتەرينارلارعا مالدىڭ ءۇستىن تازالاۋ ءۇشىن دەزينفەكتسيالىق دارىلەردى 3 كۇن سايىن شاشۋعا تاپسىرما بەرىلىپتى. بۇدان بولەك, كرەولين, ليزول, سكيپيداردى جانە ديحلوفوس سياقتى ۇركىتەتىن ءيىستى دارىلەردى دە قولدانۋعا بولادى ەكەن.
وسىلايشا, ءوڭىر تۇرعىندارىن الاڭداتقان ىندەتتىڭ اتى بەلگىلى بولدى. وبلىستىق اۋماقتىق ينسپەكتسيا باسشىسى نۇرباي ءابدىراحمانوۆتىڭ ءمالىم ەتۋىنشە, 5 تامىزعا دەيىن 4147 سيىرعا نودۋليارلى دەرماتيت جۇققان بولسا, ونىڭ 322-ءسى ولگەن. وكىنىشكە قاراي, ەلىمىزدە اتالعان ۆيرۋستى ىندەتكە قارسى سالىناتىن ەكپە جوق بولىپ شىقتى. وڭىردە 5 كارانتين بەكەتى اشىلدى.
جولداسبەك شوپەعۇل,
«ەگەمەن قازاقستان»
اتىراۋ